បរទេស ៖ យោងតាមប្រភពពី Weforum បានលើកឡើងថា Gen Z ភាគច្រើនជឿជាក់លើសេវាកម្មធនាគារតាមបែបប្រពៃណី ដើម្បីការពារទិន្នន័យរបស់ពួកគេដោយសុវត្ថិភាព។ ជាការឆ្លើយតប ធនាគារទាំងនោះក៏បានផ្តល់ជូននូវសេវាកម្មឌីជីថលពិសេស ដើម្បីរក្សាអតិថិជនរបស់ពួកគេផងដែរ។

ទន្ទឹមនឹងនេះ​ របាយការណ៍ក៏បានបង្ហាញដែរថា ក្រុម Gen Z មានចំណែកប្រហែល ១៥ ភាគរយនៃកម្លាំងការងារនៅចក្រភពអង់គ្លេស។ លើសពីនេះ ឥទ្ធិពលរបស់ពួកគេនឹងបន្តកើនឡើងជាមួយកំណើននៃការចំណាយ និងកម្លាំងវិនិយោគ ដោយសារ Gen Z កាន់តែច្រើនឈានដល់អាយុធ្វើការ និងឈានចូលដល់វ័យរកប្រាក់ចំណូលរបស់ខ្លួន។ គេសង្កេតឃើញថា អាកប្បកិរិយារបស់ Gen Z ចំពោះលុយ និងហិរញ្ញវត្ថុគឺខុសគ្នាស្រឡះពីមនុស្សជំនាន់មុនៗ។ ដើម្បីទាក់ទាញចំណាប់អារម្មណ៍របស់ក្រុម Gen Z ស្ថាប័នហិរញ្ញវត្ថុ ឬ ធនាគារត្រូវយល់ពីអ្វីដែលពួកគេចង់បាន បើទោះបីជាទំនុកចិត្ត និងការទាមទាររបស់ពួកគេមើលទៅមិនធម្មតាក៏ដោយ។

ក្រុមមនុស្សវ័យ Gen Z ត្រូវបានកំណត់ថាជាអ្នកដែលកើតនៅចន្លោះឆ្នាំ១៩៩៧ និងឆ្នាំ២០១២ ដែលពួកគេលូតលាស់ឡើងនៅក្នុងពិភពឌីជីថល ប៉ុន្តែពួកគេមានទំនោរទៅរកសេវាកម្មធនាគារតាមបែបប្រពៃណីខ្លាំង។ ពួកគេជឿជាក់ថា សេវាកម្មធនាគារតាមបែបប្រពៃណីនឹងការពារទិន្នន័យរបស់ពួកគេមានសុវត្ថិភាពជាងនៅក្នុងបច្ចេកវិទ្យាទំនើបៗ។ យោងតាមការស្ទង់មតិរបស់ Oliver Wyman Forum Global Consumer Sentiment (GCS)​ បង្ហាញថា ៤៣ ភាគរយនៃក្រុមមនុស្ស Gen Z និយាយថា ធនាគាររូបវ័ន្តដែលមានកន្លែងទីតាំង និងសាខាជាក់លាក់ពិតជាមានសារៈសំខាន់សម្រាប់ពួកគេ ពីព្រោះធនាគារទាំងនោះផ្តល់សន្តិភាពនៃផ្លូវចិត្ត។

ទោះជាយ៉ាងណាក្តី ដើម្បីបង្កើតទំនាក់ទំនងយូរអង្វែងជាមួយ Gen Z ធនាគារត្រូវរួមបញ្ចូលគ្នានូវវត្តមាននៃទីតាំងរបស់ពួកគេជាមួយនឹងការផ្តល់ជូនសេវាកម្មឌីជីថលពិសេស និងការប្រកួតប្រជែង។ ធនាគារក៏ត្រូវតែផ្តល់សេវាកម្មដែលបំពេញតម្រូវការរបស់ Gen Z សម្រាប់ភាពងាយស្រួល ជម្រើស តម្លៃ និរន្តរភាព ចំណាយពេលវេលាតិច និងភាពផ្ទាល់ខ្លួនមានកម្រិតខ្ពស់។

