ភ្នំពេញ៖ គណៈប្រឹក្សាយោបល់វិទ្យាសាស្ត្រ បច្ចេកវិទ្យា និងនវានុវត្តន៍ នៅថ្ងៃទី១២ ខែឧសភា ឆ្នាំ២០២៥ បានបើកកិច្ចប្រជុំនៅទីស្តីការក្រសួងឧស្សាហកម្ម វិទ្យាសាស្ត្របច្ចេក​វិទ្យា និងនវានុវត្តន៍ ដើម្បីពិនិត្យវឌ្ឍនភាព និង​កំណត់​ទិស​ដៅ​យុទ្ធសាស្ត្រ​សម្រាប់​ការ​អភិវឌ្ឍ​វិស័យ​វិទ្យាសាស្ត្រ បច្ចេកវិទ្យា និងនវានុវត្តន៍ (វ.ប.ន.) របស់កម្ពុជា។

កិច្ចប្រជុំនេះត្រូវបានរៀបចំឡើងក្រោមសហអធិបតីភាព ឯកឧត្តមរដ្ឋមន្ត្រី ហែម វណ្ណឌី និង ឯកឧត្តមសាស្ត្រាចារ្យ បណ្ឌិត ឆែម គាតរិទ្ធី ទេសរដ្ឋមន្ត្រី និងជាប្រធានគណៈប្រឹក្សាយោបល់វិទ្យាសាស្ត្រ បច្ចេកវិទ្យា និងនវានុវត្តន៍ ដោយមានការចូលរួម​ពី​សមាជិក​គណៈ​ប្រឹក្សាយោបល់ និងអ្នកឯកទេសផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីវាយតម្លៃសមិទ្ធផលការងារ និងកំណត់អាទិភាពសម្រាប់អនាគត។

ថ្លែងក្នុងកិច្ចប្រជុំឯកឧត្តម ហែម វណ្ណឌី បានលើកឡើងពីសារៈសំខាន់នៃការកៀរគរអ្នកវិទ្យាសាស្ត្រឯកឧត្តមរដ្ឋមន្ត្រីបានលើកឡើងថា៖

«កម្ពុជាកំពុងត្រូវការអ្នកជំនាញផ្នែកវិទ្យាសាស្ត្រជាច្រើន ហើយកិច្ចប្រជុំនេះបានប្រមូលផ្ដុំអ្នកជំនាញចម្រុះវិស័យមកចូល​​​រួមជាមួយគ្នាដើម្បីជំរុញវិទ្យាសាស្ត្រ បច្ចេកវិទ្យា និងនវានុវត្តន៍ ឱ្យមានការរីកចម្រើន និងបម្រើដល់ការអភិវឌ្ឍប្រទេសជាតិរបស់យើង»។

គណៈប្រឹក្សាយោបល់វិទ្យាសាស្ត្រ បច្ចេកវិទ្យា និងនវានុវត្តន៍ មានសមាជិកជាអ្នកជំនាញផ្នែកវិទ្យាសាស្ត្រចំនួន ២៣ រូប ដែលមានចំណេះដឹងខ្ពស់ក្នុងវិស័យផ្សេងៗ ដូចជា វេជ្ជសាស្ត្រ អប់រំ សេដ្ឋកិច្ច និងព័ត៌មានវិទ្យាអនុវត្តជាដើម។ គណៈប្រឹក្សា​យោបល់​នេះដើរតួនាទី​សំខា​ន់​ ក្នុងការផ្តល់ប្រឹក្សាជូនដល់ក្រុមប្រឹក្សាជាតិវិទ្យាសាស្ត្រ បច្ចេកវិទ្យា និងនវានុវត្តន៍ លើការរៀបចំគោលនយោបាយវិស័យ វ.ប.ន. និងការអភិវឌ្ឍស្ថាប័ន។

