ភ្នំពេញ៖ រដ្ឋមន្រ្តី ក្រសួងកសិកម្ម បានថ្លែងឱ្យដឹងថា ចំណុចយុទ្ធសាស្ត្រចំនួនពីរ ដែលទាក់ទងនឹងវិស័យកសិកម្ម គឺទី១-ការដាក់ចេញនូវយន្តការសម្របសម្រួល ​និងកម្មវិធីហិរញ្ញប្បទាន សំដៅលើកស្ទួយផលិតកម្ម រកទីផ្សារ និងរក្សាលំនឹងថ្លៃកសិផលសំខាន់ៗក្នុងកម្រិតសមរម្យ ហើយទី២-ការដាក់​ពង្រាយមន្ត្រីបច្ចេកទេសកសិកម្មទៅគ្រប់ឃុំ-សង្កាត់ដែលមានសកម្មភាពកសិកម្ម នៅទូទាំងប្រទេស និងការរៀបចំឱ្យមានសមាគម​កសិករនៅតាមទីជនបទ។

ឯកឧត្តម ឌិត ទីណា រដ្ឋមន្រ្តី ក្រសួងកសិកម្ម រុក្ខាប្រមាញ់ និងនេសាទ បានថ្លែងដូចនេះ នៅក្នុងពិធីសំណេះសំ​ណាលជាមួយថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ កាលពីពេលថ្មីៗ​នេះ ដែលជាការចាប់ផ្តើមនៃការពិភាក្សា ជំរុញគោល​នយោបាយវិស័យកសិកម្ម ស្របតាម​យុទ្ធសាស្ត្រ​បញ្ចកោណដំណាក់កាលទី១ ដែលបានដាក់ចេញដោយរាជរដ្ឋាភិបាលកម្ពុជា ក្រោមការ​ដឹកនាំដ៏ខ្ពង់ខ្ពស់របស់ ឯកឧត្តមកិត្តិទេសា​ភិបាលបណ្ឌិត ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ឯកឧត្តម ឌិត ទីណា បានលើកឡើងបន្ថែមថា ដើម្បីធានាឱ្យបាននូវសន្តិសុខស្បៀង និងរក្សាស្ថិរភាពតម្លៃ ក៏ត្រូវមានយុទ្ធសាស្ត្រកាត់បន្ថយ​ថ្លៃដើម កាត់បន្ថយការចំណាយផ្សេងៗ ដើម្បីជួយឱ្យកសិករទទួលបានផលចំណេញ មានប្រសិទ្ធភាព និងនិរន្តរភាពសេដ្ឋកិច្ច ក្នុងការចូលរួមជំរុញសេដ្ឋកិច្ចប្រទេសឱ្យក្លាយប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០។

ជាមួយគ្នានេះដែរ ត្រូវមានយុទ្ធសាស្ត្រពាណិជ្ជកម្មច្បាស់លាស់ដើម្បីចូលរួមគាំទ្រសមាគមកសិករឱ្យមានភាពម្ចាស់ការរឹងមាំ និងសហប្រតិបត្តិការល្អ ដើម្បីពាណិជ្ជរូបនីយកម្ម និងដោយឡែក ការការពារធនធានធម្មជាតិ លោករដ្ឋមន្រ្តី បានគូសបញ្ជាក់ថា ក៏ជាការងារចាំបាច់ដែលត្រូវយកចិត្តទុកដាក់ការពារឱ្យ​បាន​ល្អបំផុត ទាំងអនុវិស័យជលផល ព្រៃឈើ ដីសម្បទាន និងសត្វព្រៃ ព្រមទាំងសត្វផ្សោត ដែលជារតនសម្បត្តិជាតិ ដើម្បីនិរន្តរភាពបរិស្ថាន និងទទួលបានទំនុកចិត្តពីប្រជាពលរដ្ឋ។

សូមបញ្ជាក់ថា ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយក​រដ្ឋមន្ត្រី​នៃ​កម្ពុជា បាន​ដាក់​ចេញ​នៅ​គោលនយោបាយ​ចំនួន ៦ចំណុច​ដើម្បី​ដឹកនាំ​ជាតិ​ឆ្ពោះ​ទៅ​រក​ការ​ការ​អភិវឌ្ឍន៍ ក្នុង​នោះ​មាន​២ចំណុច​ក្នុង​ចំណោម ៦ចំណុច គឺ​បានផ្ដោត​លើ​កសិកម្ម​ក្នុង​ស្រុក។ គោលនយោបាយ​ទាំង ៦នោះ​មាន៖

១-ការ​ពង្រីក​សេវាថែទាំសុខភាព ឆ្ពោះ​ទៅ​រកគ្របដណ្ដប់​សុខភាពសាធារណៈ

២-បណ្តុះបណ្តាលជំនាញវិជ្ជាជីវៈ បច្ចេកទេសជូនដល់​យុវជន​មក​ពី​គ្រួសារ​ក្រីក្រ និងគ្រួសារ​ងាយ​ហានិភ័យ​នៅទូទាំង​ប្រទេស

៣-ការ​ធ្វើ​ស្ថាបនូបនីយកម្ម កម្មវិធី​ជាតិ​ជំនួយ​សង្គម​សម្រាប់​គ្រួសារ​ក្រីក្រ ក្រុម​ជនងាយរងគ្រោះ​នៅ​ក្នុង​ក្រុម​គ្រួសារ​ក្រីក្រ និង​ក្រុម​គ្រួសារ​ងាយ​រង​ហានិភ័យ​ក្នុងគ្រាមានវិបត្តិ​សេដ្ឋកិច្ច និង​ក្នុង​គ្រា​មាន​អាសន្ន។

៤-ការ​ដាក់​ចេញ និង​ជំរុញ​អនុវត្តយុទ្ធសាស្ត្រអភិវឌ្ឍ​សេដ្ឋកិច្ច​ក្រៅ​ប្រព័ន្ធឱ្យ​មាន​លទ្ធភាព​ចូល​រួម​ក្នុង​សេដ្ឋកិច្ច​ក្នុង​ប្រព័ន្ធ និង​អាច​ទទួល​បាន​ផល​ប្រយោជន៍​ពី​ប្រព័ន្ធ​គាំពារ​សង្គម​ផ្លូវការ

៥-ការ​ដាក់​ចេញ​នូវយន្តការ​សម្របសម្រួល និង​កម្មវិធី​ហិរញ្ញប្បទាន​សំដៅ​លើកស្ទួយ​ផលិតកម្ម រកទីផ្សារ និង​រក្សា​លំនឹងថ្លៃកសិផល​សំខាន់​ៗ​ក្នុង​កម្រិត​សមរម្យ។

៦-ការ​ដាក់ពង្រាយមន្ត្រីបច្ចេកទេសកសិកម្ម គ្រប់ឃុំ សង្កាត់…ដែល​មាន​សកម្មភាព​កសិកម្ម​នៅ​ទូទាំង​ប្រទេស និង​ការ​រៀប​ចំ​ឱ្យមាន​សមាគម​កសិករ​នៅ​តាម​ជនបទ៕