បណ្ដាញសង្គម ដែលសម្ដៅទៅលើ facebook គឺជាកន្លែងមួយដែលមានការចែករំលែកជាច្រើនដោយមិនថាជាព័ត៌មាន វីដេអូ ការលក់ដូរផលិតផល ក៏ដូចជាចំណេះដឹងផ្សេងៗយ៉ាងទូលាយ។ ក្នុងនោះក្រៅពីការកម្សាន្ត បណ្ដាញសង្គមក៏ជាវេទិកាមួយដែលកសិករអាចស្វែងរកវីដេអូក៏ដូចជាឯកសារកសិកម្មផ្សេងៗបានយ៉ាងងាយស្រួល និងច្រើនបែបច្រើនយ៉ាង។

លោក នី ប៊ុនថា មានទីលំនៅស្រុកស្រែអំបិល ខេត្តកោះកុង និងជាស្ថាបនិក «រៀនដាំ» ដែលជាអ្នកកសិកម្ម និងមានចំណូលចិត្តធ្វើវីដេអូផ្តល់ចំណេះដឹងកសិកម្មផងដែរនោះ បានមានប្រសាសន៍ថា បណ្ដាញសង្គមពិតជាសំខាន់ណាស់សម្រាប់កសិករដែលគាត់អាចទាញយកឯកសារក៏ដូចជាវីដេអូកសិករដែលមានប្រយោជន៍ឥតដែនកំណត់។

លោកបញ្ជាក់ថា ៖

“បណ្ដាញសង្គមពិតជាសំខាន់ ដោយសារសម័យនេះជាសម័យបច្ចេកវិទ្យា មិនថាចំពោះអ្នកធ្វើកសិកម្មក៏ដោយ គឺលែងពិបាកដូចមុនទៀតហើយដែលត្រូវចូលសាលារៀនគ្រប់ម៉ោងគ្រប់ពេលទើបអាចទទួលបានចំណេះដឹងនោះទេ យើងអាចស្រាវជ្រាវដោយខ្លួនឯងតាមបណ្ដាញសង្គម ដែលយើងអាចទទួលបានចំណេះដឹងទាំងអស់នោះគ្រប់ម៉ោងគ្រប់ពេល និងមានច្រើនបែបច្រើនទម្រង់ឥតដែនកំណត់”

លោកបន្ថែមថា ៖

“ចំពោះប្រភពចែករំលែកវីដេអូដែលធំក៏ដូចជាមានប្រជាប្រិយភាពបច្ចុប្បន្នគឺ ហ្វេសប៊ុក និងយូធូប ដែលមានអ្នកធ្វើ និងចែករំលែកមាតិកាច្រើនសន្ធឹកសន្ធាប់ មិនថាអ្នកបង្កើតមាតិកា ចែករំលែកបទពិសោធផ្ទាល់ក៏ដូចជាស្ថាប័ន និងក្រសួងនានាថែមទៀតផង។ ក្រៅពីនេះ សម្រាប់អ្នកដែលចេះលេងបណ្ដាញសង្គមល្មមៗអាចមើលជាភាសាខ្មែរ ខ្មែរយើងអ្នកចែករំលែក ឯបងប្អូនដែលចេះភាសាអាចមើលបានដល់ទៅវីដេអូបរទេសដែលមានបច្ចេកវិទ្យាជឿនលឿនជាងយើង”

ទាក់ទងទៅនឹងប្រភពនៃវីដេអូឬក៏ឯកសារវិញ អ្នកជំនាញខាងលើបន្តទៀតថា ៖

“យើងមិនអាចកំណត់ថាត្រូវទៅយកពីផេកនេះ ឬក៏គេហទំព័រណាមួយបាននោះទេ ដោយសារប្រភពនៃអ្នកចែករំលែកមានច្រើនលើសលប់ និងច្រើនបែបច្រើនទម្រង់អស្រ័យទៅលើតម្រូវការរបស់យើងថាតើយើងចង់បានចំណេះដឹងមួយណាមកអនុវត្ត។ យ៉ាងណាក៏ដោយ ត្បិតតែប្រភពវីដេអូមានច្រើនក៏ពិតមែន តែយើងគួរសង្កេតមើលប្រភពណាដែលចែករំលែកនូវបទពិសោធល្អៗ ចំណេះដឹងក៏ដូចជាឯកសារពិតប្រាកដ មិនមែនចេះតែយកវីដេអូមិនពិតមកចែករំលែកនោះទេ។ មួយវិញទៀត យើងអាចមើលថាអ្នកចែករំលែកផ្នែកមួយណាដែលយើងចង់អនុវត្ត ដូចជាអ្នកដាំបន្លែលើទឹក យើងអាចទៅមើលផេកអ្នកដែលតែងតែបង្ហាញពីការដាំនិងបច្ចេកទេសពីផ្នែកនោះផ្ទាល់តែម្ដង”

បន្ថែមពីលើការមើលវីដេអូ ស្ថាបនិកខាងលើរៀបរាប់ថា ៖

“យើងមិនមែនពឹងផ្អែកទៅលើវីដេអូទាំងនោះបានទាំងស្រុងនោះទេ ពោលគឺវាអាស្រ័យលើការមើល ត្រង់ត្រាបតាម និងយកមកកែច្នៃក៏ដូចជាអនុវត្តផ្ទាល់ៗទើបដឹង ហើយសម្រាប់វីដេអូឯកសារទាំងនេះ អាចជាផ្នែកមួយទូលំទូលាយ និងជំនួយដល់ស្មារតីកសិករដល់ទៅ ៩០ភាគរយទៅហើយ សល់ប្រមាណ ១០ភាគរយទៀត គឺអាស្រ័យលើការអនុវត្ត និងស្រាវជ្រាវនៅមូលដ្ឋានផ្ទាល់តែម្ដង”

ទន្ទឹមជាមួយគ្នានេះដែរ លោក ជឿង ភារុង ជាម្ចាស់កសិដ្ឋាន HR និងជាអ្នកបង្កើតមាតិកាកសិកម្មមួយរូបដែរ បានចែករំលែកដែរថា ៖

“តាមរយៈវីដេអូលើបណ្ដាញសង្គម កសិករយើងអាចទទួលបានចំណេះដឹងថ្មីៗ ក៏ដូចជាបបច្ចេកទេសដាំដុះ ចិញ្ចឹមសត្វ និងផលប៉ះពាល់នានា ដែលគាត់អាចបានដឹងនិងអនុវត្ត ក្រៅពីការសាកសួរអ្នកមានបទពិសោធ ឬក៏ទៅរៀននៅសាលាជំនាញកសិកម្មផងដែរ”

ជាចុងក្រោយ អ្នកជំនាញខាងលើ សូមលើកទឹកចិត្តឱ្យបងប្អូនកសិករយើងចេះប្រើប្រាស់បណ្ដាញសង្គមឱ្យមានប្រយោជន៍ ជាពិសេសទាញយកចំណេះដឹងនានា ដែលគេចែករំលែកឥតគិតថ្លៃ យកមកអនុវត្ត ស្រាវជ្រាវបន្ថែម និងចងក្រងជារូបមន្តផ្ទាល់ខ្លួនដើម្បីអនុវត្តឱ្យកាន់តែមានប្រសិទ្ធភាព៕