ភ្នំពេញ ៖ សម្រាប់បងប្អូនប្រជាកសិករដែលមានដីស្រែ ចំការ ឬដីភូមិទំនេរមិនទាន់ដឹងពីប្រភេទដំណាំដែលគួរដាំដុះ ឬក៏មានដីទើបតែប្រមូលហើយ អាចងាកមកមើលពីចំណុចសំខាន់ៗមួយចំនួនក្នុងការជ្រើសរើសមុខដំណាំសម្រាប់ដាំក្នុងរដូវនេះនាដើមឆ្នាំ២០២៣ ដែលអាចទទួលបានទិន្នផលល្អ លក់បានតម្លៃថ្លៃ និងប្រកបដោយប្រសិទ្ធភាព។ 

ពាក់ព័ន្ធនឹងការជ្រើសរើសមុខដំណាំសម្រាប់ដាំ លោក ណល់ រតនា អតីតនិស្សិតកម្មសិក្សាអន្តរជាតិជំនាញកសិកម្ម ចំណីអាហារ និងអាហារូបត្ថម្ភបានមានប្រសាសន៍ថា សម្រាប់រដូវកាលនេះ កសិករអាចចាប់ផ្ដើមដាំដំណាំបានផ្សេងៗបានអាស្រ័យទៅតាមស្ថានភាពដី តាមតំបន់ និងតាមកត្តាអាកាសធាតុ។

លោកបញ្ជាក់ថា ៖

“ជារួមទៅ រដូវនេះជារដូវរំហើយ និងមានភ្លៀងកក់ខែតិចតួច សម្រាប់ការជ្រើសរើសមុខដំណាំអាស្រ័យទៅតាមប្រភេទដំណាំ និងស្ថានភាពតំបន់ ដូចជាតំបន់ភ្នំ ខ្ពង់រាប ទំនាបកណ្ដាលជាដើម ដោយនៅតាមតំបន់ខ្ពង់រាបបងប្អូនកសិករដែលច្រូតកាត់រួចរាល់អាចដាំដំណាំបន្ទាប់បន្សំបានដូចជាឪឡឹក ឬក៏ធ្វើទ្រើងដាំសណ្ដែកគួរជាដើម”

លោកបន្ថែមថា ដោយឡែកខេត្តនៅតាមដងទន្លេនារដូវនេះ ទឹកអាចស្រកទៅវិញខ្លះហើយ ដែលកសិករក៏អាចបង្កបង្កើនផលបានបណ្ដើរៗ ដូចជាដាំដំណាំស្លឹក ឬក៏ប្រភេទដំណាំណាដែលដាំក្នុងរយៈពេលខ្លីដូចជា ពោត ដំឡូង សណ្ដែកដី ដែលអាចប្រមូលផលលឿនចៀសវាងប៉ះពាល់ដោយសារការប្រែប្រួលអាកាសធាតុ និងទឹកជំនន់។ ចំណែកតំបន់ភ្នំវិញ គេអាចដាំដំណាំឈើហូបផ្លែ ដែលត្រូវការទឹកតិចតួច និងត្រូវការដីមានជីជាតិខ្ពស់ ហើយត្រូវការដាំរយៈពេលយូរថែមទៀតផង។

អ្នកជំនាញកសិកម្មខាងលើបន្តទៀតថា កសិករនាពេលបច្ចុប្បន្នក៏មានការយល់ដឹងខ្លះដែរទាក់ទងនឹងការដាំដំណាំយុទ្ធសាស្ត្រ និងដំណាំបន្ទាប់បន្សំ។ សម្រាប់ដំណាំយុទ្ធសាស្ត្រ គឺគេមានការកំណត់រដូវកាលច្បាស់លាស់ និងត្រូវបានសិក្សាទៅលើសង្វាក់ផលិតកម្មរួចរាល់ហើយ ដូចជា ស្វាយកែវរមៀត ចេកអំបូងលឿង ដែលជាដំណាំអាចលក់ក្នុងស្រុកតាមបណ្ដាផ្សារទំនើបផង និងនាំចេញផង។

ចំពោះដំណាំបន្ទាប់បន្សំវិញ គឺសំដៅលើប្រភេទដំណាំផ្សេងៗដូចជា ស្រូវ ដំណាំហូបផ្លែ បន្លែជាដើម ដែលកសិករអាចអនុវត្តបានលែងមានរដូវហើយ មានន័យថាកសិករមានការយល់ដឹងច្រើនទៅលើការអភិវឌ្ឍបច្ចេកទេសដាំដុះ ដូចជា ដំណាំក្នុងផ្ទះសំណាញ់ដែលបងប្អូនយើងអាចដាំបានវិលជុំពេញមួយឆ្នាំតែម្ដង។

សម្រាប់ការដាំដំណាំប្រភេទណាក៏ដោយ គេត្រូវការការយកចិត្តទុកដាក់ ថែទាំ និងគ្រប់គ្រងដំណាំដែលបានដាំដូចជា ការត្រួតពិនិត្យលើកត្តាចង្រៃផ្សេងៗ ការថែទាំដាក់ជីបានទៀងទាត់ ជាពិសេសគឺការជ្រើសរើសពូជសុទ្ធ និងមានប្រភទច្បាស់លាស់យកមកដាំទើបទទួលបានផលល្អ និងមានហានិភ័យតិចតួច៕