បាត់ដំបង ៖ ប្រជាកសិករចំនួន ២ រូប ​នៅក្នុងខេត្ត​បាត់ដំបង​ ត្រូវបានគេ​ចាត់ទុកជា​កសិករ​គំរូ ដោយចាប់ផ្ដើម​អនុវត្ត​ន៍​កសិកម្ម​តាមបែប​អេកូឡូស៊ី អាចទទួលបាន​កម្រៃខ្ពស់​ និងធានា​សុវត្ថិភាពដល់អ្នក​បរិភោគ​ និងអ្នកដាំផ្ទាល់​ផងដែរ ។ អ្វីដែលពិសេស​ជាងនេះ គឺជួយ​​​​រក្សាគុណភាពដីឱ្យ​នៅតែ​មានជីវជាតិ​ និងចូលរួមក្នុងការថែរក្សា​បរិស្ថាន​កាន់តែ​ល្អថែមទៀតផង ។​

​លោក​ ស៊ីន ស៊ីវនឿត កសិករ​មួយរូប​នៅ​ភូមិ​កំពង់សីម៉ា សង្កាត់​វត្ត​គរ ក្រុងបាត់ដំបង ខេត្ត​បាត់ដំបង​បានឱ្យ​ដឹង​ថា លោកបាន​ចាប់ផ្ដើមកសិកម្ម​តាមបែប​កសិអេកូឡូស៊ី​នៅក្នុងអំឡុង​ឆ្នាំ២០១៩ ដោយ​បានចាប់ផ្ដើម​ដាំ​ដំ​ណាំ​​​ចម្រុះ និង​មានចិញ្ចឹមសត្វ​មួយចំនួនផងដែរ ។ ក្នុង​រយៈពេល​ ១ ទៅ ២ឆ្នាំដំបូង​ កសិផល​របស់​លោក​មិន​​សូវទទួលផលទេ ដោយសារតែ​ដីដែល​យកមក​អនុវត្តន៍កសិអេកូឡូស៊ី គឺជាដីដែលធ្លាប់​ប្រើ​ជីគីមី ដូច្នេះ នៅ​ពេល​​ដែលឈប់​ប្រើ​ជីគីមីមក​ប្រើជីកំប៉ុស គឺដំបូង​ដំណាំមិនសូវ​ឱ្យផលទេ ប៉ុន្តែ​ចូលដល់ឆ្នាំទី​២ ឬទី៣ ដំ​ណាំ​ចាប់ផ្ដើម​ហុច​ផល​ឱ្យ​កាន់តែល្អ​ និងទទួលបាន​ទិន្នផល​កាន់តែច្រើន ។ អ្វីដែលពិសេស​គឺកសិផលដែល​ចេញ​ពី​កសិដ្ឋាន​គឺមិនពិបាក​រកទីផ្សារ​ឡើយ ហើយថែមទាំងទទួលបានតម្លៃ​ខ្ពស់​ថែម​ទៀតផង ។​ ជាក់ស្ដែង​បន្លែ​ស្ពៃ​ក្រញាញ់​ដែល​កំពុងជួបបញ្ហាទីផ្សារ​តម្លៃធ្លាក់​ចុះ ប៉ុន្តែសម្រាប់ស្ពៃ​ក្រញាញ់​ដែលចេញពីចំការរបស់​លោក​គឺអាច​លក់បានក្នុងតម្លៃយ៉ាង​ហោច​ក៏៤០០០រៀល​ដែរ​ក្នុងមួយគីឡូក្រាម ហើយ​ក៏មិន​ពិបា​ក​​ល​ក់​ដែរ ។​

លោក​បន្តថា ចាប់តាំងពីលោក​អនុវត្តន៍​កសិកម្ម​តាបបែបកសិ​អេកូឡូស៊ីមក សមាជិ​កគ្រួសារទាំងអស់​ដែល​ធ្លាប់​តែមានបញ្ហា​សុខភាព​ក៏ក្លាយជាទៅជាមនុស្សដែលមានសុខភាពល្អ​​ មិនមានជំងឺអ្វីដែលធ្ងន់​ធ្ងរ​នោះដែរ ហើយក៏អាច​រកចំណូលបានរៀង​រាល់ថ្ងៃ ដោយជា​មធ្យម​លោកអាច​រកចំណូលបានពីការ​ប្រមូលផល​បន្លែ​ចេញ​​​ចំ​ការ​១០ម៉ឺនរៀល​ក្នុងមួយថ្ងៃ ពីព្រោះថា​ដំណាំដែលបានដាំដុះក្នុងចំការ​គឺមានច្រើន​ប្រភេទ ​និងត្រូវ​ប្រ​មូល​​​វិ​ល​ជុំ ។

