បរទេស៖ យោងតាមប្រភព័ត៌មានពីរ៉យទ័របានរាយការណ៍ថា ប្រទេសឡេសូតូ ដែលជាទឹកដីនៃអាហ្វ្រិកខាងត្បូងស្ទើរតែមិនមានអ្នកស្គាល់​នោះ ត្រូវបានដាក់ពន្ធ ៥០ ភាគរយដោយប្រធានាធិបតីសហរដ្ឋអាម៉េរិក លោក Donald Trump។

កាលពីថ្ងៃពុធ សប្ដាហ៍នេះ ប្រធានាធិបតីសហរដ្ឋអាម៉េរិក Donald Trump បានប្រកាសពន្ធឆ្លើយតបឲ្យស្មើភាពគ្នា ឬ Reciprocal tariffs លើការនាំចូលពីប្រទេស និងដែនដីជាង ១៨០ ដែលបង្កឲ្យមានការភ្ញាក់ផ្អើលនៅជុំវិញពិភពលោក។ ការដាក់ពន្ធគយថ្មីរបស់ Trump នឹងប៉ះពាល់ខ្លាំងដល់ប្រទេសកំពុងអភិវឌ្ឍន៍ និងប្រទេសដែលមានសេដ្ឋកិច្ចខ្សោយបំផុតក្នុងពិភពលោក។ អ្នកជំនាញម្នាក់បាននិយាយថា ការដាក់ពន្ធគយរបស់ Trump មិនគិតពីស្ថានភាពរបស់ប្រទេសទាំងនោះទេ។ ទន្ទឹមនឹងនេះ ប្រទេសឡេសូតូត្រូវបានដាក់ពន្ធខ្ពស់បំផុត ៥០ ភាគរយលើបញ្ជីរបស់ Trump ហើយវិធានការនេះនឹងបំផ្លិចបំផ្លាញសេដ្ឋកិច្ចនៃប្រទេសដ៏តូចមួយនេះ។

ប្រទេសឡេសូតូ គឺជាប្រទេសក្រីក្របំផុតមួយរបស់ពិភពលោកជាមួយនឹងអត្រាឆ្លងមេរោគអេដស៍/ជំងឺអេដស៍ខ្ពស់បំផុត ដែលមានផលិតផលក្នុងស្រុកសរុប (GDP) ត្រឹមតែជាង ២ ពាន់លានដុល្លារប៉ុណ្ណោះ។ ឡេសូតូ មានអតិរេកពាណិជ្ជកម្មដ៏ធំជាមួយសហរដ្ឋអាម៉េរិក ជាមួយនឹងការនាំចេញទៅកាន់អាម៉េរិកមានចំនួនសរុប ២៣៧ លានដុល្លារ ខណៈដែលការនាំចេញរបស់អាម៉េរិកមកប្រទេសនេះមានតម្លៃ ២,៨ លានដុល្លារ។ ការនាំចេញរបស់ឡេសូតូភាគច្រើនគឺ ពេជ្រ និងវាយន្ភណ្ឌដែលក្នុងនោះមានប្រ៊េនម៉ាក Levi’s ផងដែរ។ រដ្ឋបាលសហរដ្ឋអាម៉េរិកលើកឡើងថា ឡេសូតូគិតពន្ធនាំចូល ៩៩ ភាគរយលើទំនិញអាម៉េរិក ខណៈដែល Trump នឹងដាក់ពន្ធឆ្លើយតបឲ្យស្មើរភាពគ្នាវិញ ៥០ ភាគរយពីប្រទេសនេះ។

អ្នកវិភាគសេដ្ឋកិច្ចម្នាក់លើកឡើងថា ការដាក់ពន្ធ ៥០ ភាគរយរបស់ Trump នឹងសម្លាប់វិស័យវាយនភណ្ឌ និងសំលៀកបំពាក់នៅក្នុងប្រទេសឡេសូតូ ខណៈដែលវិស័យនេះមានកម្លាំងពលកម្មប្រហែល ៤ ម៉ឺននាក់ ដែលមានចំណែកដ៏សំខាន់ជាង ៩០ ភាគរយនៃការងារផលិត និងការនាំចេញប្រទេស។ អ្នករងគ្រោះបន្ទាប់ គឺអ្នកលក់រាយ និងម្ចាស់លំនៅដ្ឋានដែលដាក់ផ្ទះជួលសម្រាប់កម្មករ។ នេះមានន័យថាប្រសិនបើការបិទរោងចក្រកើតឡើង នោះឧស្សាហកម្មនឹងដូលរលំ និងមានផលប៉ះពាល់ច្រើនដល់សេដ្ឋកិច្ចទាំងមូល។

អ្នកជំនាញពាណិជ្ជកម្មបាននិយាយថា ការផ្លាស់ប្តូរនេះបានបង្ហាញពីសញ្ញានៃការបញ្ចប់កិច្ចព្រមព្រៀងពាណិជ្ជកម្ម AGOA (African Growth and Opportunity Act) ដែលមានបំណងគាំទ្រដល់ការអភិវឌ្ឍន៍សេដ្ឋកិច្ចអាហ្រ្វិកដោយអនុញ្ញាតឱ្យពួកគេចូលទីផ្សារសហរដ្ឋអាមេរិកដោយការអនុគ្រោះ។ មិនត្រឹមតែប៉ុណ្ណោះ ការបិទទីភ្នាក់ងារ USAID ដោយរដ្ឋបាល Trump បានបង្កការលំបាកដល់ឡេសូតូរួចទៅហើយ ដោយសារទីភ្នាក់ងារនេះជាអ្នកផ្គត់ផ្គង់ជំនួយដ៏សំខាន់ដល់ទ្វីបអាហ្វ្រិកទាំងមូល។ រដ្ឋមន្ត្រីការបរទេសឡេសូតូ បានបង្ហាញភាពអស់សង្ឃឹមពីផលប៉ះពាល់នៃការកាត់ជំនួយ ដោយសារវិស័យសុខាភិបាលរបស់ខ្លួនពឹងផ្អែកលើ USAID ខណៈដែលប្រទេសមានអត្រាឆ្លងមេរោគអេដស៍/ជំងឺអេដស៍ខ្ពស់បំផុតមួយក្នុងពិភពលោក៕