សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ប្រាក់ចំណូលពីវិស័យជលផលនៅក្នុងឆ្នាំ២០២៣មានចំនួន ៨២៨ ៤០៨ ៦៨៤រៀល កើនលើសឆ្នាំមុនចំនួន ២០៥ ០២៥ ៦៨១រៀល ស្មើនឹង ២២៣,៥៩ភាគរយ ។នេះបើយោងតាមរបាយការណ៍វិស័យជលផលប្រចាំឆ្នាំ២០២៣ នាថ្ងៃទី០៩ ខែមករាឆ្នាំ២០២៤។
ទាក់ទងនឹងផលនសាទ និងផលវារីវប្បកម្ម អនុវត្តបាន៨៦៦ ២៥០តោន កើនលើសឆ្នាំមុន៤ ០៥០តោន ស្មើ០,៤៧% ដែលក្នុងនោះរួមមាន៖ ផលនេសាទទឹកសាបចំនួន៤២៦ ៧៥០តោន កើនឡើង២០ ៣៥០តោន ស្មើ៥,០១%, ផលនេសាទសមុទ្រ១២៥ ៥០០តោន កើនឡើង៣០០តោនស្មើ០,២៤% និងផលវារីវប្បកម្មចំនួន៣១៤ ០០០តោន ថយចុះ១៦ ៦០០តោន ស្មើ៥,០២%។
ពាក់ព័ន្ធនឹងបញ្ហាប្រឈម របាយការណ៍បានបង្ហាញថា ការគ្រប់គ្រងធនធានជលផលនៅមានបញ្ហាប្រឈមមួយចំនួន ដូចជា ការធ្វើនេសាទខុសច្បាប់ ការរំលោភទន្ទ្រានកាន់កាប់ដីព្រៃលិចទឹក និងព្រៃកោងកាង ការការពារកន្លែងអភិរក្សជលផល និងការចូលរួមរបស់សហគមន៍នេសាទនៅមានកម្រិត។ ចំណែកការធ្វើវារីវប្បកម្មចំណាយដើមខ្ពស់ ជាហេតុនាំឱ្យពិបាកប្រកួតប្រជែងទីផ្សារ រួមទាំងកង្វះហេដ្ឋារចនាសម្ព័ន្ធ ក្រោយពេលប្រមូលផល សម្រាប់គាំទ្រដល់ការរក្សាគុណភាពនិងការអនុវត្តអនាម័យល្អ។
ទន្ទឹមនឹងនេះ ទិសដៅសម្រាប់ឆ្នាំ២០២៤ រដ្ឋបាលជលផលមានគោលដៅសម្រេចឱ្យបានផលនេសាទទឹកសាប ៤៥៤ ០០០តោន, សមុទ្រ ១៣០ ០០០តោន, វារីវប្បកម្ម៣៥០ ០០០តោន, កូនត្រីពូជ ៣០០លានក្បាល, កូនក្រពើ ៣០ម៉ឺនក្បាល ការកែច្នៃ ៧០ ០០០តោន, ទឹកត្រី ៥០លានលីត្រ និងការនាំចេញផល ផលិតផលជលផល ៨ ០០០តោន។
កញ្ញា អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម បានឱ្យដឹងថា៖ ដើម្បីសម្រេចគោលដៅនេះ រដ្ឋបាលជលផលបានកំណត់ទិសដៅអនុវត្តសកម្មភាពមួយចំនួន មានដូចជា បន្តការអនុវត្តច្បាប់ ដោយសហការទប់ស្កាត់ និងបង្ក្រាបបទល្មើសជលផលគ្រប់ប្រភេទ, បន្តការគ្រប់គ្រង ការពារកន្លែងអភិរក្សជលផលនិងលែងកូនត្រីពូជ និងប្រភេទត្រីកំពុងរងគ្រោះថ្នាក់ក្នុងដែនទឹកធម្មជាតិ ដើម្បីបង្កើនផលស្តុក,ជំរុញការអភិវឌ្ឍវារីវប្បកម្មតាមគ្រប់រូបភាពសម្រាប់ផ្គត់ផ្គង់តម្រូវការទីផ្សារនិងកាត់បន្ថយការនាំចូល ជំរុញការបង្កើតបណ្ដុំវារីវប្បករ ដើម្បីងាយស្រួលក្នុងការផ្ដល់បច្ចេក ទេសនិងរកទីផ្សារជំរុញការអភិវឌ្ឍខ្សែច្រវាក់តម្លៃជលផលនិងពង្រឹងសមត្ថកិច្ចក្នុងការត្រួតពិនិត្យ និងវិភាគគុណភាពសុវត្ថិភាពផល ផលិតផលជលផល, ជំរុញនិងលើកទឹកចិត្តផ្តល់បច្ចេកទេសក្នុងការអនុវត្តវារីវប្បកម្មល្អផលិតកម្មល្អ ការអនុវត្តអនាម័យល្អ និងពង្រឹងសមត្ថភាពសហគមន៍នេសាទឱ្យមានភាពជាម្ចាស់ក្នុងការគ្រប់គ្រងធនធានជលផលឱ្យមានប្រសិទ្ធភាព និងនិរន្តរភាព។
លើសពីនេះទៀត រដ្ឋបាលជលផលនឹងបន្តសហប្រតិបត្តិការជាមួយដៃគូអភិវឌ្ឍន៍នានា ដើម្បីគ្រប់គ្រង អភិរក្ស និងអភិវឌ្ឍន៍វិស័យជលផល បង្កើនការសិក្សាស្រាវជ្រាវបច្ចេកទេសនិងវិទ្យាសាស្រ្តជលផលទឹកសាប និងសមុទ ពង្រឹងការផ្តល់សេវាសាធារណៈប្រកបដោយប្រសិទ្ធភាព៕
Account
Security
Favourite Content