លោកបានចាប់​ផ្ដើមអនុវត្ត​ន៍កសិអេកូឡូស៊ី​ តាមរយៈអង្គការ​កសិកម្ម​មួយចំនួន​នៅ​ក្នុង​ខេត្ត​បាត់​ដំប​ង ​​ដូចជា ​បណ្ដាញ​កសិអេកូឡូស៊ីកម្ពុជា ( AliSEA ) អង្គការ​ GRET សមាគនិរន្តរភាពដី​ដើម្បីជីវិត  (​SSLA ) ជា​ដើម ដែលបានជួយផ្ដល់​បច្ចេកទេស​សម្រាប់​ការអនុវត្តន៍​កសិកម្មតាមបែប​កសិអេកូឡូស៊ីនេះ​ ។

ចំណែក លោក ​នឹម ឈៀង​ កសិករ​មួយរូបទៀតដែលអនុវត្ត​ន៍​កសិអេកូឡូស៊ី​ នៅភូមិ​ស្ដីក្រោម ឃុំព្រែក​ហ្លួង ស្រុក​ឯ​ក​​ភ្នំ ខេត្ត​បាត់ដំបង​ ក៏បាន​ឱ្យដឹងដែរថា លោកបានចាប់ផ្ដើម​ធ្វើ​កសិកម្ម​តាមបែប​កសិអេកូឡូស៊ី​នេះ​នៅក្នុងអំឡុងឆ្នាំ២០២១​ ដោយចាប់ផ្ដើមដាំដើមឈើ​ចម្រុះ ក្នុង​ដីរបស់លោក​សរុបជាង​ ៣ហិកតា ដូចជា​ ដើមឈើ​ប្រណីត​ ដំណាំស្រូវ និងដំណាំ​មួយចំនួនទៀត​ ព្រមទាំងមានចិញ្ចឹមសត្វផងដែរ ។

លោក​មានកូនទាំងអស់ ​៨នាក់ ​មានគ្រួសារ​​អស់​ហើយ ប៉ុន្តែរស់នៅក្នុងដី​រួមជុំគ្នា​ ហើយអនុវត្ត​ន៍កសិកម្ម​តាមបែបអេកូឡូស៊ី​នេះដូចជារូប​លោកដែលជាឪពុកដែរ ដោយការ​ដាំ​ដំណាំ​ចិញ្ចឹមសត្វ​ ជាពិសេស​កសិដ្ឋានចិញ្ចឹមសត្វជ្រូក​ ។ សម្រាប់​ដំណាំដែលដាំដុះ កូនៗ​របស់លោកបានបេះយកទៅលក់​នៅតាម​ផ្សារ យ៉ាងហោច​ណាស់ក៏បាន ២ ទៅ ៣ម៉ឺនរៀល​​ក្នុងមួយថ្ងៃដែរ។ និយាយទៅឱ្យ​តែឧស្សាហ៍ដើ​របេះ​គឺអាចរ​កលុយបានហើយ ។ ចំណែក​ផល​ដែលទទួលពីបានពីការ​ចិញ្ចឹមជ្រូក គឺទៅតាមកាល​កំណត់​ ដោយក្នុងនោះជាមធ្យម​ក្នុងមួយខែៗអាច​រក​ប្រាក់កម្រៃពី​របរចិញ្ចឹមជ្រូក​បាន ​២០ ទៅ ៣០លាន​រៀល ដោយមិនទាន់​ដក​ថ្លៃ​ចំណាយ​ចេញនៅឡើយ ។​

លោក​ នឹម ឈៀង បានបញ្ជាក់ថា​ តាមពិត​ទៅ​ដំបូង​ឡើយ លោកមានដី​តែ​បន្តិច​បន្តួច​ប៉ុណ្ណោះ ប៉ុន្តែ​ដោយ​សារ​តែការ​ស្រលាញ់​លើ​កសិកម្ម​ និង​មិនចង់​ទៅរស់​នៅទីណា​ឆ្ងាយ​ ក៏​បាន​សន្សំ​លុយដែលទទួល​បានពីកា​រងារ​កសិកម្ម​ដើម្បីយក​ទៅទិញដីអ្នកភូមិ​នៅជិត​គ្នា​បន្ថែមជា​បន្តបន្ទាប់ រហូតដល់​មានទំហំ​ដីសរុប​ជាង​៣ហិកតា ហើយទៅថ្ងៃមុខ​បើសិនជាសន្សំ​លុយ​បានច្រើន ​នឹង​ទិញ​ដី​​ដែលនៅជាប់ៗនោះបន្តបន្ទាប់ទៀត​បើសិនជា​មាន​អ្នក​លក់​​ឱ្យ។