សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងឱកាសទិវានៃសេចក្តីស្រឡាញ់ ឬគេនិយមហៅថា Valentine’s Day នេះ តាមទម្លាប់គេតែងតែទិញអំណោយជូនមនុស្សជាទីស្រឡាញ់របស់ខ្លួន មិនថាគូស្នេហ៍ ស្វាមីភរិយា ឬក្រុមគ្រួសារ ហើយអំណោយដែលគេតែងតែទិញមិនអាចខានបាននោះគឺ ផ្កា ដែលជាផ្នែកមួយជួយឱ្យអាជីវកម្មលក់ផ្កានានាហាក់មានតម្រូវការខ្ពស់គួរឱ្យកត់សម្គាល់។
ចំពោះទិវានៃក្ដីស្រឡាញ់ គេឃើញមានអ្នកលក់ផ្កាជាច្រើននៅតាមហាង តាមផ្សារ ឬតាមដងវិធីធំៗ មានភាពមមាញឹកក្នុងការរៀបចំដាក់តាំង និងលក់ឱ្យអតិថិជនមិនថាចាស់ក្មេង ឬយុវវ័យដែលនិយមទិញជាបាច់ផ្កា ឬផ្កាកុលាបស្រស់មួយទងៗជូនមិត្តភក្ដិក៏មាន ព្រោះវាមានតម្លៃសមរម្យអាចទិញបាន។ មួយវិញទៀត នៅតាមកន្លែងលក់ខ្លះក៏មានរៀបចំជាឈុតផ្កា ដែលបន្ថែមនូវសូកូឡា តុក្កតា ឬប៉ោងៗមកជាមួយដែលកាន់តែទាក់ទាញ និងបង្កើនភាពផ្អែមល្អែម។
ក្រៅពីផ្កាកុលាបស្រស់ នៅតាមហាងផ្កាផ្សេងទៀតដែលមានកែច្នៃផ្កា ដូចជាផ្កាសំបកពោត ក៏កំពុងញាប់ដៃញាប់ជើងក្នុងការទទួលកម្ម៉ង់ជាបាច់ផ្កាដ៏ស្រស់ស្អាត ទាក់ចិត្តអតិថិជនគ្រប់ៗគ្នា។ មិនត្រឹមតែប៉ុណ្ណោះ គេក៏មានដាក់លក់រាយនូវផ្កាជាទងៗបន្ថែមទៀតដើម្បីផ្ដល់ភាពងាយស្រួលដល់អតិថិជនដែលអាចមានជម្រើសច្រើន ទាំងការទិញដោយកម្ម៉ង់ទុកជាមុន ក៏ដូចជាទៅទិញដោយផ្ទាល់ ។
បន្ថែមពីលើនេះ សម្រាប់អ្នកដែលមានធនធានច្រើនគេក៏កម្ម៉ង់ ឬបញ្ជាទិញជាប្រភេទបាច់ផ្កាដែលធ្វើពីក្រដាសប្រាក់តែម្ដង ក្រោមការច្នៃប្រឌិតក្បូរក្បាច់តាមដែលអាចធ្វើទៅបានដូចជា ការបត់ ឬមូ ក្រដាសប្រាក់ឱ្យទៅជារាងប្លែកៗ រួចដាក់ផ្គុំគ្នាជាបាច់ផ្កាលុយរៀល ឬលុយដុល្លារដ៏ស្រស់ស្អាត និងមានតម្លៃសម្រាប់ជូនដល់មនុស្សជាទីស្រឡាញ់របស់ខ្លួនក្នុងថ្ងៃដ៏ពិសេសមួយនេះ។
ជារួមមមក នៅតាមហាងផ្កានានា មិនថាហាងផ្កាស្រស់ ផ្កាពោត ឬផ្កាលុយរៀលនោះទេ សុទ្ធសឹងតែទទួលបានការកម្ម៉ង់ច្រើនពីសំណាក់អតិថិជនរបស់ខ្លួន ដែលជាឱកាសលក់បានច្រើនជាងថ្ងៃធម្មតា ដែលម្ចាស់អាជីវកម្មហាងផ្កាខ្លះអាចលក់បានចំណូលរាប់ពាន់ដុល្លារសម្រាប់តែថ្ងៃមួយនេះប៉ុណ្ណោះ៕
Account
Security
Favourite Content