សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងស្ថានភាពសេដ្ឋកិច្ចសកល និងកម្ពុជាកំពុងស្ថិតនៅក្នុងភាពមិនប្រាកដប្រជា វិស័យអចលនទ្រព្យកម្ពុជា ត្រូវបានអ្នកជំនាញមើលឃើញថា កំពុងស្ថិតនៅក្នុងស្ថានភាពដែលមិនច្បាស់លាស់ ខណៈដែលការផ្គត់ផ្គង់ហាក់លើសពីតម្រូវការ លើកលែងតែអចលនទ្រព្យប្រភេទលំនៅឋានតម្លៃសមរម្យ ដែលប្រជាជនកម្ពុជានៅបន្តមានតម្រូវការនៅឡើយ។
ជាប្រតិបត្តិករយ៉ាងសកម្ម និងជាអ្នកវិនិយោគក្នុងវិស័យអចលនទ្រព្យកម្ពុជា អ្នកឧកញ៉ាបណ្ឌិត សំ សុខនឿន ប្រធានក្រុមប្រឹក្សាភិបាលសម្ព័ន្ធក្រុមហ៊ុន SAM SN GROUP បានបង្ហាញពីការយល់ឃើញថា ទីផ្សារអចលនទ្រព្យកម្ពុជានាពេលបច្ចុប្បន្នមិនស្ថិតក្នុងសភាពទ្រឹងនោះទេ ប៉ុន្តែវាអាស្រ័យទៅតាមផ្នែកនីមួយៗ ជាមួយនឹងការលើកឡើងពីនិន្នាការទីផ្សារផងដែរ ដូចជា លំនៅឋានតម្លៃសមរម្យចន្លោះពី ១៧ ០០០ដុល្លារ ទៅ ៤៩ ០០០ដុល្លារ នៅជាយរាជធានីភ្នំបេញ ដែលកំពុងបន្តមានតម្រូវការសម្រាប់ប្រជាជនកម្ពុជា។ ដោយឡែកសម្រាប់លំនៅឋានជាប្រភេទវីឡាប្រណិតសម្រាប់រស់នៅផ្ទាល់ខ្លួនក្នុងទីក្រុងភ្នំពេញ ក៏នៅតែមានតម្រូវការសម្រាប់មន្រ្តីរាជការកម្រិតខ្ពស់ អ្នកជំនួញធំៗ។
អ្នកឧកញ៉ាបានបញ្ជាក់ថា ៖
«ដីធ្លីក្នុងទីក្រុងភ្នំពេញ ទីតាំងល្អៗ លើផ្លូវធំ រូបរាងដីល្អៗ ហើយលក់ក្នុងតម្លៃក្រោមទីផ្សារ ចន្លោះពី ៣០ ទៅ ៥០ភាគរយ ធៀបនឹងតម្លៃទីផ្សារមុនឆ្នាំ២០១៩ នៅតែអាចលក់បាន ឬនៅតែមានអ្នកទិញ ប៉ុន្តែក៏មិនមែនមានតម្រូវការខ្ពស់ដូចមុនឆ្នាំ២០២០នោះដែរ ដោយសារអ្នកទិញមានជម្រើសច្រើន និងមានឥទ្ធិពលក្នុងការចរចា» ។
អ្នកឧកញ៉ាបានមើលឃើញថា ដីធ្លីសម្រាប់រោងចក្រ ឃ្លាំង សួនឧស្សាហកម្ម តំបន់សេដ្ឋកិច្ចពិសេស ជាពិសេសខេត្តជាប់ទីក្រុងភ្នំពេញ មានតម្រូវការជាហូរហែ តែតម្លៃដែលត្រូវការគឺមិនលើសពី ១០ដុល្លារអាម៉េរិកក្នុងមួយម៉ែត្រការ៉េ និងជាប្រភេទដីទំហំធំ ដែលគេទិញសម្រាប់បម្រើវិស័យរោងចក្រនោពេលអនាគ។ ដោយឡែក សម្រាប់តម្រូវការដីកសិកម្ម ដីកសិ-ឧស្សាហកម្ម មានតម្រូវការទិញតិចតួច ដោយសារតែអ្នកវិនិយោគដីធ្លីធំៗបានបង្វែរដីដែលធ្លាប់ទិញទុកចោល ទៅជាដីកសិកម្ម ឬដីកសិ-ឧស្សាហកម្មវិញ ហើយអ្នកវិនិយោគត្រូវការតែដីដែលមានតម្លៃធូរថ្លៃមិនលើសពី ៣ដុល្លារអាម៉េរិកក្នុងមួយម៉ែត្រការ៉េនោះទេ ។
យោងតាមការព្យាកររបស់ក្រសួងសេដ្ឋកិច្ច និងហិរញ្ញវត្ថុបានឱ្យដឹងថា វិស័យអចលនទ្រព្យក្នុងឆ្នាំ២០២៦នេះ នៅតែបន្តមានកំណើនយឺត ហើយកំណើននេះបានបន្តគាំទ្រដោយចរន្តទិញ-លក់លំនៅឋានតម្លៃសមរម្យ សកម្មភាពទិញ-លក់ ឬជួលឃ្លាំង និងរោងចក្របម្រើឱ្យវិស័យឧស្សាហកម្ម ។
គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានបង្ហាញថា ក្នុងឆ្នាំ២០២៥ កន្លងទៅ កម្ពុជាបានអនុម័តគម្រោងវិនិយោគចំនួន ៦៣០គម្រោង ជាមួយទុនវិនិយោគប្រមាណ ១០ពាន់លានដុល្លារអាម៉េរិក ។ ក្នុងចំណោមទុនវិនិយោគទាំង ១០ពាន់លានដុល្លារអាម៉េរិកនោះ វិស័យឧស្សាហកម្មបានស្រូបទាញទុនវិនិយោគជាងពាក់កណ្ដាលទៅហើយ គឺប្រមាណ ៥,៦ពាន់លានដុល្លារអាម៉េរិក ដែលមានន័យថា វិស័យឧស្សាហកម្មនៅតែមានកំណើន ដែលធ្វើឱ្យតម្រូវការអចលនទ្រព្យរួមមានដីធ្លី សំណង់អគារសម្រាប់វិស័យនេះនៅតែបន្តមានជាហូរហែ ៕
Account
Security
Favourite Content