បរទេស៖ យោងតាមប្រភពព័ត៌មានពី BBC បានរាយការណ៍ថា នាយករដ្ឋមន្រ្តីកាណាដាបានវាយបកចំពោះការគំរាមកំហែងរបស់លោក Donald Trump ក្នុងការប្រើប្រាស់កម្លាំងសេដ្ឋកិច្ច ដើម្បីទាញយកប្រទេសកាណាដាឲ្យក្លាយជារដ្ឋទី ៥១ របស់សហរដ្ឋអាម៉េរិក។

ក្នុងរយៈពេលប៉ុន្មានសប្តាហ៍ចុងក្រោយនេះ ប្រធានាធិបតីជាប់ឆ្នោត Donald Trump បានគំរាមគំហែងម្តងហើយម្តងទៀតអំពីការទាញយកប្រទេសកាណាដាឲ្យក្លាយជារដ្ឋទី ៥១ របស់សហរដ្ឋអាមេរិក។ នៅក្នុងសន្និសីទសារព័ត៌មានមួយ លោក Trump បាននិយាយថា វានឹងកាន់តែល្អសម្រាប់សន្តិសុខជាតិ ប្រសិនបើកាណាដាដករនាំងរវាងប្រទេសទាំងពីរ។ យ៉ាងណាមិញ លោក Trump នៅបន្តគំរាមកំហែងក្នុងកាដំឡើងពន្ធយ៉ាងច្រើនលើទំនិញកាណាដា លុះត្រាតែកាណាដាចាត់វិធានការដើម្បីបង្កើនសន្តិសុខនៅតាមព្រំដែនជាមួយនឹងសហរដ្ឋអាមេរិករួមគ្នា។ ការ​គំរាម​កំហែង​ពន្ធ​​កំពុង​បន្ត ខណៈដែល​​បញ្ហា​នយោបាយកំពុងកើតឡើង​នៅប្រទេស​កាណាដា។

ជាការឆ្លើយតប នាយករដ្ឋមន្រ្តីកាណាដា លោក Justin Trudeau បានប្រឆាំងនឹងការគំរាមកំហែងផ្នែកសេដ្ឋកិច្ចពី Donald Trump និងវាយបកថា គ្មានផ្លូវនោះទេដែលកាណាដានឹងក្លាយជាផ្នែកមួយនៃសហរដ្ឋអាម៉េរិក។ រដ្ឋាភិបាល Trudeau បាននិយាយថា ខ្លួនកំពុងពិចារណាលើការដាក់ពន្ធប្រឆាំងទៅវិញ ប្រសិនបើ Trump ធ្វើតាមការគំរាមកំហែងរបស់ខ្លួននោះ។

យ៉ាងណាក៏ដោយ ទោះបីជានាយករដ្ឋមន្រ្តីកាណាដា លោក Justin Trudeau ទើបប្រកាសលាលែងពីតំណែងពិតមែន ប៉ុន្តែលោកនឹងបន្តធ្វើជានាយករដ្ឋមន្ត្រីរហូតដល់បក្សសេរីនិយមជ្រើសរើសមេដឹកនាំថ្មីសម្រាប់កាណាដា។ សភារបស់ប្រទេសកាណាដាត្រូវបានផ្អាកជាបណ្តោះអាសន្នរហូតដល់ថ្ងៃទី ២៥ ខែមីនា ឆ្នាំ២០២៥ ដើម្បីទុកពេលសម្រាប់ការប្រកួតប្រជែងរើសមេដឹកនាំ។

ទោះបីជា Trump មិនពិចារណាប្រើប្រាស់កម្លាំងយោធាដើម្បីធ្វើឱ្យកាណាដាក្លាយជាផ្នែកមួយនៃសហរដ្ឋអាមេរិកពិតមែន ប៉ុន្តែបានលើកឡើងពីការចំណាយលើយោធារបស់ប្រទេសនេះ។ Trump លើកឡើងថា កាណាដាមានយោធាតិចតួចណាស់ និងពឹងផ្អែកលើយោធារបស់អាម៉េរិក។ លោកយល់ឃើញថា វាជារឿងអយុត្តិធម៌ ហើយកាណាដាត្រូវតបស្នងសងវិញ។

