សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បច្ចេកវិទ្យាឌីជីថល មានការវិវត្តឥតឈប់ឈរដែលទាមទារឱ្យសហគ្រិន និងម្ចាស់អាជីវកម្ម ត្រូវចេះប្រើប្រាស់ និងទាញយកផលប្រយោជន៍ជាវិជ្ជមានពីបច្ចេកវិទ្យាឌីជីថលទាំងនោះ ដើម្បីអាចសម្របខ្លួនទៅនឹងបរិបទដែលមានការប្រែប្រួល និងអាចរក្សាភាពប្រកួតប្រជែងរបស់ខ្លួននៅក្នុងទីផ្សារ។
បច្ចេកវិទ្យាឌីជីថលបានដើរតួនាទីយ៉ាងសំខាន់នៅក្នុងការអភិវឌ្ឍសេដ្ឋកិច្ច សង្គម ហើយគ្រប់ស្ថាប័ន និងក្រុមហ៊ុនទាំងអស់ពិតជាត្រូវការអ្នកជំនាញបច្ចេកវិទ្យាឌីជីថល ដើម្បីជួយសម្រួលដល់ការងារឱ្យកាន់តែមានប្រសិទ្ធភាព។ ការសិក្សាជំនាញបច្ចេកវិទ្យាឌីជីថលកំពុងត្រូវទៅនឹងតម្រូវការទីផ្សារ ។
ក្នុងគោលបំណងលើកស្ទួយ និងជំរុញវិស័យបច្ចេកវិទ្យាឌីជីថល ស្ថាប័នចំនួនពីរ គឺសមាគមបច្ចេកវិទ្យាឌីជីថលកម្ពុជា (CDTA) និងវិទ្យាស្ថានហិរញ្ញវត្ថុ និងគណនេយ្យ(IFA) កាលពីពេលថ្មីៗនេះ បានចុះហត្ថលេខាលើអនុស្សរណៈយោគយល់គ្នាដើម្បីជំរុញវិស័យបច្ចេកវិទ្យាឌីជីថលនៅកម្ពុជាឲ្យកាន់តែរីកចម្រើន។
ឧកញ៉ាបណ្ឌិត ឈិន កេន ប្រធានសមាគមបច្ចេកវិទ្យាឌីជីថលកម្ពុជា បានថ្លែងថា ៖ ស្ថាប័នទាំងពីរមានគោលដៅរួមជំរុញវិស័យបច្ចេកវិទ្យាឌីជីថលនៅកម្ពុជាឲ្យកាន់តែរីកចម្រើន និងបណ្តុះបណ្តាលធនធានមនុស្ស។
លោកឧកញ៉ា បានលើកឡើងថា៖ គោលដៅសំខាន់នៃ MoU គឺពង្រឹងចំណងមិត្តភាព ពង្រឹងវិស័យបច្ចេកវិទ្យា ។ និស្សិតអាចទៅទទួលការបណ្តុះបណ្តាលនៅវិទ្យាស្ថានហិរញ្ញវត្ថុ និងគណនេយ្យ ក្នុងលក្ខខណ្ឌអនុគ្រោះតម្លៃសិក្សា។ សមាគមមានគោលដៅលើកស្ទួយវិស័យបច្ចេកវិទ្យាដោយសម្លឹងឃើញី IFA ជាសាលាមានជំនាញច្បាស់លាស់ផ្នែកប្រព័ន្ធគណនេយ្យនិងមុខវិជ្ជាបច្ចេកវិទ្យា។
