ភ្នំពេញ ៖ ជាការពិតណាស់ ក្នុងឆាកជីវិតរបស់ម្នាក់ៗរមែងមានគោលដៅក្នុងការសម្រេចក្តីស្រមៃរបស់ខ្លួន ពិសេសគឺសេរីភាពហិរញ្ញវត្ថុ ប៉ុន្តែគោលដៅទាំងនេះតែងជួបបញ្ហា ដែលជាឧបសគ្គរារាំងមិនអាចឱ្យសម្រេចបាននូគោលដៅហិរញ្ញវត្ថុរបស់មនុស្សម្នាក់ៗ។

ពាក់ព័ន្ធទៅនឹងការសម្រេចឱ្យបាននូវគោលដៅហិរញ្ញវត្ថុលើកនេះ កំពូលមហាសេដ្ឋីដែលមានទុនវិនិយោគខ្ទង់ពាន់លានដុល្លារ អ្នកឧកញ៉ា គិត ម៉េង ដែលមានជំនួញធំៗក្នុងដៃ បានចែករំលែកនូវគន្លឹះសំខាន់ៗមួយចំនួន ដើម្បីជាធាតុចូលបន្ថែមក្នុងការឈានទៅដល់ការសម្រេចគោលដៅហិរញ្ញវត្ថុរបស់មនុស្សម្នាក់ៗ។

អ្នកឧកញ៉ា គិត ម៉េង បានលើកឡើងជាសំនួរថា តើការព្រួយបារម្ភពីស្ថានភាពហិរញ្ញវត្ថុរបស់អ្នករារាំងអ្នកមិនឱ្យសម្រេចគោលដៅរបស់អ្នកមែនទេ? ដល់ពេលដែលអ្នកត្រូវគិតសកម្មភាពរបស់អ្នក ដើម្បីរំដោះខ្លួនពីស្ថានភាពនេះ និងគ្រប់គ្រងអនាគតហិរញ្ញវត្ថុរបស់អ្នក! សូមពិនិត្យមើលឧបសគ្គទូទៅមួយចំនួន ហើយឈ្វេងយល់ថាតើយើងអាចជម្នះវាដោយរបៀបណា?

អ្នកឧកញ៉ា បានបន្តថា សូមចាំថា មិនមែនមានតែអ្នកនោះទេដែលមានការព្រួយបារម្ភផ្នែកហិរញ្ញវត្ថុដែលបង្អាក់អ្នកមិនឲ្យសម្រេចគោលដៅរបស់អ្នក។ អ្វីដែលអ្នកចាំបាច់ធ្វើបំផុតនោះគឺការធ្វើសកម្មភាពដំបូងរបស់អ្នក។ ការធ្វើសកម្មភាពតូចៗជាប្រចាំអាចជួយអ្នកឱ្យយកឈ្នះលើភាពភ័យខ្លាចផ្នែកហិរញ្ញវត្ថុរបស់អ្នក និងត្រួសត្រាយផ្លូវសម្រាប់អនាគតដែលមានសុវត្ថិភាពជាងមុន។

ដើម្បីរំដោះខ្លួនពីស្ថានភាពនេះ និងគ្រប់គ្រងអនាគតហិរញ្ញវត្ថុរបស់អ្នក អ្នកឧកញ៉ាបានលើកឡើងពីចំណុចគន្លឹះសំខាន់ៗមានដូចខាងក្រោម ៖

១.ដោះស្រាយវិបត្តិបំណុល៖ បំណុលគឺជាបញ្ហាប្រឈមទូទៅ ហើយពេលខ្លះ បំណុលអាចកើនឡើងយ៉ាងឆាប់រហ័ស។ សកម្មភាពដំបូងគឺត្រូវទប់ទល់បំណុល ដែលជាគន្លឹះសំខាន់។ សូមរៀបចំផែនការដើម្បីសងវាបន្តិចម្តងៗ កាត់បន្ថយការចំណាយដែលមិនចាំបាច់ ហើយគិតអំពីការបញ្ចូលគ្នានូវបំណុលដែលមានការប្រាក់ខ្ពស់។

