សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតមកដល់បច្ចុប្បន្ននេះ កម្ពុជាមានរោងចក្រដំឡើងរថយន្តចំនួន៥ ហើយរោងចក្រដំឡើងរថយន្តទាំងនោះត្រូវនាំចូលគ្រឿងបង្គុំពីប្រទេសក្រៅដើម្បីមកដំឡើង ដែលធ្វើឱ្យរថយន្តដែលដំឡើងក្នុងប្រទេសកម្ពុជានៅតែមានតម្លៃខ្ពស់ដដែល ហេតុនេះហើយទើបកម្ពុជាបានស្នើឱ្យក្រុមហ៊ុនជប៉ុនមួយវិនិយោគលើរោងចក្រផលិតគ្រឿងបង្គុំរថយន្តនៅក្នុងប្រទេសជំនួសឱ្យការនាំចូលវិញ ។
យោងតាមប្រសាសន៍សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាក្នុងជំនួបជាមួយថ្នាក់ដឹកនាំនៃក្រុមហ៊ុន Toyota Tsusho Manufacturing Cambodia កាលពីថ្ងៃទី០៨ ខែកក្កដា ឆ្នាំ២០២៤ សម្ដេចបានលើកទឹកចិត្តឱ្យក្រុមហ៊ុន Toyota ពិនិត្យលទ្ធភាព និងពិចារណា ក្នុងការផលិតគ្រឿងបន្លាស់ ( Spare Parts )របស់ក្រុមហ៊ុនតូយ៉ូតា ដែលមិនត្រឹមតែសម្រាប់ផ្គត់ផ្គង់ដល់ក្រុមហ៊ុនតូយ៉ូតានៅកម្ពុជានោះទេ ប៉ុន្តែថែមទាំងផ្គង់ផ្គង់ដល់ក្រុមហ៊ុនតូយ៉ូតានៅតាមបណ្ដាប្រទេសផ្សេងៗទៀត និងពិនិត្យលទ្ធភាព ពិចារណាលើការភ្ជាប់កិច្ចសហការជាមួយនឹងបណ្ដាក្រុមហ៊ុនក្នុងស្រុកដែលអាចផ្គត់ផ្គង់ជាសម្ភារៈបរិក្ខារបន្ទាប់បន្សំ ( Accessories ) បំពាក់លើរថយន្តតូយ៉ូតា ។
នៅក្នុងជំនួបនោះដែរ លោក Fujita Ryoji នាយកក្រុមហ៊ុន Toyota Tsusho Manufacturing ( Cambodia ) បានមានប្រសាសន៍ថា ក្រុមហ៊ុនមានគម្រោងក្នុងការបង្កើតសាលាបណ្ដុះបណ្ដាលជំនាញយានយន្តមួយនៅកម្ពុជាស្របទៅតាមអនុសាសន៍ណែនាំរបស់សម្ដេចធិបតី ហ៊ុន ម៉ាណែត នៅក្នុងឱកាសសម្ពោធដំណើរការរោងចក្រដំឡើងរថយន្តតូយ៉ូតាកាលពីអំឡុងដើមខែឧសភា ឆ្នាំ២០២៤ ។
បើតាមលោក សឿន ដារ៉ា នាយកប្រតិបត្តិសហព័ន្ធឧស្សាហកម្មកម្ពុជាបានលើកឡើងថា ទោះបីជាកម្ពុជាមានរោងចក្រដំឡើងរថយន្តក្នុងស្រុករហូតដល់៥រោងចក្រក៏ដោយ តែតម្លៃរថយន្តថ្មីៗ នៅលើទីផ្សារប្រទេសកម្ពុជានៅតែមានតម្លៃខ្ពស់ ពីព្រោះថាកម្ពុជាមិនទាន់មានរោងចក្រផលិតគ្រឿងបង្គុំ ( Accessories ) ដោយខ្លួនឯង គឺត្រូវពឹងលើការនាំចូលពីក្រៅប្រទេសដដែល ។
គួរបញ្ជាក់ថា គិតមកដល់បច្ចុប្បន្ននេះ មានរោងចក្រដំឡើងរថយន្តចំនួន ៥ហើយកំពុងដំណើរការដំឡើងរថយន្តនៅកម្ពុជា ក្នុងនោះរួមមាន ក្រុមហ៊ុន Hyundai Camko Motor ក្រុមហ៊ុន Daehan Auto ក្រុមហ៊ុន RMA Cambodia ( Ford ) ក្រុមហ៊ុន GTV Motor និងក្រុមហ៊ុន Toyota Tsusho Manufacturing Cambodia ។ ក្រៅពីនេះក៏មានរោងចក្រដំឡើងរថយន្តចំនួន ៣ទៀត កំពុងរៀបចំរចនាសម្ព័ន្ធ ដើម្បីដំណើរការខ្សែច្រវាក់ផលិតកម្មនៅពេលឆាប់ៗនេះ រួមមានក្រុមហ៊ុន HGB Motors Assembly , ក្រុមហ៊ុន EM Automotive និង ក្រុមហ៊ុន China Matrix Technology ។
តាមរយៈរោងចក្រដំឡើងរថយន្តធំៗទាំងនេះ បានផ្ដល់ឱកាសការងារ និងជំនាញដល់ធនធានមនុស្សក្នុងប្រទេសកម្ពុជា ជាពិសេសធ្វើឱ្យតំបន់នៅជុំវិញរោងចក្រនោះមានសក្ដានុពលទាក់ទាញការវិនិយោគពីក្នុង និងក្រៅប្រទេសមួយកម្រិតថែមទៀតផងដែរ ៕
Account
Security
Favourite Content