សេដ្ឋវិទូបានព្រមានថា ប្រសិនបើ Trump ពិតជាអនុវត្តការដំឡើងពន្ធពិតមែន បន្ទាប់ពីលោកកាន់តំណែងពេញលេញនៅថ្ងៃទី ២០ ខែមករា នោះវានឹងប៉ះពាល់ដល់សេដ្ឋកិច្ចកាណាដាយ៉ាងខ្លាំង។ ទន្ទឹមនឹងនេះ កាណាដាស្ថិតនៅក្រោមសម្ពាធក្នុងការបង្កើនការចំណាយផ្នែកយោធារបស់ខ្លួន ខណៈដែលប្រទេសនេះចំណាយមិនទាន់គ្រប់គ្រាន់សម្រាប់គោលដៅដែលបានកំណត់ដោយណាតូនៅឡើយ។ បច្ចុប្បន្ននេះ ថវិកាការពារជាតិរបស់កាណដាមានចំនួន ២៧ ពាន់លានដុល្លារកាណាដា (១៩,៨ ពាន់លានដុល្លារអាម៉េរិក) ខណៈដែលរដ្ឋាភិបាល Trudeau បានសន្យាថា នឹងបង្កើនការចំណាយរហូតដល់ជិត ៥០ ពាន់លានដុល្លារកាណដានៅឆ្នាំ ២០៣០។

គួរកត់សម្គាល់ថា ក្នុងអំឡុងពេលសន្និសីទកាសែត Mar-a-Lago Donald Trump បានរំលឹកឡើងវិញនូវការព្រួយបារម្ភរបស់គាត់អំពីបញ្ហាគ្រឿងញៀនឆ្លងព្រំដែនម៉ិចស៊ិក និងកាណាដា ចូលមកកាន់សហរដ្ឋអាមេរិក។ លើសពីនេះ កាណាដា និងម៉ិចស៊ិក ក៏ប្រឈមនឹងការគំរាមកំហែងពន្ធ ២៥ ភាគរយពីអាម៉េរិក។

យោងតាមទិន្នន័យរបស់សហរដ្ឋអាម៉េរិកបានឱ្យដឹងថា ចំនួនសារធាតុ fentanyl ដែលរឹបអូសបាននៅព្រំដែនសហរដ្ឋអាមេរិក-កាណាដា គឺមានកម្រិតទាបជាងនៅព្រំដែនភាគខាងត្បូង។ កាណាដាបានសន្យាថានឹងអនុវត្តនូវវិធានការរឹតបន្តឹងនៅតាមព្រំដែនរួមមាន ការពង្រឹងការឃ្លាំមើល និងបន្ថែមកម្លាំងបង្រ្កាបរួមគ្នាដើម្បីកំណត់គោលដៅឧក្រិដ្ឋកម្មឆ្លងដែន។

លើសពីនេះ ចៅហ្វាយខេត្តមួយចំនួនរបស់កាណាដានឹងធ្វើដំណើរទៅកាន់ទីក្រុងវ៉ាស៊ីនតោនក្នុងពេលឆាប់ៗនេះ ដើម្បីបញ្ចុះបញ្ចូលប្រឆាំងនឹងពន្ធដែលអាចកើតមាន។

កាលពីថ្ងៃចន្ទ Doug Ford ចៅហ្វាយខេត្ត Ontario ដែលមានប្រជាជនច្រើនបំផុតរបស់កាណាដាបានលើកឡើងថា Trudeau នឹងត្រូវតែចំណាយពេលប៉ុន្មានសប្តាហ៍ទៀតជាមួយនឹងតំណែងជានាយករដ្ឋមន្រ្តីធ្វើការជាមួយនឹងខេត្តនានាដើម្បីដោះស្រាយការគំរាមកំហែងរបស់ Trump ។ ខេត្ត Ontario គឺជាបេះដូងនៃឧស្សាហកម្មរថយន្តរបស់កាណាដា ហើយខេត្តនេះពឹងផ្អែកយ៉ាងខ្លាំងលើពាណិជ្ជកម្មជាមួយសហរដ្ឋអាម៉េរិក។ ពាណិជ្ជកម្មរវាង Ontario និងសហរដ្ឋអាមេរិកមានចំនួនសរុបច្រើនជាង ៣៥០ ពាន់លានដុល្លារអាម៉េរិកក្នុងឆ្នាំ២០២៣៕