២.រៀនពីរបៀបរៀបចំថវិកា៖ ការសិក្សាពីការទុកដាក់ថវិកាមិនសាំញ៉ាំនោះទេ។ អ្នកអាចតាមដានការចំណាយរបស់អ្នក កំណត់ការចំណាយ និងកំណត់អាទិភាពនៃការសន្សំ។ សូមគិតថា វាដូចជាការរៀបចំផែនការសម្រាប់ការដើរលេងសប្បាយមួយដែរ អ្នកសម្រេចចិត្តថាត្រូវចំណាយប៉ុន្មានលើសកម្មភាពនីមួយៗ។

៣.យកឈ្នះភាពភ័យខ្លាចក្នុងការវិនិយោគ៖ យើងខ្លាចការវិនិយោគលើអ្វីដែលយើងមិនមានចំណេះដឹងច្រើន ចំណែកអ្នកដទៃក៏មានបញ្ហានេះដែរ។ ប៉ុន្តែ ការមិនវិនិយោគអាចមានន័យថាបាត់បង់កំណើនចំណូលមួយដ៏ធំ។ សូមចាប់ផ្តើមពីតូច រៀនធ្វើវិនិយោគផ្សេងៗ ហើយពិចារណានិយាយជាមួយអ្នកជំនាញដើម្បីទទួលបានការណែនាំ។

៤.រៀបចំថវិកាក្នុងគ្រាអាសន្ន៖ ការចំណាយដែលយើងមិនបានគិតទុក អាចបង្កឲ្យមានការភ័យស្លន់ស្លោ។ ការបង្កើតប្រាក់សង្គ្រោះបន្ទាន់អាចជួយអ្នកបាន។ សូមរក្សាប្រាក់មួយឡែកពីប្រាក់បៀវត្សនីមួយៗទៅក្នុងគណនីសន្សំដាច់ដោយឡែក។ ថវិកានេះប្រៀបដូចជាសំណាញ់សុវត្ថិភាពរបស់អ្នកសម្រាប់ស្ថានភាពដែលអ្នកមើលមិនឃើញមុន។

៥.រៀបចំផែនការសម្រាប់ចូលនិវត្តន៍៖ អ្នកអាចគិតថា ការចូលនិវត្តន៍នៅវែងឆ្ងាយទៀត ប៉ុន្តែវាជារឿងសំខាន់ក្នុងការរៀបចំផែនការឱ្យបានឆាប់។ សូមចាប់ផ្តើមសន្សំពីឥឡូវនេះ ពិចារណាលើជម្រើសចូលនិវត្តន៍ ហើយស្រមៃមើលសេរីភាពក្នុងការធ្វើអ្វីដែលអ្នកស្រទ្បាញ់ នៅពេលអ្នកចូលនិវត្តន៍។

៦.សូមសិក្សា និងស្វែងយល់ពីរបៀបដែលទីផ្សារភាគហ៊ុនដំណើរការ និងចាប់ផ្តើមទិញភាគហ៊ុនរបស់ក្រុមហ៊ុនដែលអ្នកមានទំនុកចិត្ត។ សូមស្រមៃថា ការវិនិយោគនៅក្នុងក្រុមហ៊ុនក្នុងស្រុកដែលអ្នកជឿទុកចិត្ត ដូចជាការគាំទ្រភោជនីយដ្ឋាន ឬហាងដែលអ្នកចូលចិត្ត។ អ្នកក៏អាចឈ្វេងយល់ការវិនិយោគនៅក្នុងផ្សារហ៊ុនផងដែរ។ ឥឡូវនេះ ក្រុមហ៊ុន សែលកាត របស់ រ៉ូយ៉ាល់គ្រុប ត្រូវបានចុះបញ្ជីនៅក្នុងទីផ្សារភាគហ៊ុនកម្ពុជា។ សូមសិក្សា និងស្វែងយល់ពីរបៀបដែលទីផ្សារភាគហ៊ុនដំណើរការ និងចាប់ផ្តើមទិញភាគហ៊ុនរបស់ក្រុមហ៊ុនដែលអ្នកមានទំនុកចិត្ត។ ជម្រើសមួយទៀតគឺទទួលបានការប្រាក់ពីប្រាក់សន្សំរបស់អ្នក។ គណនីសន្សំរបស់ធនាគារ វីង កំពុងផ្តល់ការប្រាក់៣% និងគណនីមានកាលកំណត់រហូតដល់៨% ប្រចាំឆ្នាំដែលអ្នកអាចដាក់បញ្ចូលទៅក្នុងការវិនិយោគរបស់អ្នក៕