កំពង់ធំ៖ ក្រុមហ៊ុន MIRARTH Agri Tech របស់ជប៉ុន ដែលមានមូលដ្ឋាននៅក្នុងខេត្តកំពង់ធំ កាលពីរសៀលថ្ងៃទី២១ ខែវិច្ឆិកា ឆ្នាំ២០២៤ បានប្រកាសនាំចេញគ្រាប់ស្វាយចន្ទីកែច្នៃរួចទៅសហគមន៍អឺរ៉ុបលើកដំបូងចំនួន ២៥០តោន ដែលតាមតម្លៃប៉ាន់ស្មានប្រមាណជាង ២០០លានដុល្លារអាមេរិកក្នុងរដូវកាលនេះ ហើយសម្រាប់ការនាំចេញដំណាក់កាលទី១មានចំនួន១៦តោន។

នៅក្នុងពិធីនាំចេញគ្រាប់ស្វាយចន្ទីទៅសហគមន៍អឺរ៉ុបលើកដំបូងនេះ លោក ខេនថារ៉ូ តានិគូជី (Kentaro Taniguchi) ប្រធានក្រុមហ៊ុនមីរ៉ាត់ (MIRARTH) បានមានប្រសាសន៍ថា៖ រោងចក្រកែច្នៃស្វាយចន្ទីរបស់មីរ៉ាត់ ដែលស្ថិតនៅភូមិត្រពាំងអារក្ស ឃុំជ័យ ស្រុកកំពង់ស្វាយ ខេត្តកំពង់ធំនេះ បានចាប់ផ្តើមសាងសង់នៅខែមីនា ឆ្នាំ២០២៤ បញ្ចប់ការសាងសង់នៅខែកក្កដា ឆ្នាំ២០២៤ ដោយមានសមត្ថភាពផលិតគ្រាប់ស្វាយចន្ទីទំហំ ១,៥០០ តោនក្នុងមួយឆ្នាំ។

លោកបានឱ្យដឹងថា៖

«ការនាំចេញដំបូងនេះមានចំនួន ១៦ តោន ។ យើងមានផែនការដឹកចេញស្វាយចន្ទីទៅអឺរ៉ុបចំនួន ២៥០ តោន នៅក្នុងរដូវស្វាយចន្ទីនេះ ។ ការសម្រេចបាននូវការនាំចេញនេះ មានការគាំទ្រច្រើនពីរាជរដ្ឋាភិបាលកម្ពុជា រដ្ឋាភិបាលជប៉ុន ដៃគូអន្តរជាតិ និងប្រជាកសិករកម្ពុជា។ ការនាំចេញចន្ទីទៅអឺរ៉ុបលើកនេះបានបង្ហាញថា គ្រាប់ស្វាយចន្ទីដែលផលិតនៅរោងចក្រក្នុងខេត្តកំពង់ធំនេះ មានគុណភាពស្តង់ដារអន្តរជាតិ។ យើងសូមថ្លែងអំណរគុណចំពោះបុគ្គលិករោងចក្រទាំងអស់ ដែលបានចូលរួមចំណែកបង្កើតនូវផលិតផលដែលមានតម្លៃខ្ពស់»។

លោកបានលើកឡើងថា៖ ការបើករោងចក្រកែច្នៃចន្ទីនៅកម្ពុជានេះអាចបង្កើតការងារថ្មី កាត់បន្ថយចំណាកស្រុករបស់ប្រជាពលរដ្ឋទៅធ្វើការនៅបរទេស។ ក្រុមហ៊ុន MIRARTH Agri Tech ផ្តោតលើគុណភាព និងប្រព័ន្ធគ្រប់គ្រងតាមស្តង់ដារ HACCP និងការតាមដានទិន្នន័យលំអិត (Traceability) ដើម្បីរួមចំណែកសម្រេចគោលដៅអភិវឌ្ឍន៍ធនធានប្រកបដោយចីរភាព (SDGs) ដូចជាការលុបបំបាត់ភាពក្រីក្រនិងការពារការចូលរួមអាជីវកម្មកុមារ។

លោកប្រធានក្រុមហ៊ុនបានឱ្យដឹងថា៖ ក្រុមហ៊ុនមានផែនការបន្ថែមសមត្ថភាពផលិតឱ្យបាន ៣ ០០០ តោន ហើយសាងសង់រោងចក្រធំមួយដែលអាចផលិតគ្រាប់ស្វាយចន្ទី ២០ ០០០ តោនក្នុងរយៈពេល ៣ ឆ្នាំខាងមុខ និងកំពុងសិក្សាដំណើរការប្រើប្រាស់សំបកគ្រាប់ស្វាយចន្ទីសម្រាប់បង្កើតថាមពលបៃតង។

ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម បានថ្លែងថា៖ ការនាំចេញគ្រាប់ស្វាយចន្ទីកែឆ្នៃទៅកាន់សហភាពអឺរ៉ុបជាលើកដំបូងនេះមិនត្រឹមជាភាពជោគជ័យសម្រាប់តែក្រុមហ៊ុនទេ ប៉ុន្តែគឺជាដំណាក់កាលដ៏សំខាន់ក្នុងដំណើរបេសកកម្មរបស់កម្ពុជាក្នុងការនាំយកទំនិញផលិតផលកម្ពុជា “Product of Cambodia” ទៅកាន់ទីផ្សារអន្តរជាតិ។

ឯកឧត្តមរដ្ឋលេខាធិការ បានលើកឡើងថា៖

«ការនាំយកទំនិញចូលទៅកាន់ទីផ្សារអឺរ៉ុបពិតជាមានការលំបាក និងតម្រូវឱ្យមានការអនុវត្តតាមច្បាប់លក្ខខណ្ឌតម្រូវ និងស្តង់ដារខ្ពស់។ ដូច្នេះហើយ ការដែលក្រុមហ៊ុន MIRARTH សម្រេចបានការនាំចេញទៅកាន់ទីផ្សារអឺរ៉ុបដោយផ្ទាល់នេះ បានសបញ្ជាក់ឱ្យឃើញថា ក្រុមហ៊ុនរបស់កម្ពុជាអាចមានលទ្ធភាពក្នុងការនាំចេញដោយផ្ទាល់ទៅទីផ្សារអឺរ៉ុប ហើយខ្ញុំក៏សង្ឃឹមថានឹងអាចជាការលើកទឹកចិត្តដល់ក្រុមហ៊ុនដទៃក្នុងការគិតគូរ ពិចារណាក្នុងការនាំចេញទៅកាន់ទីផ្សារដ៏សំខាន់នេះផងដែរ»។

ទាក់ទងនឹងនឹងការនាំចេញ ឯកឧត្តម សំហេង បូរ៉ា បានមានប្រសាសន៍ថា ៖ ក្រសួងពាណិជ្ជកម្ម តាមរយៈក្រុមការងារជំរុញការនាំចេញ បានដាក់ចេញនូវបេសកកម្មដ៏សំខាន់ក្នុងការនាំយក និងណែនាំទំនិញសក្តានុពលរបស់កម្ពុជាទៅកាន់ទីផ្សារពិភពលោក។ ក្រុមការងារជំរុញការនាំចេញនេះបានទទួលគោលការណ៍ក្នុងការជួយដល់អ្នកនាំចេញរបស់កម្ពុជា ដើម្បីដោះស្រាយបញ្ហាប្រឈមនានាក្នុងការនាំចេញ ក៏ដូចជាជួយផ្សារភ្ជាប់រវាងអ្នកទិញបរទេសជាមួយនឹងអ្នកនាំចេញកម្ពុជា សំដៅសម្រេចបានជាកិច្ចសន្យាទិញ-លក់តែម្តង។ ក្រសួងក៏បានរៀបចំ “មជ្ឈមណ្ឌលសេវានាំចេញ” ដើម្បីជួយផ្តល់ការប្រឹក្សាយោបល់ និងបណ្តុះបណ្តាលដល់អ្នកនាំចេញ ឬអ្នកមានបំណងនាំចេញ ក្នុងការស្វែងយល់បន្ថែមអំពីលក្ខខណ្ឌតម្រូវ ព័ត៌មានទីផ្សារ និងនិន្នាការជុំវិញសកលោក ដើម្បីជួយជំរុញដល់ការនាំចេញផងដែរ។

ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ឱ្យដឹងថា៖ ផ្ទៃដីដាំដុះដំណាំស្វាយចន្ទីទូទាំងប្រទេសមានប្រមាណ៥៨ម៉ឺនហិកតា ប៉ុន្តែក្នុងរយៈពេល ២ ឬ ៣ឆ្នាំទៀត អាចនឹងកើនឡើងជាង៦០ម៉ឺនហិកតា ដោយទទួលផលក្នុងឆ្នាំ២០២៤ មានចំនួន៨៧ម៉ឺនតោន ក្នុងនោះ៨៥ភាគរយបាននាំចេញប្រទេសវៀតណាម នៅសល់ជាង១០ភាគរយកែច្នៃនៅក្នុងស្រុក និងមួយចំនួនទៀតនាំគ្រាប់ឆៅទៅកាន់ប្រទេសឥណ្ឌា ម៉ាឡេស៊ី ថៃ និងបង់ក្លាដែស។

ឯកឧត្តបានបញ្ជាក់ថា៖

«ក្រុមហ៊ុនមីរ៉ាត់ ជាក្រុមហ៊ុនដែលយកចិត្តទុកដាក់ខ្លាំងបំផុតចំពោះគ្រាប់ស្វាយចន្ទី ជំរុញការកែច្នៃ បង្កើតការងារ និងចំណូលជូនប្រជាជន ចូលលរួមផ្សព្វផ្សាយកេរ្តិ៍ឈ្មោះស្វាយចន្ទីកម្ពុជាទៅកាន់ពិភពលោក ។ តាមរយៈការនាំចេញស្វាយចន្ទីជាលើកដំបូងទៅកាន់សហភាពអឺរ៉ុបចំនួន២៥០តោន ជាមោទនភាពបំផុត ។ សង្ឃឹមថា ឆ្នាំបន្តបន្ទាប់ទៀតនឹងនាំចេញកាន់តែច្រើន។ គ្រាប់ស្វាយចន្ទីកម្ពុជា ឆ្ងាញ់ គ្រាប់ធំ ប្រកបដោយគុណភាព និងសុវត្ថិភាព»។

