សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
អូទ្រីស ជាសត្វមួយប្រភេទដែលមានប្រភពមកពីប្រទេសលោកខាងលិច និងត្រូវបានគេចិញ្ចឹមដើម្បីយកពងសម្រាប់ទទួលទានត្បិតភាគច្រើនគេជឿថា ពងអូទ្រីសអាចជួយបំប៉នសុខភាព ជាពិសេសស្ត្រីមានផ្ទៃពោះ និងលក់ក្នុងតម្លៃថ្លៃ។ ពេលនេះ យើងមកដឹងពីបច្ចេកទេសសំខាន់ៗក្នុងការចិញ្ចឹម និងថែទាំពីម្ចាស់កសិដ្ឋានអូទ្រីសមួយកន្លែងដែលកំពុងមមាញឹកក្នុងការចិញ្ចឹម។
អ្នកស្រី ព្រំ ផល្លី ជាប្រធានផ្នែកកសិដ្ឋានចិញ្ចឹមចៀម និងអូទ្រីសអូរត្រជាក់ចិត្ត មានទីតាំងស្ថិតនៅខេត្តព្រះសីហនុបានប្រាប់ពីបច្ចេកទេសសំខាន់ៗមួយចំនួនឱ្យដឹងថា៖ ការចិញ្ចឹមសត្វអូទ្រីស ចំណុចដែលត្រូវប្រយ័ត្នខ្ពស់ និងដំបូងគេបំផុតគឺចំណី និងការថែទាំ ដោយផ្នែកចំណីគឺទាមទារឱ្យវាស៊ីបានគ្រប់គ្រាន់ មានទឹកផឹកគ្រប់គ្រាន់ ឯការថែទាំក៏ទាមទារឱ្យអ្នកចិញ្ចឹមចាក់វ៉ាក់សាំងឲ្យបានត្រឹមត្រូវ និងព្យាបាលជំងឺឲ្យបានទាន់ពេលវេលា ព្រោះអូទ្រីសជាសត្វងាយកើតជំងឺផ្តាសាយ និងរលាកក្រពះ។
អ្នកស្រីបានបញ្ជាក់ថា៖
«ចំណីរបស់អូទ្រីស យើងអាចប្រើជាស្មៅ គ្រាប់ពោត និងស្រូវជាដើម តែដើម្បីឱ្យអូទ្រីសឡើងសាច់ និងផ្ដល់ស៊ុតដែលមានគុណភាព អ្នកចិញ្ចឹមក៏ត្រូវសូនចំណីគ្រាប់ដែលជាចំណីបន្ថែមមានផ្ទុកនូវប្រូតេអ៊ីនច្រើនមុខផ្សេងទៀត ។ ចំពោះឯជំងឺ អូទ្រីស ភាគច្រើនមានជំងឺនៅរដូវវស្សាដែលធ្វើឱ្យវាងាយផ្តាសាយធំ ខ្លួនឡើងកម្តៅខ្លាំង ហើយបើព្យាបាលមិនទាន់ទេ អូទ្រីសអាចប្រកាច់ស្លាប់ភ្លាមៗ»។
ត្បិតអូទ្រីសជាសត្វក្រទទួលបានផល ដោយក្នុងមួយឆ្នាំអូទ្រីសមេអាចធ្លាក់ពងមកតែម្តងប៉ុណ្ណោះ គឺចាប់ពីចុងខែធ្នូ រហូតដល់ខែមីនា ឬខែមេសា ហើយអូទ្រីសដែលពេញសាច់នៅចន្លោះពី ៦០-១០០គីឡូក្រាម ពោលគឺត្រូវចិញ្ចឹមពី ១-២ឆ្នាំ។ ដោយឡែកសម្រាប់ទីផ្សារសាច់អូទ្រីសក្នុងស្រុកនាពេលបច្ចុប្បន្ន គឺនៅមានកម្រិតនៅឡើយ ដែលខុសពីតម្រូវការទីផ្សារពងអូទ្រីសមានភាពទូលំទូលាយ និងមានតម្លៃថ្លៃ ដោយពងអូទ្រីសមួយគ្រាប់អាចលក់បានចន្លោះ ២៥-៣០ដុល្លារ ។ ក្រៅពីនេះ ម្ចាស់កសិដ្ឋានចិញ្ចឹមអូទ្រីសក៏អាចកែច្នៃទីកន្លែងចិញ្ចឹមរបស់ខ្លួនជាកន្លែងកម្សាន្ត ដែលអាចអនុញ្ញាតឱ្យទេសចរចូលទស្សនាផងដែរ។
គួរបញ្ជាក់ដែរថា អ្នកស្រី ព្រំ ផល្លី បានចាប់ផ្តើមចិញ្ចឹមសត្វអូទ្រីសកាលពីឆ្នាំ២០២១ ដោយទិញពូជមកពីប្រទេសជិតខាង និងស្រាវជ្រាវពីបច្ចេកទេសចិញ្ចឹមបន្ថែម។ ដោយឡែកចំពោះការផ្តើមគំនិតចិញ្ចឹមទៀតសោត ដោយសារយល់ឃើញថា សត្វអូទ្រីសជាប្រភេទសត្វកម្រ និងមិនសូវមានអ្នកចិញ្ចឹមនៅក្នុងស្រុក ខណៈដែលពងរបស់វាអាចលក់បានថ្លៃ ហើយម៉្យាងទៀតក៏អាចរកបានចំណូលពីការអនុញ្ញាតឱ្យទេសចរក្នុងស្រុកចូលទស្សនានៅកសិដ្ឋានផងដែរ៕
Account
Security
Favourite Content