បរទេស ៖ ប្រធានាធិបតីបារាំង លោក Emmanuel Macron បានជួបពិភាក្សាជាមួយនាយករដ្ឋមន្ត្រីឥណ្ឌា លោក​ Narendra Modi ក្នុងគោលបំណងពង្រឹងទំនាក់ទំនងសេដ្ឋកិច្ច និងយុទ្ធសាស្ត្រកាន់តែស៊ីជម្រៅបន្ថែមទៀត រួមទាំងពាណិជ្ជកម្មផងដែរ នេះបើយោងតាមសេចក្ដីរាយការណ៍ពីសារព័ត៌មាន AP​ News ។

កាលពីថ្ងៃអង្គារ៍ សប្ដាហ៍នេះ ប្រធានាធិបតីបារាំង លោក Emmanuel Macron បានធ្វើដំណើរទៅជួបនាយករដ្ឋមន្ត្រីឥណ្ឌា លោក Narendra Modi នៅទីក្រុងបុមបៃ ដើម្បីពិភាក្សាគ្នាពង្រឹងកិច្ចទំនាក់ទំនងទាំងផ្នែកសេដ្ឋកិច្ច នយោបាយ និងយុទ្ធសាស្ត្រភាពជាដៃគូកាន់តែស៊ីជម្រៅ ខណៈដែលប្រទេសទាំងពីរកំពុងស្វែងរកកិច្ចសហប្រតិបត្តិការកាន់តែជិតស្និទ្ធចំពេលមានភាពមិនប្រាកដប្រជាជាសកល និងបញ្ហាភូមិសាស្ត្រនយោបាយកើនកម្ដៅ។ កិច្ចប្រជុំនៅទីក្រុងបុមរវាងថ្នាក់ដឹកនាំប្រទេសទាំង២ បានគូសបញ្ជាក់អំពីសារៈសំខាន់នៃភាពជាដៃគូដែលបានពង្រីកលើវិស័យការពារជាតិរហូតដល់ពាណិជ្ជកម្ម បច្ចេកវិទ្យា និងថាមពល ដោយទីក្រុងប៉ារីសគឺជាដៃគូគួរឱ្យទុកចិត្តបំផុតមួយរបស់ឥណ្ឌា។

លោក Modi បាននិយាយក្នុងសន្និសីទសារព័ត៌មានរួមគ្នាជាមួយលោក Macron ថា ភាពជាដៃគូរវាងឥណ្ឌា-បារាំង មិនមានដែនកំណត់នោះទេ ជាពិសេស នៅក្នុងយុគសម័យដែលកំពុងមានភាពមិនប្រាកដប្រជា ភាពជាដៃគូនេះគឺជាកម្លាំងសម្រាប់ស្ថិរភាព និងវឌ្ឍនភាពសកល។ ទន្ទឹមនឹងនេះ ឥណ្ឌា បានសម្លឹងរកមើលការទាក់ទាញមូលធនបរទេស និងពង្រឹងខ្សែសង្វាក់ផ្គត់ផ្គង់ ខណៈដែលបារាំងស្វែងរកទីតាំងរឹងមាំជាងមុននៅក្នុងឥណ្ឌូប៉ាស៊ីហ្វិក។ មិនត្រឹមតែប៉ុណ្ណោះ មេដឹកនាំទាំងពីរបានសម្ពោធគម្រោងការផលិតឧទ្ធម្ភាគចក្រ H125 ដែលជាការបណ្តាក់ទុនរួមគ្នារវាងក្រុមហ៊ុន Tata Advanced Systems និង Airbus របស់ឥណ្ឌាផងដែរ។