បច្ចុប្បន្ននេះ ស្ទើរតែគ្រប់ស្ថាប័នហិរញ្ញវត្ថុទាំងអស់ផ្តល់ជូននូវសេវាកម្មរបស់ពួកគេតាមអ៊ីនធឺណិត ដែលរឹតតែមានភាពទាក់ទាញពី Gen Z រឹតតែធំឡើងជាមួយនឹងស្មាតហ្វូននៅក្នុងដៃរបស់ពួកគេ។ ស្ថាប័នលើសពី ៧៣ ភាគរយនិយាយថា បទពិសោធន៍របស់អតិថិជនដើរតួយ៉ាងសំខាន់ក្នុងជ្រើសរើសធនាគារដែលពួកគេចូលចិត្ត ដោយសារពួកគេចង់បានដំណោះស្រាយបច្ចេកវិទ្យាដែលជួយពួកគេក្នុងការគ្រប់គ្រងហិរញ្ញវត្ថុរបស់ពួកគេ។

យោងតាមការស្ទង់មតិរបស់ GCS បង្ហាញថា Gen Z ស្ទើរតែទាំងអស់ទទួលយកការច្នៃប្រឌិតផ្នែគឌីជីថល ដោយ ៧២ ភាគរយនិយាយថាពួកគេប្រើកម្មវិធី neobank (កម្មវិធីរបស់ធនាគារនៅលើអ៊ីនធឺណិត) ជាជម្រើសសម្រាប់ថវិកាចម្បងរបស់ពួកគេ ។ វាគឺជាដំណោះស្រាយឌីជីថលល្អបំផុតសម្រាប់ធនាគារទាំងនោះក្នុងការផ្តល់នូវបទពិសោធន៍ទំនើបងាយស្រួលដល់អ្នកប្រើប្រាស់ជាមួយនឹងក្រាហ្វិកដែលទាក់ទាញ និងព័ត៌មានអំពីការធ្វើប្រតិបត្តិការ ឬជ្រើសរើសកន្លែងដែលត្រូវវិនិយោគ។ មិនត្រឹមតែប៉ុណ្ណោះ ការវិនិយោគភាគហ៊ុនកំពុងមានការពេញនិយមសម្រាប់ក្រុមមនុស្ស Gen Z ដែលប្រៀបបាននឹងការលេងហ្គេមដើម្បីរកប្រាក់ចំណូល។

នាពេលបច្ចុប្បន្ននេះ អ្នកវិនិយោគវ័យក្មេងកំពុងបណ្តាក់ទុនលឿនជាងមនុស្សវ័យជំនាន់មុន ដោយពួកគេវិនិយោគជាមួយទ្រព្យសម្បត្តិដ៏ទូលំទូលាយទាំងបែបប្រពៃណី និងបែបបច្ចេកវិទ្យា។ ដូច្នោះហើយ ស្ថាប័នហិរញ្ញវត្ថុ និងធនាគារត្រូវយល់អំពីឥរិយាបទនោះ ក៏ដូចជាជំរុញការរៀបចំនូវការផ្តល់ជូនសេវាកម្មរបស់ពួកគេឱ្យសមស្របទៅនឹងអ្វីដែល Gen Z ចង់បាន។ ស្ទើរតែពាក់កណ្តាលនៃ Gen Z បានវិនិយោគនៅក្នុងទីផ្សារភាគហ៊ុន ដោយ ៤៥ ភាគរយទំនងជាចាប់ផ្តើមវិនិយោគនៅអាយុ ២១ ឆ្នាំ ដែលលឿនជាងមនុស្សវ័យកណ្តាល Millennials និង Gen X ២ ទៅ ៤ ដង។ លើសពីនេះទៅទៀត មនុស្សក្រុមនេះសន្សំបាន ១៤ ភាគរយនៃប្រាក់ចំណូលរបស់ពួកគេ។

