បរទេស៖ យោងតាមប្រភពព័ត៌មានពី BBC បានរាយការណ៍ថា តុលាការពាណិជ្ជកម្មអាម៉េរិកបានរារាំងប្រធានាធិបតី Donald Trump ពីការប្រើអំណាចនៃច្បាប់គ្រាអាសន្នជាមធ្យោបាយដាក់ពន្ធគយលើប្រទេសដទៃ។

តុលាការពាណិជ្ជកម្មអាម៉េរិកបានសម្រេចថា ច្បាប់គ្រាអាសន្នមិនបានផ្តល់នូវសិទ្ធិអំណាចឱ្យប្រធានាធិបតីដាក់ពន្ធលើស្ទើរតែគ្រប់ប្រទេសនោះទេ។​ លើសពីនេះ រដ្ឋធម្មនុញ្ញរបស់សហរដ្ឋអាម៉េរិកផ្តល់នូវអំណាចផ្តាច់មុខឱ្យសភាក្នុងការគ្រប់គ្រងពាណិជ្ជកម្មជាមួយប្រទេសផ្សេងទៀតមិនមែនប្រធានាធិបតីនោះទេ។ តុលាការក៏បានរារាំងការយកពន្ធដាច់ដោយឡែករបស់រដ្ឋបាល Trump ដែលដាក់លើប្រទេសចិន ម៉ិចស៊ិក និងកាណាដាផងដែរ។

មជ្ឈមណ្ឌលយុត្តិធម៌សេរីភាពមិនលំអៀងតំណាងឲ្យអាជីវកម្មខ្នាតតូចចំនួន៥ បានដាក់បណ្តឹងនេះទៅកាន់តុលាការពាណិជ្ជកម្មអាម៉េរិក ដោយសារការនាំចូលទំនិញពីបរទេសត្រូវបានជាប់ពន្ធគយដែលដាក់ដោយ Trump ។ អគ្គមេធាវី  Letitia James នៃទីក្រុងញូវយ៉ក ដែលជារដ្ឋមួយក្នុងចំណោមរដ្ឋចំនួន ១២ ដែលជាប់ពាក់ព័ន្ធក្នុងបណ្តឹងនេះ បានសារទរចំពោះការសម្រេចចិត្តនេះ “ច្បាប់បានបញ្ជាក់ច្បាស់ណាស់ថា គ្មានប្រធានាធិបតីណាមានអំណាចដំឡើងពន្ធទៅលើច្រើនប្រទេសតាមតែចិត្តឯងនោះទេ។ ប្រសិនបើការដាក់ពន្ធគយនៅមានបន្តទៀត វានឹងបណ្តាលឲ្យអាម៉េរិកមានអតិផរណាកាន់តែខ្ពស់ ការខូចខាតសេដ្ឋកិច្ចប៉ះពាល់ដល់អាជីវកម្មគ្រប់ទំហំ និងការបាត់បង់ការងារនៅទូទាំងប្រទេស ដោយសារអ្នករងគ្រោះពីការដំឡើងពន្ធគឺជាពលរដ្ឋ និងអាជីវកម្មអាម៉េរិក។ មិនត្រឹមតែប៉ុណ្ណោះ ទីផ្សារហិរញ្ញវត្ថុសកលមានភាពមិនច្បាស់លាស់ ចាប់តាំងពី Trump បានប្រកាសពន្ធគយ ដោយសារវិធានការមួយចំនួនត្រូវបានផ្លាស់ប្តូរ ឬពន្ធត្រូវបានកាត់បន្ថយនៅពេលដែលសេតវិមានបានចរចាជាមួយរដ្ឋាភិបាលបរទេស។

ករណីនេះគឺជាបញ្ហាប្រឈមផ្លូវច្បាប់មួយក្នុងចំណោមបញ្ហាប្រឈមផ្លូវច្បាប់ចំនួន ៧ ពាក់ព័ន្ធចំពោះគោលនយោបាយពាណិជ្ជកម្មរបស់រដ្ឋបាល Trump និងក្នុងចំណោមបញ្ហាប្រឈមពីរដ្ឋចំនួន ១៣ រួមទាំងក្រុមអាជីវកម្មខ្នាតតូចផ្សេងទៀត។ នៅក្នុងសេចក្តីសម្រេចនេះ ចៅក្រមចំនួន ៣រូប បានវិនិច្ឆ័យថា Trump បានលើកឡើងពីច្បាប់ស្តីពីអំណាចសេដ្ឋកិច្ចគ្រាអាសន្នអន្តរជាតិ (IEEPA) ឆ្នាំ១៩៧៧ ដើម្បីបង្ហាញអំពីភាពត្រឹមត្រូវរបស់គាត់ក្នុងការដាក់ពន្ធ។ នេះមានន័យថា ច្បាប់ IEEPA អនុញ្ញាតឱ្យប្រធានាធិបតីធ្វើសកម្មភាពក្នុងអំឡុងពេលប្រទេសមានអាសន្ន ដូចជា ការបង្កកទ្រព្យសម្បត្តិបរទេស ឬការទប់ស្កាត់ពាណិជ្ជកម្ម ប៉ុន្តែស្ថិតនៅក្នុងវិធីដែលមានកម្រិត និងជាមួយនឹងច្បាប់ជាក់លាក់ប៉ុណ្ណោះ មិនមែនផ្តល់អំណាចឱ្យគាត់ក្នុងការដាក់ពន្ធគយនោះទេ។

បន្ទាប់ពីសេចក្តីសម្រេចចេញបានប៉ុន្មាននាទី រដ្ឋបាល Trump បានដាក់បណ្តឹងឧទ្ធរណ៍។ អ្នកនាំពាក្យរងរបស់សេតវិមាន Kush Desai បាននិយាយនៅក្នុងសេចក្តីថ្លែងការណ៍មួយថា “វាមិនមែនសម្រាប់ចៅក្រមដែលមិនជាប់ឆ្នោតក្នុងការសម្រេចចិត្តពីរបៀបដោះស្រាយត្រឹមត្រូវសម្រាប់ភាពអាសន្នជាតិនោះទេ។ ប្រធានាធិបតី Trump បានសន្យាថា នឹងដាក់អាម៉េរិកជាអាទិភាព ហើយរដ្ឋបាលបានប្តេជ្ញាចិត្តក្នុងការប្រើប្រាស់អំណាចប្រតិបត្តិគ្រប់កម្រិត ដើម្បីដោះស្រាយវិបត្តិនេះ និងស្ដារឡើងវិញនូវភាពអស្ចារ្យរបស់អាម៉េរិក៕