បរទេស៖ យោងតាមប្រភពព័ត៌មានពីរ៉យទ័របានរាយការណ៍ថា ផ្អែកទិន្នន័យម៉ាក្រូសេដ្ឋកិច្ចចុងក្រោយបំផុតដែលចេញផ្សាយដោយក្រសួងពាណិជ្ជកម្មសហរដ្ឋអាម៉េរិក អ្នកវិភាគសេដ្ឋកិច្ជជាច្រើនកំពុងព្រួយបារម្ភថា សេដ្ឋកិច្ចរបស់ប្រទេសមហាអំណាចមួយនេះអាចឆ្ពោះទៅរកភាពជាប់គាំង ឬ Stagflation ខណៈដែលសញ្ញា​អាប់អួរ​បានបង្ហាញ​ពី​បញ្ហា​ប្រឈម​ដ៏​លំបាក​នៅពេល​ខាង​មុខ។

កាលពីថ្ងៃព្រហស្បតិ៍ សប្ដាហ៍កន្លងទៅនេះ របាយការណ៍បានបង្ហាញថា ផលិតផលក្នុងស្រុកសរុប GDP របស់អាមេរិកបានកើនឡើងក្នុងអត្រាប្រចាំឆ្នាំត្រឹមតែ ១,៦ ប៉ុណ្ណោះនៅក្នុងត្រីមាសទី ១ នៃឆ្នាំនេះ ដែលតិចជាងពីការព្យាករណ៍ ២,៥ ភាគរយ ខណៈដែលគេមើលឃើញថា កំណើន​យឺត​ជាង​ការ​រំពឹង​ទុក ពោលគឺមាន​ការ​កើន​ឡើង ៣,៤ ភាគរយប៉ុណ្ណោះចាប់ពី​ខែ​តុលា​ដល់​ខែ​ធ្នូឆ្នាំ ២០២៣។

ទន្ទឹមនឹងនេះ ភាពយឺតយ៉ាវនៃកំណើនសេដ្ឋកិច្ច និងការកើនឡើងតម្លៃទំនិញប្រើប្រាស់ គឺជាសញ្ញាជាក់លាក់នៃការជាប់គាំងសេដ្ឋកិច្ច និងការកើនឡើងអតិផរណាក្នុងរយៈពេលដ៏យូរ។ ការជាប់គាំងសេដ្ឋកិច្ចដ៏អាក្រក់បំផុតបានកើតឡើងនៅក្នុងទសវត្សរ៍ឆ្នាំ១៩៧០ ដោយសារការកើនឡើងនៃតម្លៃប្រេងពីការហាមឃាត់ប្រេងរបស់អារ៉ាប់លើសហរដ្ឋអាមេរិក និងប្រទេសដទៃទៀតដែលគាំទ្រអ៊ីស្រាអែលក្នុងសង្រ្គាម Yom Kippur នាឆ្នាំ១៩៧៣។ អ្នកបង្កើតគោលនយោបាយរបស់សហរដ្ឋអាម៉េរិកព្យាយាមបន្ធូរបន្ថយអតិផរណាដោយការដំឡើងអត្រាការប្រាក់សំខាន់ដល់ទៅ ២០ ភាគរយ ដែលធ្វើឲ្យសេដ្ឋកិច្ចប្រទេសធ្លាក់ចូលទៅក្នុងវិបត្តិសេដ្ឋកិច្ចដ៏ជ្រៅ។

នាយកប្រតិបត្តិ JPMorgan Chase លោក Jamie Dimon បង្ហាញការព្រួយបារម្ភថា ប្រវត្តិសាស្ត្រអាចកើតឡើងម្តងទៀត ដោយមើលឃើញថា ស្ថានភាពសេដ្ឋកិច្ចអាមេរិកមើលទៅដូចទសវត្សរ៍ឆ្នាំ១៩៧០។ វាពិតជាមានភាពស្រដៀងគ្នាដ៏គួរឱ្យភ័យខ្លាចទៅនឹងទសវត្សរ៍ឆ្នាំ១៩៧០ ជាមួយនឹងភាពតានតឹងផ្នែកភូមិសាស្ត្រនយោបាយកាន់តែខ្លាំងឡើងនៅមជ្ឈិមបូព៌ា និងការកើនឡើងតម្លៃប្រេង។ យ៉ាងណមិញ ក៏មានអ្នកសេដ្ឋកិច្ចផ្សេងទៀតមានអារម្មណ៍ថា សហរដ្ឋអាមេរិកមិនស្ថិតនៅជិតស្ថានភាពដែលវាប្រឈមមុខនៅកាលទសវត្សរ៍ឆ្នាំ ១៩៧០នោះទេ។ សូម្បីតែនៅកម្រិតខ្ពស់បំផុតនាពេលថ្មីៗនេះ អតិផរណាគឺស្ថិតនៅក្រោមកម្រិតខ្ពស់នៃ ១២​ ភាគរយ ហើយនៅ​ក្នុង​ល្បឿន​បច្ចុប្បន្ន តម្លៃ​កំពុង​កើន​ឡើង​យឺត​ជាង​បើ​ធៀប​នឹង​ទសវត្សរ៍​ឆ្នាំ១៩៧០។

