បរទេស៖​ យោងតាម​ប្រភពព័ត៌មានពី CNBC បានរាយការណ៍ថា ក្រុមហ៊ុន​ផលិត​រថយន្ត​អគ្គិសនី​របស់​ចិន BYD  អាចនឹងយកឈ្នះលើ​ Tesla ក្នុងការលក់រថយន្តអគ្គិសនី EV នៅឆ្នាំនេះ ជាមួយនឹងក្ដីរំពឹងថា ទីផ្សាររថយន្តប្រើអគ្គិសនីសុទ្ធ BEV នឹងកើនឡើងផងដែរ។

យោងតាមការស្រាវជ្រាវមួយរបស់ Counterpoint បានបង្ហាញថា ការផ្លាស់ប្តូរនេះបានបញ្ជាក់ពីលក្ខណៈថាមវន្តនៃទីផ្សារ EV សកលលោក។ ការលក់យានយន្តអគ្គិសនី EV នៅត្រីមាសទី ២ របស់ BYD បានកើនឡើងជិត ២១ ភាគរយប្រចាំឆ្នាំ ឬស្ម់ើនឹងប្រមាណ ៤២៦ ០៣៩ គ្រឿង ខណៈដែលការចែកចាយរបស់ក្រុមហ៊ុន Tesla បានធ្លាក់ចុះ ៤,៨​ ភាគរយ ឬ មកនៅត្រឹម ៤៤៣ ៩៥៦ គ្រឿង។ កាលពីឆ្នាំមុន ផលិតកម្មសរុបរបស់ BYD មានចំនួនច្រើនជាង ៣ លានគ្រឿង ខណៈដែលផលិតកម្មរថយន្តសរុបរបស់ Tesla មានចំនួន ១,៨៤ លានគ្រឿងក្នុងរយៈពេល ២ ឆ្នាំជាប់គ្នា។

ក្រៅពីនេះ នៅមានកត្តាជាច្រើនដែលមានចំណែកក្នុងការធ្លាក់ចុះរបស់ក្រុមហ៊ុន Tesla ហើយកត្តាធំជាងគេគឺក្រុមហ៊ុននេះហាក់ដូចជាកំពុងបោះបង់ចោលនូវម៉ូដែលដែលមានតម្លៃសមរម្យជាងមុន។ មិនត្រឹមតែប៉ុណ្ណោះ រថយន្តរបស់ BYD មានតម្លៃថោកជាង ដោយម៉ូដែល Seagull ដែលទើបចេញថ្មីៗនេះមានតម្លៃត្រឹមតែជាង ១ ម៉ឺនដុល្លារតែប៉ុណ្ណោះ។ ទន្ទឹមនឹងនេះ ចិននៅតែជាកម្លាំងលេចធ្លោនៅក្នុងទីផ្សាររថយន្តប្រើអគ្គិសនីសុទ្ធ BEV ដោយ BYD នាំមុខគេ។ ការលក់រថយន្តប្រើអគ្គិសនីសុទ្ធ BEV របស់ចិនត្រូវបានប៉ាន់ប្រមាណថា នឹងមានចំនួន ៤ ដងនៃការលក់របស់អាមេរិកខាងជើងក្នុងឆ្នាំ២០២៤។ មិនត្រឹមតែប៉ុណ្ណោះ ចិននឹងបន្តកាន់កាប់ចំណែកទីផ្សារច្រើនជាង ៥០ ភាគរយនៃការលក់រថយន្តប្រើអគ្គិសនីសុទ្ធ BEV ទូទាំងពិភពលោករហូតដល់ឆ្នាំ២០២៤ ហើយការលក់ BEV របស់ចិនត្រូវបានព្យាករណ៍ថា នឹងឈានដល់កំពូលលើសពីការបូកបញ្ចូលគ្នានៃការលក់របស់អាមេរិកខាងជើង និងអឺរ៉ុបនៅឆ្នាំ២០៣០ ។

កាល​ពី​ខែ​មុន សហភាព​អឺរ៉ុប​បាន​ប្រកាស​ថា ខ្លួន​នឹង​ដំឡើង​ពន្ធ​បន្ថែម​លើ​ក្រុមហ៊ុន​រថយន្ត EV របស់​ចិន ដើម្បី​ដោះស្រាយករណីលំហូរចូលនៃរថយន្តមានចិនតម្លៃទាប និងការឧបត្ថម្ភដោយរដ្ឋាភិបាលចិន ដែលជា​ការ​គំរាម​កំហែងដល់​ឧស្សាហកម្ម​សហភាព​អឺរ៉ុប។ លើសពីនេះ ការដាក់ពន្ធបន្ថែមនឹងអនុវត្តចំពោះក្រុមហ៊ុនគោលដៅចំនួន ៣ រួមមាន៖ BYD ១៧,៤ ភាគរយ, Geely ២០ ភាគរយ, និង SAIC ៣៨,១​ ភាគរយ។ ការដាក់ពន្ធបន្ថែមនេះលើសពីស្តង់ដារពន្ធ ១០ ភាគរយ ដែលដាក់លើរថយន្ត EV នាំចូលរាល់ដង។ កាលពីខែមុន គណៈកម្មការអឺរ៉ុបបានលើកឡើងក្នុងសេចក្តីថ្លែងការណ៍មួយថា ការដាក់ពន្ធបន្ថែមនេះគឺ បណ្តោះអាសន្ន ប៉ុន្តែនឹងត្រូវអនុវត្តចាប់ពីថ្ងៃទី ៤ ខែកក្កដា ប្រសិនបើការពិភាក្សាជាមួយអាជ្ញាធរចិនមិនទទួលបានដំណោះស្រាយជាលទ្ធផល។

លោក Liz Lee នាយករងរបស់ Counterpoint Research បាននិយាយថា អត្រាពន្ធថ្មីរបស់សហភាពអឺរ៉ុបសម្រាប់រថយន្ត EV របស់ចិនមានគោលបំណងកម្រិតទីផ្សារសម្រាប់ក្រុមហ៊ុនផលិត EV នៅអឺរ៉ុប ដែលកំពុងតស៊ូប្រកួតប្រជែងជាមួយនឹងការនាំចូលក្នុងតម្លៃទាបពីប្រទេសចិន។ យ៉ាងណាមិញ ការដាក់ពន្ធបន្ថែមទអាចជំរុញឱ្យក្រុមហ៊ុនផលិតរថយន្តចិនឆ្ពោះទៅរកទីផ្សារដែលកំពុងរីកចម្រើនដូចជាមជ្ឈិមបូព៌ា និងអាហ្វ្រិក អាមេរិកឡាទីន អាស៊ីអាគ្នេយ៍ អូស្ត្រាលី និងនូវែលសេឡង់។

របាយការណ៍ពី Counterpoint  បង្ហាញថា ការលក់រថយន្តប្រើអគ្គិសនីសុទ្ធ BEV ជាសកលត្រូវបានព្យាករណ៍ថានឹងឈានដល់ ១០ លាននៅឆ្នាំ ២០២៤​ ខណៈដែលរថយន្តប្រើម៉ាស៊ីនចំហេះខាងក្នុងកំពុងធ្លាក់ចុះជាប្តបន្ទាប់។ កំណើននេះនឹងត្រូវបានគាំទ្រដោយកិច្ចខិតខំប្រឹងប្រែងក្នុងគោលបំណងធ្វើឱ្យការចំណាយ និងកំណត់តម្លៃសមរម្យសម្រាប់ EV ឲ្យមានប្រសិទ្ធភាព៕