សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១៨ ខែធ្នូ ឆ្នាំ២០២៥ បានឱ្យដឹងថា ក្រសួង បាន និងកំពុងញាប់ដៃញាប់ជើងក្នុងការរៀបចំកន្លែងដាំបន្លែនិងកន្លែងផលិតកម្មសត្វនៅខេត្តបន្ទាយមានជ័យ ដើម្បីផ្គត់ផ្គង់ដល់ជនភៀសសឹក។
ឯកឧត្តមរដ្ឋលេខាធិការបានបញ្ជាក់ថា បន្លែដែលបាន និងកំពុងដាំនេះ ជាបន្លែដែលមានរយៈពេលខ្លី ឆាប់បានប្រមូលផល ហើយក្រុមការងារកំពុងតែរៀបចំបានមួយជំហានហើយ និងកំពុងពន្លឿនដំណើរការនេះ។
ដោយឡែក មន្ត្រី និងអ្នកជំនាញផ្សេងទៀតបានយល់ថា នៅក្នុងកាលៈទេសៈដែលកម្ពុជាកំពុងរងការឈ្លានពានពីសំណាក់ភាគីថៃនេះ ទាមទារឱ្យកម្លាំងជួរក្រោយបង្កើនការដាំដុះដំណាំផ្សេងៗសម្រាប់ផ្គត់ផ្គង់ដល់វីរកងទ័ពជួរមុខកម្ពុជា ដែលកំពុងប្រយុទ្ធទប់ទល់នឹងការឈ្លានពានរបស់យោធាល្មោភសង្គ្រាមថៃ ក៏ដូចជាដើម្បីរក្សាស្ថិរភាពសន្តិសុខស្បៀងនៅក្នុងប្រទេសកម្ពុជាផងដែរ។
ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម ធ្លាប់បានលើកឡើងថា៖ ជាទូទៅ កម្ពុជា មិនមានបញ្ហាពាក់ព័ន្ធនឹងការខ្វះខាតផ្នែកសន្តិសុខស្បៀងនោះទេ ដោយកម្ពុជាបានផ្គត់ផ្គង់គ្រប់គ្រាន់សម្រាប់តម្រូវការប្រើប្រាស់ប្រចាំថ្ងៃក្នុងស្រុក បើទោះបីជាក្នុងកាលៈទេសៈកំពុងមានសង្គ្រាមនេះក៏ដោយ តែយ៉ាងណា ការងាកមកដាំដុះបន្លែដែលមានរយៈខ្លី គឺជារឿងសំខាន់ដើម្បីអាចផ្គង់ផ្គង់បានទាន់វេលាសម្រាប់ពលរដ្ឋភៀសសឹក។
អ្នកឧកញ៉ា ម៉ុង រិទ្ធី អគ្គនាយកក្រុមហ៊ុន ម៉ុង ឫទ្ធី គ្រុប បានប្រាប់សារព័ត៌មានក្នុងស្រុកថា៖ នៅក្នុងកាលទេសៈប្រទេសកំពុងជួបការលំបាកដោយសារការឈ្លានពានរបស់យោធាថៃនេះ ទាំងកសិករ ទាំងអ្នកវិនិយោគ មិនថា នៅក្នុងវិស័យកសិកម្ម ឬក៏កសិឧស្សាហកម្មនោះទេ ត្រូវតែនាំគ្នាបង្កើនការដាំដុះ ក៏ដូចជាបង្កើនការចិញ្ចឹមសត្វឱ្យបានច្រើន។
ជាមួយគ្នានេះ អ្នកឧកញ៉ា ហ៊ុន ឡាក់ អគ្គនាយកក្រុមហ៊ុន រីចហ្វាម អេស៊ា បានលើកឡើងថា ក្នុងគ្រាលំបាកបច្ចុប្បន្ននេះ ពលរដ្ឋគួរដាំបន្លែដែលអាចប្រមូលផលក្នុងរយៈពេលខ្លី ដើម្បីយកទៅផ្គត់ផ្គង់ដល់កងទ័ពជួរមុខ និងពលរដ្ឋកំពុងភៀសសឹក។
សូមរំលឹកផងដែរថា៖ លោកជំទាវ ពេជ ចន្ទមុន្នី ហ៊ុន ម៉ាណែត បានអំពាវនាវឱ្យមានចលនាស្នេហាជាតិមួយ តាមរយៈជំរុញដល់សិស្សានុសិស្សដាំដុះបន្លែ ដែលអាចប្រមូលផលបានក្នុងរយៈពេលខ្លី ដើម្បីអាចជួយផ្គត់ផ្គង់ដល់ពលរដ្ឋភៀសសឹក ខណៈក្រសួងកសិកម្ម ក៏បានធ្វើសកម្មភាពនេះរួចផងដែរនៅក្នុងតំបន់ដែលមានពលរដ្ឋភៀសសឹកច្រើន ដូចជា ខេត្តបន្ទាយមានជ័យ ឧត្តរមានជ័យ ខេត្តសៀមរាប និងខេត្តព្រះវិហារជាដើម៕
Account
Security
Favourite Content