ដោយផ្តោតលើតម្រូវការនៃធនធានមនុស្សជាមូលដ្ឋានគ្រឹះសម្រាប់ការអភិវឌ្ឍវិទ្យាសាស្ត្រ បច្ចេកវិទ្យា និងនវានុវត្តន៍ ឯកឧត្តមសាស្ត្រាចារ្យ បណ្ឌិត ឆែម គាតរិទ្ធី បានលើកឡើងថា៖ ដើម្បីរៀបចំវិស័យវិទ្យាសាស្ត្រ បច្ចេកវិទ្យា និងនវានុវត្តន៍ យើងត្រូវការ​ធនធាន​មនុស្ស ​ហើយការអប់រំគួរតែដើរតួនាទីស្នូល។ ក្នុងនោះ គ្រឹះស្ថានឧត្តមសិក្សាគួររៀបចំកម្មវិធីសិក្សាឱ្យសមស្រប ដើម្បីឆ្លើយតបនឹងបំណងប្រាថ្នានៃការវិវត្តក្នុងឧស្សាហកម្ម។ ឯកឧត្តមក៏បានស្នើឱ្យមានការបង្កើតមជ្ឈមណ្ឌលផ្ទេរបច្ចេកវិទ្យាជាតិមួយ ដើម្បីសម្រួលដល់កិច្ចសហការរវាងវិស័យសិក្សាស្រាវជ្រាវ និងឧស្សាហកម្មផងដែរ។

គួរជម្រាបថា៖ កិច្ចប្រជុំបានពិនិត្យសមិទ្ធផលសំខាន់ៗ រួមទាំងការរៀបចំ និងអនុវត្តផែនទីបង្ហាញផ្លូវវិទ្យាសាស្ត្រ បច្ចេកវិទ្យា និងនវានុវត្តន៍កម្ពុជា ឆ្នាំ២០៣០ ដែលជាឯកសារយុទ្ធសាស្ត្រសម្រាប់ដឹកនាំដំណើរឆ្ពោះទៅការកសាងប្រព័ន្ធនវានុវត្តន៍ជាតិដ៏រឹងមាំមួយ។ កិច្ចប្រជុំក៏បានធ្វើបច្ចុប្បន្នភាពលើគំនិតផ្តួចផ្តើមសំខាន់ៗ ដូចជារបៀបវារៈស្រាវជ្រាវជាតិឆ្នាំ២០២៥ គម្រោង GO-SPIN និងការអភិវឌ្ឍផែនទីបង្ហាញផ្លូវបច្ចេកវិទ្យាវិស័យអប់រំ សុខាភិបាល កសិកម្ម ទេសចរណ៍ ឌីជីថល និងវិស័យថាមពល។កិច្ចប្រជុំក៏​បាន​សម្រេច​រៀប​ចំសិក្ខាសាលា “អ្នកវិទ្យាសាស្ត្រក្នុងគោលនយោបាយ” ជាស៊េរី សំដៅផ្តល់ឱ្យអ្នកវិទ្យាសាស្ត្រនូវជំនាញចាំបាច់បន្ថែម លើជំនាញស្នូលរបស់ពួកគេ ដើម្បីរួមចំណែកក្នុងដំណើរការបង្កើតគោលនយោបាយឱ្យកាន់តែមានប្រសិទ្ធភាព។

អនុសាសន៍ និងលទ្ធផលនៃការពិភាក្សារបស់គណៈប្រឹក្សាយោបល់ នឹងផ្តល់ជាធាតុចូលសម្រាប់របៀបវារៈនៃកិច្ចប្រជុំក្រុមប្រឹក្សាជាតិ វ.ប.ន. នាពេលខាងមុខ ព្រមទាំងតម្រង់មហិច្ឆតានៃការប្រើប្រាស់វិទ្យាសាស្ត្រ បច្ចេកវិទ្យា និងនវានុវត្តន៍ ជាកម្លាំងជំរុញកំណើនប្រកបដោយចីរភាព និងភាពប្រកួតប្រជែងជាសកលរបស់កម្ពុជា ៕