សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា បានដឹកនាំសមាជិកសភាពាណិជ្ជកម្មកម្ពុជាជួបប្រជុំជាមួយក្រុមប្រឹក្សាធុរកិច្ចកាណាដា-អាស៊ាន ដឹកនាំដោយ លោក Mr. Wayne Farmer ប្រធានក្រុមប្រឹក្សាធុរកិច្ចកាណាដា-អាស៊ាន (Canada-ASEAN) និងប្រតិភូធុរកិច្ចមកពីប្រទេសកាណាដា នៅព្រឹកថ្ងៃទី ២៦ ខែតុលា ឆ្នាំ២០២៥ ទីក្រុងគូឡាឡាំពួ ប្រទេសម៉ាឡេស៊ី ។
កិច្ចជំនួបនេះត្រូវបានធ្វើឡើងនៅក្នុងឱកាសដែលអ្នកឧកញ៉ាដឹកនាំគណៈប្រតិភូសភាពាណិជ្ជកម្មកម្ពុជា អញ្ជើញអមដំណើរ សម្តេច មហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ចូលរួមកិច្ចប្រជុំកំពូលអាស៊ាន លើកទី៤៧ និងកិច្ចប្រជុំកំពូលពាក់ព័ន្ធ នៅទីក្រុងគួឡាឡាំពួ ប្រទេស ម៉ាឡេស៊ី ចាប់ពីថ្ងៃទី២៥ ដល់ថ្ងៃទី ២៨ ខែតុលា ឆ្នាំ២០២៥។
អ្នកឧកញ៉ា គិត ម៉េង បានថ្លែងថា៖
«ជំនួបរបស់យើងនាពេលនេះ គោលដៅរួមគឺដើម្បីពង្រឹងកិច្ចសហប្រតិបត្តិការដ៏សំខាន់រវាងក្រុមប្រឹក្សាធុរកិច្ចកាណាដា-អាស៊ាន និងសភាពាណិជ្ជកម្មកម្ពុជា ក៏ដូចជាក្រុមប្រឹក្សាធុរកិច្ចកម្ពុជា-អាស៊ាន ដើម្បីជំរុញពាណិជ្ជកម្ម និងការវិនិយោគ ជំរុញ និងបង្កើនល្បឿនពាណិជ្ជកម្មទ្វេភាគីបន្ថែមទៀត»។
អ្នកឧកញ៉ាបានបន្តថា៖ ក្រុមប្រឹក្សាធុរកិច្ចកាណាដា-អាស៊ាន (Canada-ASEAN) មានតួនាទីដ៏សំខាន់ក្នុងការពន្លឿនច្រករបៀងសេដ្ឋកិច្ចកាណាដា-អាស៊ាន ហើយភាពជោគជ័យរបស់ក្រុមហ៊ុនកាណាដានៅក្នុងប្រទេសកម្ពុជាក៏ជាតឹកតាងយ៉ាងសំខាន់សម្រាប់បង្ហាញពីភាពជោគជ័យរបស់ក្រុមហ៊ុនអន្តរជាតិដែលអាចទទួលបានពីទីផ្សារដ៏សកម្មរបស់កម្ពុជា។
ក្នុងជំនួបនោះ អ្នកឧកញ៉ា ក៏បានជម្រាបអំពីឱកាសដ៏សម្បូរបែបដែលប្រទេសកម្ពុជាមានសម្រាប់អ្នកវិនិយោគ ដូចជា ឱកាសសម្រាប់ក្រុមហ៊ុនកាណាដាក្នុងការធ្វើពាណិជ្ជកម្មនៅក្នុងតំបន់អាស៊ានដោយផ្អែកលើទីតាំងយុទ្ធសាស្ដ្រ និងកិច្ចព្រមព្រៀងនានាសម្រាប់ពាណិជ្ជកម្ម។ កម្ពុជា មានការិយាល័យតំណាងសភាពាណិជ្ជកម្ពុជានៅទីក្រុងម៉ុងត្រេអាល់ និងតូរ៉ុនតូនៃប្រទេសកាណាដា ហើយសង្ឃឹមថា ក្រុមប្រឹក្សាធុរកិច្ចកាណាដា-អាស៊ាន (Canada-ASEAN) និងបន្ដកិច្ចសហប្រតិបត្តិការជាមួយការិយាល័យតំណាងសភាពាណិជ្ជកម្មកម្ពុជា។
លោក Mr. Wayne Farmer ប្រធានក្រុមប្រឹក្សាធុរកិច្ចកាណាដា-អាស៊ាន (Canada-ASEAN) បានបញ្ជាក់ពីគោលជំហររបស់ក្រុមប្រឹក្សាធុរកិច្ចកាណាដា-អាស៊ាន ក្នុងការលើកកម្ពស់ទំនាក់ទំនងសេដ្ឋកិច្ចជាមួយកម្ពុជា ដោយមើលឃើញពីសក្តានុពលក្នុងការជំរុញភាពជាដៃគូសេដ្ឋកិច្ចជាមួយគ្នា។
លោកបានបន្ថែមទៀតថា ក្រុមប្រឹក្សាធុរកិច្ចកាណាដា- អាស៊ាន រីករាយ និងបន្តសហការជាមួយការិយាល័យតំណាងសភាពាណិជ្ជកម្មកម្ពុជានៅទីក្រុងម៉ុងត្រេអាល់ និងតូរ៉ុនតូ នៃប្រទេសកាណាដា ដើម្បីបន្ដកិច្ចសហប្រតិបត្តិការនាពេលអនាគត ៕
Account
Security
Favourite Content