កាលពីខែមីនា ធនាគារកណ្តាលអាមេរិកបានរំលងការដំឡើង ឬបន្ថយអត្រាការប្រាក់ ដោយវាស្ថិតនៅក្នុងកម្រិតដដែលរវាង ៥,២៥ ទៅ ៥,៥ ភាគរយ។ កិច្ចប្រជុំបន្ទាប់នៃគណៈកម្មាធិការទីផ្សារបើកចំហរបស់ធនាគារកណ្តាលអាម៉េរិក Fed ត្រូវបានគ្រោងទុកនៅថ្ងៃទី ១ ខែឧសភាខាងមុខនេះ។ ទន្ទឹមនឹងនេះដែរ សន្ទស្សន៍តម្លៃនៃការចំណាយលើការប្រើប្រាស់ផ្ទាល់ខ្លួន ដែលត្រូវបានប្រើជារង្វាស់ចម្បងនៃអតិផរណាដ៏សំខាន់ដោយ Fed បានកើនឡើងក្នុងល្បឿនប្រចាំឆ្នាំ ៣,៤ ភាគរយ ដែលជាការកើនឡើងដ៏ធំបំផុតក្នុងមួយឆ្នាំ។ យ៉ាងណាមិញ ការិយាល័យវិភាគសេដ្ឋកិច្ចបានរាយការណ៍ថា ការចំណាយរបស់អ្នកប្រើប្រាស់នៅសហរដ្ឋអាមេរិកមានអត្រា ២,៥ ភាគរយក្នុងខែមករាដល់ខែមីនា ដែលធ្លាក់ចុះពីការកើនឡើង ៣,៣ ភាគរយនៅក្នុងត្រីមាសទី៤ ឆ្នាំ២០២៣ និងទាបជាងការព្យាករណ៍ ៣ ភាគរយ។

យោងតាម ​​Business Insider លើកឡើងថា បញ្ហានេះដាក់សម្ពាធយ៉ាងធ្ងន់ធ្ងរលើសមត្ថភាពរបស់ធនាគារកណ្តាលអាម៉េរិក Fed ក្នុងការចាត់វិធានការ ពីព្រោះនិយ័តករបានបញ្ជាក់ថា ការកាត់បន្ថយអត្រាការប្រាក់គឺមិនអាចទៅរួចទេ លុះត្រាតែអតិផរណាមានការថយចុះ។

គួរឲ្យបញ្ជាក់ថា Stagflation សំដៅដល់ពេលវេលាមួយដែលប្រទេសមួយប្រឈមនឹងអត្រាអតិផរណាខ្ពស់ និងវិបត្តិសេដ្ឋកិច្ចដែលជាប់គាំងកើតឡើងដោយសារសេដ្ឋកិច្ចគ្មានកំណើន ឬកំណើនយឺត ការឡើងថ្លៃទំនិញ និងសេវាកម្ម និងការកើនឡើងនៃអត្រាអត់ការងារធ្វើ។ មិនត្រឹមតែប៉ុណ្ណោះ Stagflation មានផលប៉ះពាល់ដល់សេដ្ឋកិច្ចខ្លាំងជាងអតិផរណា និងបរិត្តផរណា។ ជាទូទៅ អតិផរណាគ្រាន់តែជាការកើនឡើងជាមធ្យមនៃថ្លៃទំនិញ និងសេវាកម្មក្នុងទីផ្សារ ហើយអតិផរណាអាចកាត់បន្ថយតាមរយៈបង្កើនការផលិតទំនិញ និង សេវាកម្មអោយបានច្រើនជាងមុនដើម្បីបំពេញតម្រូវការ ការយកពន្ធច្រើនជាងមុនដើម្បីកាត់បន្ថយការចាយវាយ និងការដំឡើងអត្រាការប្រាក់៕