សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ស្រូវ ជាដំណាំដែលមានសក្ដានុពលមួយក្នុងប្រទេសកម្ពុជាដែលកសិករនិយមដាំដុះទាំងសម្រាប់ទទួលទាន និងសម្រាប់ការផ្គត់ផ្គង់ទីផ្សារ ប៉ុន្តែនៅក្នុងការដាំដុះ និងបង្កបង្កើនផល ដំណាំស្រូវក៏អាចជួបប្រទះនឹងបញ្ហាសត្វល្អិតផងដែរ ដូចជាពពួកសត្វមមាចត្នោតជាដើម ដែលអាចបំផ្លាញ និងចម្លងជំងឺផងដែរ។ ដូច្នេះ ដើម្បីជាដំណោះស្រាយបញ្ហានេះ អ្នកជំនាញកសិកម្មបានបង្ហាញពីបច្ចេកទេសមួយចំនួនក្នុងការផលិតថ្នាំពុលធម្មជាតិដើម្បីកម្ចាត់ និងការពារពីការយាយីពីពពួកសត្វមមាចត្នោត។
មមាចត្នោត ច្រើនកើតមានឡើងនៅលើស្រែដែលប្រើប្រាស់ប្រព័ន្ធស្រោចស្រព និងស្រែដែលទទួលរបបទឹកភ្លៀង ហើយវាអាចកើតមានច្រើនបំផុតនៅពេលមានការប្រើប្រាស់ថ្នាំពុលកសិកម្មមិនសមស្របតាមការណែនាំ ដែលជាហេតុនាំឱ្យមមាចត្នោតចាក់បញ្ចូលពងជាកញ្ចុំទៅក្នុងជាលិកាស្រទបស្លឹក និងលើទ្រនុងស្លឹក ដែលបង្កឱ្យមានផលប៉ះពាល់ដល់ដំណាំស្រូវតាមរយៈការជញ្ជក់យករុក្ខរសពីដើមស្រូវរហូតដល់ខ្សោះខ្លោច និងការចម្លងវីរុសផ្សេងៗ។
ក្នុងការកម្ចាត់មមាចត្នោត អ្នកជំនាញមានវិធីច្រើន ដោយក្នុងនោះកសិករក៏អាចផលិតថ្នាំកសិកម្មដែលមានធាតុផ្សំពីប្រភពធម្មជាតិអាចកម្ចាត់សត្វល្អិត និងមិនប៉ះពាល់ដល់បរិស្ថាន។ រុក្ខជាតិ ៤ប្រភេទដែលគេយកមកផលិតរួមមានពពួករុក្ខជាតិឆួល ឬក្រពុល ល្វីង ហឹរ និងពុល។ ធាតុផ្សំដែលផ្ទុកសារធាតុក្រពុលមាន សំបកទៀប ទន្ទ្រាងខេត្រ ផ្កាស្បៃរឿង ក្រូចសើច និងជីគ្រប់ប្រភេទ ចំណែកឯសារធាតុហឹរមានដូចជា ម្ទេស រំដេង ខ្ទឹម ហើយពពួកល្វីង រួមមានដូចជា ស្ដៅ និងបណ្ដូលពេជ្រ និងចុងក្រោយពពួកផ្ទុកសារធាតុពុលមានដូចជា ថ្នាំជក់ គ្រាប់ស្លែង ក្ដួច និងសំបកកន្ទួត។
គ្រឿផ្សំទាំងនេះអាចយកមកផលិតថ្នាំកសិកម្មធម្មជាតិដោយប្រើក្នុងបរិមាណខុសៗគ្នា ដូចជា ក្ដួច គ្រាប់ស្លែង ឬផ្លែស្លាក់ ៦គីឡូក្រាម សំបកកន្ទួត ១០គីឡូក្រាម ថ្នាំជក់ ២គីឡូក្រាម ទន្ទ្រាងខេត្រ ៦គីឡូក្រាម សំបកទៀប ៤គីឡូក្រាម ផ្កាស្បៃរឿង ៤គីឡូក្រាម សំបកស្ដៅ ១០គីឡូក្រាម បណ្ដូរពេជ្រ ៦គីឡូក្រាម និងម្ទេស ២គីឡូក្រាម។ យកធាតុផ្សំទាំងអស់ចិញ្ច្រាំឱ្យម៉ដ្ឋ ដាក់ទៅក្នុងពាងមានចំណុះ ២០០លីត្រ និងបន្ថែមទឹកនោម ៣០-៥០លីត្រ ហើយកូរល្បាយនេះឱ្យសព្វសាច់ល្អ ទើបគ្របពាងឱ្យជិត។ ធ្វើការកូរល្បាយ ១ថ្ងៃម្ដង រាល់ថ្ងៃ ដោយកូរម្ដងៗត្រូវប្រើរយៈពេល ៥នាទី និងផ្អាប់ទុករយៈពេល ១៥-២០ថ្ងៃទើបមានប្រសិទ្ធភាពល្អ។
ថ្នាំកសិកម្មនេះមិនប៉ះពាល់ដល់សុខភាព មិនចំណាយច្រើន ដោយសារវត្ថុធាតុដើមអាចរកបានក្នុងតំបន់។ ចំពោះការប្រើប្រាស់ យកល្បាយថ្នាំខាងលើ ១លីត្រលាយជាមួយទឹក ១៥លីត្រ ដោយការលាយថ្នាំនេះក៏ផ្អែកលើភាពជាក់ស្ដែងរបស់សត្វល្អិតចង្រៃក្នុងស្រែដែរ រួចបន្ថែមសាប៊ូម្សៅ ១កូនស្លាព្រាកាហ្វេ កូរឱ្យសព្វដើម្បីបង្កើនប្រសិទ្ធភាពថ្នាំ។ កសិករអាចប្រើថ្នាំនេះ ២-៣ដងក្នុងមួយសប្ដាហ៍ ហើយត្រូវបាញ់នៅពេលថ្ងៃរៀបលិច។ ចំណែកអ្នកអនុវត្ត ត្រូវមានភាពប្រុងប្រ័ត្នខ្ពស់នៅពេលបាញ់ ត្រូវពាក់ខោអាវដៃវែង ស្រោមដៃ ម៉ាស់ មួក វែនតា និងស្បែកជើងកវែង ចៀសវាងប៉ះពាល់ដល់សុខភាព។
ក្រៅពីវិធីនេះ ក៏មានសារធាតុក៏ដូចជាថ្នាំផ្សេងទៀតដែលអាចកម្ចាត់មមាត្នោតបាន ដូចជាការប្រើថ្នាំពុលដែលមានលក់នៅលើទីផ្សារផ្សេងៗ តែត្រូវអានការណែនាំក្នុងការប្រើប្រាស់នៅលើដប ឬកញ្ចប់ឱ្យបានច្បាស់លាស់មនពេលប្រើប្រាស់៕
Account
Security
Favourite Content