សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលបំណងជំរុញការអភិវឌ្ឍ និងទាក់ទាញភ្ញៀវទេសចរទៅលេងកម្សាន្តនៅតំបន់រមណីយដ្ឋានកោះកុងក្រៅស្ថិតនៅភូមិជ្រោយប្រស់ ឃុំជ្រោយប្រស់ ស្រុកកោះកុង ខេត្តកោះកុង គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា បានបើកកិច្ចប្រជុំផ្សព្វផ្សាយពីសក្ដានុពលតំបន់នេះ ក្រោមអធិបតីភាពឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ នៅរសៀលថ្ងៃទី៦ មករា ២០២៥ នាទីស្ដីការក្រសួង ។
កិច្ចប្រជុំនេះ មានការចូលរួមពីតំណាងក្រសួងស្ថាប័នពាក់ព័ន្ធមួយចំនួនទៀត រួមជាមួយនឹងវិស័យឯកជនផងដែរ ដូចជាក្រសួងបរិស្ថាន ក្រុមប្រឹក្សាអភិវឌ្ឍន៍កម្ពុជា តំណាងរដ្ឋបាលខេត្តនៃតំបន់ឆ្នេរសមុទ្រកម្ពុជាជាដើម ។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា នៅក្នុងក្របខណ្ឌតំបន់ឆ្នេរ រាជរដ្ឋាភិបាលបានផ្ដួចផ្ដើមរៀបចំគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា ពីព្រោះតំបន់ឆ្នេរគឺជារបៀងសេដ្ឋកិច្ចដ៏សំខាន់មួយរបស់កម្ពុជាដែលអាចបង្កើតការងារ និងផ្ដល់ប្រាក់ចំណូលបានយ៉ាងច្រើនដល់ប្រជាជនកម្ពុជាក្នុងនោះរួមមានឆ្នេរសមុទ្រសម្រាប់លំហែ មានសមុទ្រសម្រាប់ប្រមូលផលនេសាទបានច្រើន ដោយការប៉ាន់ស្មានជំហានដំបូងចំពោះប្រាក់ចំណូលគឺក្នុងរង្វង់ ២ពាន់លានដុល្លារក្នុងមួយឆ្នាំសម្រាប់ប្រជាជនកម្ពុជា និងមានកោះដែលអាចផ្ដល់នូវចំណូល និងការងារជាច្រើនដល់ប្រជាជនកម្ពុជាផងដែរ។
ឯកឧត្តមឧបនាយករដ្ឋមន្ត្រីបានឱ្យដឹងថា កិច្ចប្រជុំនាពេលនេះធ្វើឡើងក្នុងគោលបំណងដើម្បីពិភាក្សាស្វែងយល់អោយបានច្បាស់លាស់អំពីតំបន់កោះកុងក្រៅ ក្នុងខេត្តកោះកុង និងប្រមូលមតិយោបល់រៀបចំយុទ្ធសាស្ត្របង្កើនសក្តានុពលទេសចរណ៍ក្នុងតំបន់នេះ ។ ឯកឧត្តមនឹងដាក់សំណើទៅលេខាធិការដ្ឋានគណៈកម្មាធិការឆ្នេរដើម្បីធ្វើកិច្ចការចុះបញ្ជីដីធ្លីនៅកោះ ទន្ទឹមនឹងនេះក៏ត្រូវសិក្សាពីសក្តានុពលទាំងអស់ផ្សារភ្ជាប់ជាមួយឆ្នេរទាំងមូលដែលជារបៀងសេដ្ឋកិច្ច និងបានដាក់សំណើទៅរាជរដ្ឋាភិបាលដើម្បីស្ថាបនាផ្លូវជិះកង់សម្រាប់ផ្សារភ្ជាប់សហគមន៍នេសាទពីខេត្តកោះកុងដល់ខេត្តកែបផងដែរ។
ឯកឧត្តមឧបនាយករដ្ឋមន្ត្រី សាយ សំអាល់ បានគូសបញ្ជាក់ថា នាពេលខាងមុខនេះគឺត្រូវរៀបចំតំបន់កោះកុងក្រៅ ផ្សារភ្ជាប់ជាមួយឆ្នេរទាំងអស់ និងត្រូវជួយគាំពារដល់ក្រុមហ៊ុនឯកជនក្នុងការវិនិយោគការអភិវឌ្ឍ ដើម្បីជំរុញឲ្យតំបន់កោះកុងក្រៅឱ្យកាន់តែមានការអភិវឌ្ឍន៍ល្អប្រសើរជាងមុនសម្រាប់ទាក់ទាញទេសចរ។
បើតាមឯកឧត្តម ប៉ែន សុផល រដ្ឋលេខធិការក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ឱ្យដឹងថា កោះកុងក្រៅមានចម្ងាយប្រមាណ៣០គីឡូម៉ែត្រពីក្រុងខេមរភូមិន្ទ ខេត្តកោះកុង ដែលមានផ្ទៃដីសរុបប្រមាណជាង ១ម៉ឺនហិកតា មានរយៈកម្ពស់៤០០ម៉ែត្រ ធៀបនឹងនីវ៉ូទឹកសមុទ្រ ហើយជាកោះដែលមានរយៈកម្ពស់ខ្ពស់ជាងគេក្នុងចំណោមបណ្ដាកោះដែលស្ថិតនៅក្នុងឈូងសមុទ្រថៃ ហើយក៏ជាកោះដែលមានឆ្នេរខ្សាច់ស្រស់ស្អាត ជាមួយនឹងព្រៃស្រោងគ្រប់ដណ្ដប់រហូតដល់៩០ភាគរយទៅហើយ ។
ឯកឧត្តមបានបន្តថា តំបន់កោះកុងក្រៅ មានតួនាទីជាជង្រុកសុវត្ថិភាពស្បៀងដ៏សំខាន់តាមបែបធម្មជាតិសម្រាប់តំបន់ឈូងសមុទ្រទាំងមូល ហើយព្រៃឈើ និងព្រៃកោងកាងនៅតំបន់នោះក៏មានសក្ដានុពលខ្ពស់ សម្រាប់ការលក់ឥណទានកាបូនទៅទីផ្សារអន្តរជាតិ ដែលអាចចូលរួមទ្រទ្រង់ជីវភាព និងកាត់បន្ថយភាពក្រីក្ររបស់ពលរដ្ឋ ក៏ដូចជាបុព្វហេតុអភិរក្សធនធានធម្មជាតិ ។ តំបន់នេះ ក៏ជារបៀងជីវចម្រុះដែលមានវិសាលភាពយ៉ាងធំធេងតភ្ជាប់ពីជួរភ្នំក្រវាញ ឧទ្យានជាតិបុទុមសាគរ ដែលជម្រកសត្វព្រៃ តំបន់ការពារធម្មជាតិរាមសារកោះកាពិ និងដែកជម្រកសត្វព្រៃពាមក្រសោប ហើយថែមទាំងជាប្រព័ន្ធតភ្ជាប់ការពារសមុទ្រនានា នៅក្នុងតំបន់អាស៊ានផងដែរ ៕
Account
Security
Favourite Content