សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្រុមហ៊ុនដ៏ធំក្នុងស្រុកចំនួន២ ដែលបង្កើតឡើងដោយកូនខ្មែរ និងបានដំណើរការប្រមាណជិត៣០ឆ្នាំរួចមកហើយនោះ បាន និងកំពុងនាំយកផលិតផលទៅកាន់ទីផ្សារអន្តរជាតិយ៉ាងសកម្មដែលមានគោលដៅអ្នកប្រើប្រាស់មិនតិចជាង៥០០លាននាក់នោះទេ។
ឧកញ៉ា វេជ្ជបណ្ឌិត ហៃ លីអ៊ាង ស្ថាបនិក និងជាអគ្គនាយកក្រុមហ៊ុនទាំង២ បានបង្ហាញប្រាប់ឱ្យដឹងថា ក្រុមហ៊ុនដែលកំពុងផលិត និងនាំយកផលិតទៅផ្គត់ផ្គង់ទីផ្សារក្រៅប្រទេសនេះ ទី១ ក្រុមហ៊ុន ប៉េប៉េអឹម ហ្វាម៉ា បានដំណើរការ៣០ឆ្នាំ ហើយក្រុមហ៊ុនទី២ មានឈ្មោះ ខនហ្វីរេល ដែលបានដំណើរការ ២៥ឆ្នាំ ហើយ។ បច្ចុប្បន្ន ខ្សែច្រវាក់ផលិតកម្មរបស់ក្រុមហ៊នទាំង២ នៅរាជធានីភ្នំពេញ គ្របដណ្ដប់លើផ្ទៃដី ៣ ៥០០ ម៉ែត្រការ៉េ និងផ្តល់ការងារដល់បុគ្គលិកជាង ៥០០ នាក់ ដោយផលិតឱសថ និងអាហារវេចខ្ចប់សម្រាប់ផ្គត់ផ្គង់ទាំងទីផ្សារក្នុងស្រុក និងអន្តរជាតិ។
ឧកញ៉ា វេជ្ជបណ្ឌិត ហៃ លីអ៊ាង បានលើកឡើងថា បច្ចុប្បន្ននេះ ក្រុមហ៊ុនកំពុងនាំចេញផលិតផលទៅកាន់ទីផ្សារដែលមានអ្នកប្រើប្រាស់សរុបជាង ៥០០ លាននាក់ រួមមានទាំងសហរដ្ឋ អាម៉េរិក សហភាពអឺរ៉ុប កាណាដា និងទីផ្សារអាស៊ី ខណៈដែលផលិតផលឱសថរបស់ក្រុមហ៊ុន ប៉េប៉េអឹម ហ្វាម៉ា ប្រមាណ ៥០ ភាគរយ ត្រូវបាននាំចេញ។ ដោយឡែក ក្រុមហ៊ុន ខនហ្វីរេល ជាក្រុមហ៊ុនក្នុងស្រុកឈានមុខមួយ ដែលផលិតទំនិញពីកសិផលចម្រុះ ដូចជា ត្នោត ម្រេច ស្វាយ គ្រាប់ស្វាយចន្ទី និងត្រី ទៅជាផលិតផលអាហារ គ្រឿងទេស ភេសជ្ជៈ និងស្រាជាដើម ហើយផលិតផលរបស់ក្រុមហ៊ុនមួយចំនួនត្រូវបានចុះបញ្ជីវិញ្ញាបនបត្រតក្កកម្ម។
លោកឧកញ៉ាអគ្គនាយកក្រុមហ៊ុនបានបញ្ជាក់ថា ៖
«បេសកកម្មរបស់ក្រុមហ៊ុនជាសក្ខីភាពបញ្ជាក់ថា “ខ្មែរធ្វើបាន” ដោយកែច្នៃកសិផល ដែលពីមុនគេមិនសូវឱ្យតម្លៃ ដូចជាត្នោត ឱ្យទៅជាផលិតផលមានគុណភាពខ្ពស់ និងមានការទទួលស្គាល់ទូទាំងពិភពលោក។ ក្រុមហ៊ុនក៏មានផែនការពង្រីកផលិតផលធ្វើពីស្វាយចំនួន ៥០០ តោន ក្នុងឆ្នាំ២០២៦ នេះ ដោយប្រើវិធីសាស្ត្រផលិតកម្មចក្រា ហើយកំពុងរៀបចំពង្រីកបណ្តាញលក់ ដែលក្នុងនោះគោលដៅសម្រាប់ប្រទេសជប៉ុនគឺចំនួន ៤០០ ទីតាំងនៅក្នុងឆ្នាំ២០២៦»។
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងឱកាសចុះទស្សនកិច្ចខ្សែច្រវាក់ផលិតកមុ្មរបស់ក្រុមហ៊ុន ប៉េប៉េអឹម ហ្វាម៉ា និង ខនហ្វីរេល កាលពីថ្ងៃទី១៩ ខែកុម្ភៈ ឆ្នាំ២០២៦ បានកោតសរសើរក្រុមហ៊ុនដែលបានលើកតម្កើងកេរ្តិ៍ឈ្មោះផលិតផលកម្ពុជាលើទីផ្សារអន្តរជាតិ និងបានរួមចំណែកដល់ការធ្វើទំនើបកម្មឧស្សាហកម្មរបស់កម្ពុជា តាមរយៈការផលិតទំនិញដែលផ្តល់តម្លៃបន្ថែមខ្ពស់។
ឯកឧត្តមបានលើកទឹកចិត្តឱ្យក្រុមហ៊ុនចែករំលែកភាពជោគជ័យរបស់ខ្លួនជាមួយធុរកិច្ចថ្មី និងសហគ្រាសធុនតូច និងមធ្យមផ្សេងទៀត ដើម្បីពង្រឹងខ្សែច្រវាក់ផ្គត់ផ្គង់ក្នុងស្រុក និងពង្រីកសក្តានុពលដោយចាប់យកបច្ចេកវិទ្យា និងគ្រឿងម៉ាស៊ីនថ្មីៗ ការលើកកម្ពស់ផលិតភាព និងកិច្ចសហការកាន់តែរឹងមាំ។
ឯកឧត្តមរដ្ឋមន្ត្រីបានលើកឡើងថា ៖
«ក្រសួងបានត្រៀមខ្លួនរួចជាស្រេចក្នុងកិច្ចសហការ និងគាំទ្រក្រុមហ៊ុនលើការងារសំខាន់ៗ ដូចជា ការចុះបញ្ជីផលិតផល ការវាយតម្លៃទទួលស្គាល់មន្ទីរពិសោធន៍ និងការអភិវឌ្ឍស្តង់ដា រួមទាំងការស្រាវជ្រាវ និងអភិវឌ្ឍន៍រួមគ្នារវាងក្រុមហ៊ុន សាកលវិទ្យាល័យ និងវិទ្យាស្ថានជាតិវិទ្យាសាស្ត្រ បច្ចេកវិទ្យា និងនវានុវត្តន៍»។
នៅក្នុងឱកាសជាមួយគ្នានេះដែរ ឯកឧត្តមក៏បានអញ្ជើញក្រុមហ៊ុនឱ្យចូលរួមបង្ហាញនវានុវត្តន៍របស់ខ្លួននៅក្នុងទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ លើកទី៤ ដែលគ្រោងនឹងប្រារព្ធឡើងចាប់ពីថ្ងៃទី២៦ ដល់ទី២៨ ខែមីនា ឆ្នាំ២០២៦ខាងមុខនេះផងដែរ៕
Account
Security
Favourite Content