សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមទិន្នន័យពីគោលនយោបាយជាតិស្ដីពីស្វាយចន្ទី ឆ្នាំ២០២២-២០២៧ កម្ពុជាអាចផលិតគ្រាប់ស្វាយចន្ទីបានប្រមាណជាង ២០ម៉ឺនតោនក្នុងមួយឆ្នាំ ក៏ប៉ុន្តែកម្ពុជាអាចកែច្នៃគ្រាប់ស្វាយចន្ទីបានត្រឹមតែ ៥ភាគរយនៃចំនួនផលិតតែប៉ុណ្ណោះ។ នោះក៏ដោយសារតែសមត្ថភាពក្នុងការគ្រប់គ្រងគុណភាព អនាម័យ និងកែច្នៃកសិផលរបស់កម្ពុជានៅមានកម្រិត។
លទ្ធភាពនៃការកែច្នៃដែលមានកម្រិតនេះហើយដែលនាំឱ្យផលិតផលគ្រាប់ស្វាយចន្ទីស្រស់ជារឿយៗតែងជួបបញ្ហាតម្លៃនៅលើទីផ្សារ។ ជាដំណោះស្រាយ រដ្ឋាភិបាលបាន និងកំពុងខិតខំដើម្បីជំរុញការកែច្នៃនៅក្នុងស្រុកបន្ថែមទៀត ដែលអាចលក់ផលិតផលកែច្នៃក្នុងតម្លៃថ្លៃជាងផលិតផលស្រស់។
ជាសកម្មភាពមួយដែលធ្វើឡើងស្របទៅនឹងគោលនយោបាយជាតិស្ដីពីស្វាយចន្ទី ក្រសួងពាណិជ្ជកម្ម នាថ្ងៃទី៦ ខែធ្នូ ឆ្នាំ២០២៣នេះ បានសហការជាមួយក្រសួងកសិកម្ម រុក្ខាប្រមាញ់ និងនេសាទ និងក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ រួមទាំងដៃគូអភិវឌ្ឍន៍ ផ្សេងៗទៀត ក្នុងការរៀបចំ “វេទិកាស្វាយចន្ទី” នៅក្នុងទឹកដីខេត្តកំពង់ធំ ក្រោមមូលបទ “យើងរួមគ្នាផ្សព្វផ្សាយសក្តានុពលស្វាយចន្ទីកម្ពុជា”។
វេទិកានេះផ្ដល់ឱកាសដល់ភាគីពាក់ព័ន្ធក្នុងវិស័យស្វាយចន្ទី ដាក់តាំងបង្ហាញផលិតផលស្វាយចន្ទី ឧបករណ៍កែច្នៃ ការផ្គូរផ្គងធុរកិច្ច និងការរៀបចំសិក្ខាសាលាផ្សព្វផ្សាយ ក្នុងគោលបំណងជំរុញ និងលើកកម្ពស់កេរ្តិ៍ឈ្មោះស្វាយចន្ទីកម្ពុជា។
វេទិកានះក៏ជាព្រឹត្តិការណ៍លើកទី១ ដែលធ្វើឡើងដើម្បីជួយជំរុញផ្សព្វផ្សាយឱ្យសាធារណជន អាជីវករ ពាណិជ្ជករ អ្នកធុរកិច្ច ទាំងក្នុងស្រុក និងនៅក្រៅស្រុកបានយល់ដឹងជ្រួតជ្រាបកាន់តែច្បាស់ អំពីសក្តានុពល និងកាលានុវត្តភាពស្វាយចន្ទីកម្ពុជា និងដើម្បីទាក់ទាញអ្នកវិនិយោគលើការកែច្នៃ ផលិតផលស្វាយចន្ទី សំដៅបង្កើនតម្លៃបន្ថែមលើខ្សែច្រវាក់ផលិតកម្មស្វាយចន្ទីសម្រាប់បម្រើ ទីផ្សារក្នុងស្រុក ក្នុងតំបន់ និងពិភពលោក បង្កើតការងារជូនប្រជាពលរដ្ឋ និងជួយទ្រទ្រង់កំណើនសេដ្ឋកិច្ចជាតិ។
យោងតាមគោលនយោបាយដដែល ដើម្បីសម្រេចបាននូវការប្រែក្លាយខ្លួនទៅជាប្រទេសផលិត និងផ្គត់ផ្គង់ផលិតផលស្វាយចន្ទីដ៏សំខាន់មួយសម្រាប់ទីផ្សារក្នុងស្រុក ក្នុងតំបន់ និងពិភពលោក រដ្ឋាភិបាលតាមរយៈក្រសួងពាណិជ្ជកម្ម បានដាក់ចេញនូវគោលដៅចម្បងចំនួន៣គឺ៖ ទី១ លើកកម្ពស់ទិន្នផលនៃការផលិត និងផលិតកម្មប្រកបដោយភាពប្រកួតប្រជែង។
ទី២ គឺជំរុញការធ្វើឧស្សាហូបនីយកម្មដើម្បីបង្កើន តម្លៃបន្ថែមលើការប្រមូលផល និងការកែច្នៃអនុផលស្វាយចន្ទីឱ្យសម្រេចបាន ២៥%នៅឆ្នាំ ២០២៧ និងយ៉ាងតិច ៥០% នៅឆ្នាំ ២០៣២។ ទី៣គឺជំរុញការនាំចេញ តាមរយៈការធ្វើពិពិធកម្មទីផ្សារ ការផ្សារភ្ជាប់អន្តរវិស័យក្នុងការនាំចេញ កិច្ចសម្រួលពាណិជ្ជកម្ម ការកាត់បន្ថយថ្លៃដើម និងការលើកកម្ពស់ឧត្តមភាពលើទីផ្សារ។
គួរបញ្ជាក់ថា នៅចន្លោះឆ្នាំ ២០១៥ ដល់ ២០១៩ ផ្ទៃដីដាំដុះស្វាយចន្ទីបានកើនឡើងពី ៩៤ ៣០៨ ហិកតា ដល់ ២២៨ ០៣៧ ហិកតា និងផ្ទៃដីប្រមូលផលកើនឡើងពី ៧៨ ៥៨៤ ហិកតា ដល់ ១៤៥ ៨៤០ ហិកតា។ រីឯទិន្នផលសរុបដែលទទួលបាន មានកំណើនពី ៩៣ ៩៤៤តោន ដល់ ២០៨ ៧៦៩តោន។ មកដល់ឆ្នាំ ២០២១ កំណើនផ្ទៃដីដាំដុះស្វាយចន្ទីមាន ៤០៥ ៩៩១ ហិកតា និងផ្ទៃដី ប្រមូលផលមាន ២៧៥ ៦៧៩ ហិកតា ដែលទិន្នផលជាមធ្យមទទួលបាន ១.៧៥តោនក្នុងមួយហិកតា៕
Account
Security
Favourite Content