សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅវិមានព្រឹទ្ធសភា ថ្ងៃទី១២ ខែមិថុនា ឆ្នាំ២០២៤នេះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអនុញ្ញាតឱ្យឯកឧត្តម អ៊ីហ្គោរ៍ ទ្រីសម៉ាន់ (Igor Driesmans) ឯកអគ្គរដ្ឋទូតសហភាពអឺរ៉ុបប្រចាំព្រះរាជាណាចក្រកម្ពុជា ចូលជួបសម្ដែងការគួរសម និងពិភាក្សាការងារ។
ក្នុងជំនួបនោះ ឯកអគ្គរដ្ឋទូតសហភាពអឺរ៉ុបបានលើកឡើងថា សហភាពអឺរ៉ុប និងកម្ពុជាមានទំនាក់ទំនងយូរអង្វែង ហើយមានកិច្ចព្រមព្រៀងជាច្រើន ជាពិសេសក្នុងទំនាក់ទំនងពាណិជ្ជកម្ម ដែលមានទំហំជាង៥ ពាន់លានអឺរ៉ូ។ ម្យ៉ាងទៀត ការផ្លាស់ប្ដូរទស្សនកិច្ចរបស់គណៈកម្មការ អឺរ៉ុបមកកម្ពុជាកាលពីខែមីនាកន្លងទៅនេះ បានសម្រេចនូវការចុះកិច្ចព្រមព្រៀងជាច្រើន ក្នុងការជំរុញទំនាក់ទំនងវិស័យសេដ្ឋកិច្ច ពាណិជ្ជកម្មនិងការវិនិយោគនៅកម្ពុជា។
ជាកិច្ចឆ្លើយតប សម្ដេចតេជោបានថ្លែងថា ការធ្វើការយ៉ាងជិតស្និទ្ធជាមួយសហភាពអឺរ៉ុបក្នុងរយៈពេលប្រមាណជាង៣០ឆ្នាំកន្លងមកនេះ នាំឱ្យកម្ពុជាបានកសាងសេដ្ឋកិច្ចឱ្យកាន់តែប្រសើរជាងមុន តាមរយៈការបង្កើនទំហំពាណិជ្ជកម្ម ជំនួយ និងការវិនិយោគផ្សេងៗចេញពីសហភាពអឺរ៉ុប។
សម្ដេចបន្តថា កម្ពុជាបានយកចិត្តទុកដាក់ជាខ្លាំងចំពោះការលើកកម្ពស់ទំនាក់ទំនង និងកិច្ចសហប្រតិបត្តិការជាមួយសហភាពអឺរ៉ុប និងអរគុណសហភាពអឺរ៉ុបដែលបានជួយកម្ពុជាក្នុងការស្ដារប្រទេសជាតិឡើងវិញក្រោយវិបត្តិផ្សេងៗ ដូចជាការកសាងហេដ្ឋារចនាសម្ព័ន្ធ កសិកម្ម ធនធានមនុស្ស និងការបោសសម្អាតមីនជាដើម។
គួររំលឹកថា រយៈពេល៥ខែ ឆ្នាំ២០២៤នេះ ការនាំចេញរបស់កម្ពុជាទៅកាន់សហភាពអឺរ៉ុបក្នុង បានកើនឡើង១១,៨៣ ភាគរយបើធៀបនឹងរយៈពេលដូចគ្នាកាលពីឆ្នាំមុន។ រីឯការនាំចេញ និងនាំចូលរវាងកម្ពុជា និងសហភាពអ៉ឺរុប បានកើនឡើង ៤,១៨ ភាគរយដល់ ១,៨៨ ពាន់លានដុល្លារ។
ប្រទេសអាល្លឺម៉ង់ និងអេស្ប៉ាញជាដៃគូពាណិជ្ជកម្មធំបំផុតរបស់កម្ពុជានៅសហភាពអឺរ៉ុបដែលមានទំហំពាណិជ្ជកម្មទ្វេភាគីចំនួន ៣៨៩ លានដុល្លារ និង ៣៥៧ លានដុល្លាររៀងៗគ្នា។
ទំនិញសំខាន់ៗ ដែលកម្ពុជា បាននាំចេញច្រើនជាងគេ រួមមាន៖ សម្លៀកបំពាក់ និងគ្រឿងបន្ទាប់បន្សំដែលធ្វើឡើងពីក្រណាត់ ផ្លែឈើ និងគ្រាប់ផ្លែឈើ ដែលអាចបរិភោគបាន ម៉ាស៊ីន និងឧបករណ៍អគ្គិសនី ស្បែកជើង កៅស៊ូ និង ផលិតផលធ្វើអំពីកៅស៊ូ ព្រមទាំងទំនិញសំខាន់ៗផ្សេងទៀត ទៅកាន់សហភាពអឺរ៉ុប ក្រោមគម្រោង EBA។
ជាមួយគ្នានេះ សហភាពអឺរ៉ុបក៏ជាអ្នកទិញអង្ករច្រើនជាងគេរបស់កម្ពុជាផងដែរ ដោយការនាំចេញអង្ករទៅសហភាពអឺរ៉ុបមានចំនួន ៤៥ ភាគរយនៃការនាំចេញអង្ករសរុបរបស់កម្ពុជាចំនួន ៣០២ ៥២៩ តោន៕
Account
Security
Favourite Content