លោក ប៊ុន សុន្នរង្គ នាយកវិទ្យាស្ថានហិរញ្ញវត្ថុ និងគណនេយ្យ បានមានប្រសាសន៍ថា ៖ ចាប់ពីពេលនេះទៅសាលាបានប្តូរកម្មវិធីសិក្សាទាំងអស់ឲ្យក្លាយទៅជាប្រព័ន្ធឌីជីថល។ ក្នុងកម្មវិធីសិក្សា បានបញ្ចូលជំនាញឌីជីថលជាបណ្តើរៗ ជាពិសេសអ្នករៀនមុខវិជ្ជាគណនេយ្យ ហិរញ្ញវត្ថុ នឹងទទួលបានការបណ្តុះបណ្តាលផ្នែកទីផ្សាឌីជីថល (Digital Marketing), បញ្ញាសិប្បនិម្មិត(AI) និង Cyber Security ។
លោកនាយកវិទ្យាស្ថានបានឱ្យដឹងថា៖ សាលានឹងបង្កើតជំនាញថ្មីចំនួន ៤ បន្ថែមទៀត ដើម្បីបំពេញតម្រូវការទីផ្សារ និងស្របទៅតាមយុទ្ធសាស្ត្របញ្ចកោណដែលយុទ្ធសាស្ត្រនេះលើកស្ទួយសេដ្ឋកិច្ច និងធុរកិច្ចឌីជីថល។ ជំនាញទាំងអស់ត្រូវកែប្រែមកជាប្រព័ន្ធឌីជីថល ដើម្បីតាមឱ្យទាន់សភាពការរណ៍ និងសង្គមបច្ចុប្បន្ន។
ឯកឧត្តម បណ្ឌិត ហេង វុទ្ធី ប្រធានកិត្តិយសសមាគមឌីជីថលកម្ពុជា បានថ្លែងថា៖អនុស្សារណៈយោគយល់គ្នារវាងសមាគមឌីជីថលកម្ពុជា និងសាលា IFA មានគោលបំណងបណ្តុះបណ្តាលលើវិស័យផ្នែកហិរញ្ញវត្ថុ ពិសេសលើជំនាញគណនេយ្យ និងការផ្តល់អត្ថប្រយោជន៍រវាងគ្នាទៅវិញទៅមក ពិសេសសាលានឹងបញ្ចុះតម្លៃដល់សមាជិក-សមាជិកា របស់សមាគមដែលមានបំណងចង់មកសិក្សានៅសាលា IFA។ MoU នេះគឺជាការបង្កើនសមាជិកភាពរបស់សមាគមឌីជីថលកម្ពុជាថ្មីមួយទៀត ដែលធ្វើឱ្យមិត្តភាពមួយ នេះ ជាមិត្តភាពដ៏ជោគជ័យក្នុងសម័យឌីជីថល។ អនុស្សារណៈយោគយល់គ្នានេះ បញ្ជាក់ច្បាស់ពីការចូលរួមចំណែកអភិវឌ្ឍន៍ធនធានមនុស្ស ហើយការបណ្តុះបណ្តាលមុខវិជ្ជាគណនេយ្យ គឺពិតជាមានសារៈសំខាន់ណាស់ ។
ឯកឧត្តម បានលើកឡើងថា៖ការប្រើប្រាស់បច្ចេកវិទ្យាឌីជីថលសម្រាប់ការធ្វើអាជីវកម្មនៅកម្ពុជាកំពុងមានសន្ទុះរីកចម្រើន និងដើរទៅមុខយ៉ាងខ្លាំងក្លាសម្រាប់ការតភ្ជាប់កិច្ចទំនាក់ទំនងសង្គម ពាណិជ្ជកម្ម ការធ្វើអាជីវកម្ម បាន និងកំពុងផ្លាស់ប្តូរទម្លាប់ និងរបៀបរបបនៃការធ្វើអាជីវកម្មជាច្រើន។ ពាណិជ្ជកម្មតាមប្រព័ន្ធអេឡិចត្រូនិកកំពុងវិវឌ្ឍន៍យ៉ាងឆាប់រហ័ស ហើយអាជីវកម្មនានាកំពុងធ្វើការទាញយកផលប្រយោជន៍ចេញពីថ្នាលថ្មីទាំងនេះ៕
Account
Security
Favourite Content