ឯកឧត្តម ញឹក បានខេង អភិបាលរងនៃគណៈអភិបាលខេត្តកំពង់ធំ បានមានប្រសាសន៍ថា៖ វិស័យកសិកម្ម និងកសិឧស្សាហកម្ម ក្នុងខេត្តកំពង់ធំមានសក្តានុពល។ ខេត្តកំពង់ធំមានផ្ទៃដីដាំដុះដំណាំចន្ទី ១៥២.៦១១ហិកតា ផ្ទៃដីប្រមូលផលសរុប ១៤៧.៧០០ហ.ត និងទទួលបាន ទិន្នផលជាមធ្យម ១,៥តោន/ហ.តក្នុង១ឆ្នាំ និងបរិមាណផលសរុបជាង ២២ម៉ឺនតោន ស្មើនឹង ៣០% នៃក្របខណ្ឌទូទាំងប្រទេស ។

ឯកឧត្តមអភិបាលខេត្តរង បានអំពាវនាវបន្ថែមទៀតដល់ក្រុមហ៊ុនវិនិយោគជប៉ុន មកវិនិយោគលើវិស័យកសិកម្ម ផ្សេងៗទៀតក្នុងខេត្តកំពង់ធំ ដូចជា ស្រូវអង្ករ ដំឡូងមី ស្វាយកែវរមៀត និងកៅស៊ូ ជាដើម ។

លោក អួន ស៊ីឡុត ប្រធានសមាគមស្វាយចន្ទីកម្ពុជា បានប្រាប់ AMS Economy ថា៖

«ការនាំចេញចន្ទីលើកដំបូងទៅកាន់អឺរ៉ុបនេះជារឿងល្អ ជាសញ្ញាវិជ្ជមានមួយ។ នៅអឺរ៉ុបតម្រូវការភូតគាមអនាម័យគឺខ្ពស់ អ៊ឹចឹងការនាំចេញរបស់ Mirarth ទៅសហភាពអឺរ៉ុបនេះ បញ្ជាក់ពីស្តង់ដារម្ហូបអាហារអាចទទួលយកបាននៅលើទីផ្សាអន្តរជាតិ។ ដំបូងនាំចេញ១៦តោន តែក្នុងកិច្ចសន្យានឹងនាំចេញជាង២០០តោន នេះពិតជាចំនួនដ៏ច្រើន»។

លោក ហុង វណ្ណៈ អ្នកជំនាញសេដ្ឋកិច្ច នៃរាជ្យបណ្ឌិសភាកម្ពុជា បានមានប្រសាសន៍ថា៖ ការនាំចេញចន្ទីរបស់ Mirath ទៅសហភាពអឺរ៉ុបនឹងជួយលើកមុខមាត់ជាតិ ផ្តល់ឱកាសការងារ និងចំណូលដល់ប្រជាពលរដ្ឋដែលធ្វើការទាក់ទងនឹងស្វាយចន្ទី បង្កើនតម្លៃបន្ថែម និងលើកអត្តសញ្ញាណជាតិ ក៏ដូចជាផលិតផលខ្មែរ ព្រមទាំងជួយជំរុញសេដ្ឋកិច្ចជាតិឱ្យកាន់តែរីកសម្រើន ជាពិសេសជួយជំរុញឱ្យសម្រេចបាន តាមចក្ខុវិស័យដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ដែលចង់ប្រែក្លាយកម្ពុជាជាអធិរាជស្វាយចន្ទី និងជាប្រទេសផលិតគ្រាប់ស្វាយចន្ទីច្រើនជាងគេលើពិភពលោក ។

យោងតាមសមាគមស្វាយចន្ទីកម្ពុជា គិតត្រឹមរយៈពេល១០ខែ ចាប់ពីខែមករា ដល់ខែតុលា ឆ្នាំ ២០២៤ កម្ពុជាផលិតគ្រាប់ស្វាយចន្ទីបានចំនួន៨៤ ម៉ឺនតោន កើន២៦ភាគរយ។ ក្នុងនោះនាំចេញទៅវៀតណាមបានជាង៧៩ម៉ឺនតោន គិតជាទឹកប្រាក់ចំនួន ១១១០លានដុល្លារអាមេរិក កើន៣១ភាគរយ ខណៈតម្លៃកើន ៩ភាគរយ ធៀបរយៈពេលដូចគ្នានៅឆ្នាំ២០២៣៕