ចាប់តាំងពីការបង្កើត Bitcoin មក ក្រុមមនុស្ស Gen Z ចាប់អារម្មណ៍យ៉ាងខ្លាំងលើគ្រីបតូ និងទ្រព្យសម្បត្តិនិម្មិតផ្សេងទៀត។ ក្នុងចំណោមវិនិយោគិនក្រុម Gen Z មានប្រមាណជាង ៤២ ភាគរយវិនិយោគជាមួយនឹងគ្រីបតូ បើធៀបនឹងទៅនឹងក្រុម Millennials មាន ៣៨ ភាគរយ និង Gen X មាន ៧ ភាគរយ។ លើសពីនេះផងដែរ ៥០ ភាគរយនៃស្ត្រី Gen Z ទំនងជាវិនិយោគលើទ្រព្យសម្បត្តិឌីជីថលជាងមនុស្សជំនាន់ផ្សេងទៀត។ នៅសហរដ្ឋអាមេរិក និងចក្រភពអង់គ្លេស ៦៨ ភាគរយ Gen Z ជនជាតិស្បែកខ្មៅ និងអាស៊ីបានវិនិយោគលើគ្រីបតូ ដែលមានចំនួនខ្ពស់ជាងជំនាន់ចាស់ជិត ៣ ដង។

យ៉ាងណាមិញ ដូចគ្នានឹងវិស័យធនាគារដែរ ការទាក់ទាញវិនិយោគិនវ័យក្មេងទាំងនេះមានចំពោះគ្រីបតូ មិនមានន័យថាពួកគេបដិសេធប្រភពលុយបែបប្រពៃណីនោះទេ។ ការស្ទង់មតិ GCS រកឃើញថា Gen Z កាន់តែបើកចំហចំពោះគំនិតនៃប្រព័ន្ធហិរញ្ញវត្ថុឌីជីថលរបស់ធនាគារជាងមនុស្សជំនាន់ចាស់។ ពួកគេចង់ស្វែងយល់បន្ថែមពីនិមិត្តសញ្ញាឌីជីថលនៃទ្រព្យសកម្មហិរញ្ញវត្ថុពិតប្រាកដដូចជាភាគហ៊ុន និងមូលបត្របំណុល ដើម្បីឱ្យពួកគេអាចជួញដូរនៅលើបច្ចេកវិទ្យា blockchain ផងដែរ។

ជាក់ស្តែង វាកាន់តែងាយស្រួលមើលថា Gen Z ពិតជាខ្វល់ខ្វាយ និងយកចិត្តទុកដាក់លើការធានាអនាគតហិរញ្ញវត្ថុរបស់ពួកគេដោយសុវត្ថិភាព។ ពួកគេតាំងចិត្តក្នុងការគ្រប់គ្រងហិរញ្ញវត្ថុរបស់ពួកគេ ខណៈពេលដែលចង់ដឹងពីព័ត៌មាន និងដំបូន្មានផងដែរ ដោយសារពួកគេភាគច្រើនចង់ប្រថុយនឹងការវិនិយោគជាមួយនឹងគ្រីបតូ និងទ្រព្យនិម្មិតផ្សេងទៀត ទោះជាពួកគេបែងចែកប្រាក់សន្សំទៅភាគហ៊ុន មូលបត្របំណុល និងទ្រព្យសម្បត្តិប្រពៃណីផ្សេងទៀតក៏ដោយ។ សព្វថ្ងៃនេះ ចំនួនកើនឡើង និងឥទ្ធិពលហិរញ្ញវត្ថុរបស់ Gen Z មានន័យថាអាកប្បកិរិយា និងចំណូលចិត្តទាំងនេះនឹងគ្រប់គ្រងទីផ្សារក្នុងពេលឆាប់ៗនេះ។ ដូច្នោះហើយ ស្ថាប័នហិរញ្ញវត្ថុគួរផ្តល់នូវសេវាកម្ម ឬតម្រូវការពិសេស ដើម្បីទាក់ទាញមនុស្សជំនាន់ Z នេះ៕