ប្រធានាធិបតីបារាំង លោក Emmanuel Macron បានលើកឡើងថា ទំនាក់ទំនងបារាំង-ឥណ្ឌា ស្ថិតក្នុងដំណាក់កាលបង្កើនល្បឿន ដើម្បីឆ្លើយតបទៅនឹងការផ្លាស់ប្តូរបស់សកលលោក។ ឧស្សាហកម្មអវកាស ថាមពលនុយក្លេអ៊ែរ រ៉ែកម្រ និងរថភ្លើងល្បឿនលឿន ជាវិស័យសំខាន់ៗសម្រាប់ភាពជាដៃគូជាមួយឥណ្ឌា ព្រមទាំងគាំទ្រដល់កិច្ចព្រមព្រៀងពាណិជ្ជកម្មសេរីរវាងទីក្រុងញូវដេលី និងសហភាពអឺរ៉ុបទៀតផង។ បន្ថែមពីនេះ ប្រធានាធិបតីបារាំងរូបនេះបានអំពាវនាវឱ្យឥណ្ឌាចូលរួមកិច្ចខិតខំប្រឹងប្រែងជាមួយបារាំងឆ្ពោះទៅរកការបញ្ចប់សង្គ្រាមរុស្ស៊ី-អ៊ុយក្រែន និងបានអញ្ជើញលោក Modi ឱ្យចូលរួមក្នុងកិច្ចប្រជុំកំពូល G7 នៅប្រទេសបារាំង នាអំឡុងខែមិថុនាខាងមុខនេះ។

ជាការឆ្លើយតប នាយករដ្ឋមន្ត្រីឥណ្ឌា លោក Narendra Modi បានបញ្ជាក់ថា ឥណ្ឌានៅតែបន្តតស៊ូមតិសម្រាប់ដំណោះស្រាយដោយសន្តិវិធីចំពោះជម្លោះដែលកំពុងបន្តកើតមាននៅទាំងនៅក្នុងតំបន់អាស៊ីខាងលិច និងនៅអឺរ៉ុបខាងកើត។

គួរឲ្យបញ្ជាក់ដែរថា ទំនាក់ទំនងទ្វេភាគីរវាងឥណ្ឌា និងបារាំង កាន់តែមានភាពប្រសើរជាលំដាប់ ជាពិសេសការធ្វើពាណិជ្ជកម្ម និងការវិនិយោគរបស់បារាំងកាន់តែស៊ីជម្រៅ និងកើនឡើងជាលំដាប់ទាំងនៅក្នុងវិស័យផលិតកម្ម ថាមពល ការពារជាតិ និងហេដ្ឋារចនាសម្ព័ន្ធរបស់ឥណ្ឌា ដោយនៅក្នុងឆ្នាំ២០២៥កន្លងទៅនេះ ទំហំពាណិជ្ជកម្មទ្វេភាគីមានតម្លៃជាង ១៥ ពាន់លានដុល្លារ ដែលធ្វើឱ្យបារាំងក្លាយជាដៃគូពាណិជ្ជកម្មធំបំផុតទី៣​ នៅក្នុងសហភាពអឺរ៉ុបរបស់ឥណ្ឌា។ លើសពីនេះ កិច្ចសហប្រតិបត្តិការលើវិស័យការពារជាតិ គឺជាស្នូលនៃទំនាក់ទំនងរវាងភាគីទាំងពី ដោយសារគណៈកម្មាការរដ្ឋាភិបាលឥណ្ឌាយល់ព្រមទិញសម្ភារៈយោធាដែលមានតម្លៃ ៤០ ពាន់លានដុល្លារ រួមមាន យន្តហោះចម្បាំង Rafale ចំនួន ១១៤ គ្រឿងពីបារាំងផងដែរ។ ដោយឡែក វិស័យការពាដែន​អាកាស ​គឺជា​អាទិភាព​យុទ្ធសាស្ត្រ​សម្រាប់​​ឥណ្ឌា ដោយសារ​មានបញ្ហា​សន្តិសុខនៅតាម​បណ្តោយ​ព្រំដែន​របស់ខ្លួន​ជាមួយ​គូប្រជែង​ប្រដាប់អាវុធ​នុយក្លេអ៊ែរ​ រួមមាន ប៉ាគីស្ថាន និង​មហាអំណាចចិន៕