បរទេស៖ សហរដ្ឋអាម៉េរិក បានចុះហត្ថលេខាលើកិច្ចព្រមព្រៀងពាណិជ្ជកម្ម និងរ៉ែសំខាន់ៗជាមួយ ៤ប្រទេស នៅអាស៊ីអាគ្នេយ៍ ដើម្បីដោះស្រាយអតុល្យភាពនៃពាណិជ្ជកម្ម និងធ្វើពិពិធកម្មខ្សែសង្វាក់ផ្គត់ផ្គង់។

បណ្តាញផ្សព្វផ្សាយ រ៉យទ័រ បានឱ្យដឹងថា នៅក្នុងកិច្ចប្រជុំកំពូលអាស៊ាននៅទីក្រុងគូឡាឡាំពួ ប្រទេសម៉ាឡេស៊ី កាលពីថ្ងៃអាទិត្យ ទី២៦ ខែតុលា ប្រធានាធិបតីអាម៉េរិក លោក Donald Trump បានចុះហត្ថលេខាលើកិច្ចព្រមព្រៀងពាណិជ្ជកម្មជាមួយសមភាគីម៉ាឡេស៊ី និងកម្ពុជា ក៏ដូចជាកិច្ចព្រមព្រៀងក្របខ័ណ្ឌពាណិជ្ជកម្មដករបាំងនានាជាមួយប្រទេសថៃ។ ក្រោមកិច្ចព្រមព្រៀងនេះ អាម៉េរិកនឹងរក្សាអត្រាពន្ធ ១៩% លើការនាំចូលពីប្រទេសទាំង ៣ ហើយពន្ធលើទំនិញមួយចំនួនត្រូវបានកាត់បន្ថយមកត្រឹមសូន្យផងដែរ។ លើសពីនេះ ទីក្រុងវ៉ាស៊ីនតោនក៏បានប្រកាសពីកិច្ចព្រមព្រៀងក្របខ័ណ្ឌស្រដៀងគ្នានេះជាមួយវៀតណាមផងដែរ ជាមួយនឹងអត្រាពន្ធ ២០% លើការនាំចូលពីប្រទេសនេះ។ ទន្ទឹមនឹងនេះ វៀតណាមបានកត់ត្រាអតិរេកពាណិជ្ជកម្មចំនួន ១២៣ ពាន់លានដុល្លារជាមួយអាម៉េរិកកាលពីឆ្នាំមុន និងប្តេជ្ញាបង្កើនការទិញផលិតផលពីអាម៉េរិក ដើម្បីកាត់បន្ថយគម្លាតពាណិជ្ជកម្មរវាងប្រទេសទាំងពីរ។

មិនត្រឹមតែ​ប៉ុណ្ណោះ លោក Trump បានចុះហត្ថលេខាលើកិច្ចព្រមព្រៀងពីរដាច់ដោយឡែកជាមួយថៃ និងម៉ាឡេស៊ី ដើម្បីស្វែងរកកិច្ចសហប្រតិបត្តិការសម្រាប់ធ្វើពិពិធកម្មខ្សែសង្វាក់ផ្គត់ផ្គង់រ៉ែសំខាន់ៗ ចំពេលដែលមានការរឹតបន្តឹងខ្លាំងពីទីក្រុងប៉េកាំង។ នៅខែតុលានេះដែរ ចិនបានពិភាក្សាជាមួយទីក្រុងគូឡាឡាំពួអំពីការកែច្នៃរ៉ែកម្រ ខណៈដែលម៉ាឡេស៊ីរំពឹងថានឹងចាប់ដៃគូជាមួយក្រុមហ៊ុនចិនដើម្បីសាងសង់រោងចក្រចម្រាញ់ប្រេងនៅក្នុងប្រទេស។

ចិន គឺជាអ្នករុករក និងអ្នកកែច្នៃរ៉ែកម្រដ៏កំពូលរបស់ពិភពលោក ប៉ុន្តែប៉ុន្មានខែកន្លងមកនេះ មហាអំណាចមួយនេះបានរឹតបន្តឹងការនាំចេញ។ បញ្ហានេះកំពុងធ្វើឲ្យក្រុមហ៊ុនផលិតសម្ភារ និងឧបករណ៍ជាច្រើននៅលើសកលលោកចាំបាច់ត្រូវតែរកការផ្គត់ផ្គង់ជំនួសជាបន្ទាន់សម្រាប់សារធាតុរ៉ែសំខាន់ៗ ជាពិសេស ការផលិតបន្ទះឈីប រថយន្តអគ្គិសនី និងសព្វាវុធ។ យ៉ាងណាមិញ នៅថ្ងៃអាទិត្យដដែលនេះ ម៉ាឡេស៊ី បាននិយាយនៅក្នុងសេចក្តីថ្លែងការណ៍មួយថា ខ្លួនបានយល់ព្រមដកការហាមឃាត់លើការនាំចេញសារធាតុរ៉ែសំខាន់ៗទៅកាន់អាម៉េរិក​។ គួរបញ្ជាក់ដែរថា ម៉ាឡេស៊ី មានសារធាតុរ៉េកម្រជាទុនបម្រុងប្រមាណ ១៦,១លានតោន ប៉ុន្តែបានដាក់ការហាមឃាត់នាំចេញវត្ថុធាតុដើមទាំងនេះ ដើម្បីការពារ និងខ្លាចបាត់បង់ធនធានដ៏សំខាន់ ខណៈប្រទេសមួយនេះក៏កំពុងមានផែនការអភិវឌ្ឍន៍នៅក្នុងស្រុក។

សូមជម្រាបថា នៅក្នុងកិច្ចព្រមព្រៀងពាណិជ្ជកម្មជាមួយនឹងលោក Trump ប្រទេសនៅអាស៊ីអាគ្នេយ៍ទាំង ៤ រួមាមាន កម្ពុជា ថៃ ម៉ាឡេស៊ី និងវៀតណាម បានសន្យាដកចេញនូវរបាំងពាណិជ្ជកម្ម និងផ្តល់នូវការអនុគ្រោះដល់ទំនិញផ្សេងៗរបស់អាម៉េរិកមកកាន់ទីផ្សាររបស់ពួកគេឲ្យទូលំទូលាយជាងមុន។ កិច្ចព្រមព្រៀងនេះដែរ ក៏មានបញ្ចូលការធ្វើពាណិជ្ជកម្ម សេវាកម្ម និងការវិនិយោគ បែបឌីជីថល ព្រមទាំងកិច្ចសន្យារការពារសិទ្ធិការងារ និងពង្រឹងការការពារបរិស្ថានផងដែរ ខណៈដែល ថៃ ម៉ាឡេស៊ី និងវៀតណាម បានព្រមព្រៀងទទួលយកយានជំនិះដែលផលិតតាមស្តង់ដារសុវត្ថិភាពយានយន្ត និងការបញ្ចេញឧស្ម័នរបស់អាម៉េរិក៕