ផ្ដៅ ជាប្រភេទវល្លិ៍ម្យ៉ាងដែលគេអាចកាច់ ពត់ ច្នៃឱ្យទៅជារបស់ប្រើប្រាស់ច្រើនប្រភេទ ក៏ដូចជាគ្រឿងសង្ហារឹមផងដែរ ដូចជា តុ ទូរ កៅអី និងសម្ភារប្រើប្រាស់ផ្សេងៗទៀត។ ជាក់ស្ដែង បច្ចុប្បន្ននេះ មានសិប្បកម្មផលិតគ្រឿងសង្ហារឹមពីវល្លិ៍ផ្ដៅជាច្រើនកំពុងមានដំណើរការសង្វាក់ផលិតកម្មរបស់ខ្លួន ក្នុងនោះក៏មានសិប្បកម្មសហគមន៍មួយកន្លែងស្ថិតនៅភូមិចំការកៅស៊ូ ឃុំជើងគោ ស្រុកព្រៃនប់ ខេត្តព្រះសីហនុ កំពុងមានភាពមមាញឹកក្នុងការផលិតដើម្បីបំពេញតម្រូវការទីផ្សារ។

អ្នកស្រី ដួង ម៉ានី ជាម្ចាស់សិប្បកម្មផលិតគ្រឿងសង្ហារឹមពីផ្ដៅមួយកន្លែងដែលមានទីតាំងដូចបានរៀបរាប់ខាងលើនេះបានមានប្រសាសន៍ប្រាប់ឱ្យដឹងថា សិប្បកម្មរបស់អ្នកស្រីបានបង្កើតឡើងជាច្រើនឆ្នាំមកហើយ តែរហូតមកដល់ពេលបច្ចុប្បន្ននេះក៏នៅតែបន្តមានទីផ្សារ និងមានការគាំទ្រពីអតិថិជនជាបន្តបន្ទាប់។

អ្នកស្រីបន្តថា  ៖

“នៅក្នុងសិប្បកម្មរបស់យើងមានផលិតសម្ភារ និងគ្រឿងសង្ហារឹមជាច្រើនប្រភេទដែលធ្វើពីផ្ដៅដូចជា តុ ទូរ កៅអី គ្រែ សាឡុងជាដើម ពោលគឺអាចច្នៃផលិតផលពីផ្ដៅសុទ្ធគ្រប់រូបរាង គ្រប់ទំហំតាមការកម្ម៉ង់របស់អតិថិជន។ ចំណែក ផលិតផលដែលលក់ដាច់ជាងគេគឺប្រភេទកៅអីអង្គុយទទួលទានអាហារ និងកៅអីបារសម្រាប់ភ្ញៀវនៅតាមអាហារដ្ឋានបែបបរទេសផងដែរ។”

ដោយឡែក ពាក់ព័ន្ធទៅនឹងតម្លៃវិញ ផលិតផលផ្តៅរបស់សិប្បកម្មមួយនេះអាចលក់បានចាប់ពី ២ម៉ឺនរៀលឡើងទៅអាស្រ័យទៅតាមទំហំ រូបរាង និងម៉ូដរបស់សម្ភារផ្ទាល់តែម្ដង ហើយការផលិតទៀតសោតក៏ត្រូវចំណាយពេលតិច ឬច្រើនអាស្រ័យទៅតាមរូបរាងរបស់ផលិតផល។

អ្នកស្រីបញ្ជាក់ដែរថា ៖

“សិប្បកម្មយើងចាប់ផ្ដើមតាំងពីឆ្នាំ២០០២ ដោយសារតែគ្រួសារខ្ញុំជាអ្នកផលិតសម្ភារនេះស្រាប់ ណាមួយខ្ញុំមានចិត្តស្រឡាញ់ និងចូលចិត្តការកែច្នៃសម្ភារផង ទើបបន្តរក្សាអាជីពនេះបន្តពីគ្រួសារ ហើយខិតខំអភិវឌ្ឍបន្ថែមទៀតដើម្បីផ្គត់ផ្គង់តម្រូវការក្នុងស្រុក និងធ្វើយ៉ាងណាឱ្យបរទេសបានឃើញពីស្នាដៃកូនខ្មែរផងដែរ។ ម៉្យាងវិញទៀត តាមរយៈសិប្បកម្មដ៏ចំណាស់មួយនេះ ក៏បានចូលរួមចំណែកផ្តល់នូវការងារជូនដល់ប្រជាក្នុងសហគមន៍ ដែលអាចឱ្យពួកគាត់ទទួលបានចំណូលប្រចាំថ្ងៃ ប្រចាំខែ សម្រាប់ផ្គត់ផ្គង់ជីវភាពគ្រួសារផងដែរ។” 

ជាមួយនឹងការបង្ហើបប្រាប់ឱ្យដឹងត្រួសៗពីសិប្បកម្មផ្តៅខាងលើនេះ អ្នកស្រី ដួង ម៉ានី ក៏បានប្រាប់ពីបញ្ហាប្រឈម និងផលលំបាកនៅក្នុងដំណើរការសិប្បកម្មមួយនេះផងដែរ ជាពិសេសបញ្ហាដើមទុនដែលត្រូវអភិវឌ្ឍជំនាញក្នុងសិប្បកម្ម ណាមួយផ្នែកបច្ចេកទេសក្នុងការផលិតក៏នៅមានកម្រិតនៅឡើយ។ ដោយឡែក សម្រាប់គម្រោងនាពេលអនាគត អ្នកស្រី មានក្ដីរំពឹងដែរថានឹងបន្តអភិវឌ្ឍជំនាញនេះ និងកែច្នៃនូវផលិតផលថ្មីបន្ថែមទៀតដើម្បីផ្គត់ផ្គង់តម្រូវការទីផ្សារផង អភិវឌ្ឍផ្នែកសិប្បកម្មក្នុងស្រុកផង និងជាផ្នែកមួយជួយដល់ជីវភាពក្នុងសហគមន៍ ផងដែរ៕