សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កម្ពុជា និងវៀតណាម គ្រោងនឹងសាងសង់ច្រករបៀងដឹកជញ្ជូនដែលមានសមត្ថភាពខ្ពស់រវាងទីក្រុងភ្នំពេញ និងទីក្រុងហូជីមិញ នៅក្នុងឆ្នាំនេះ ស្របពេលកម្ពុជា កំពុងមានបញ្ហាព្រំដែនគោកជាមួយប្រទេសថៃ។
សារព័ត៌មាន VnExpress បានរាយការណ៍កាលពីចុងសប្តាហ៍កន្លងទៅ ថា ការសាងសង់អាចនឹងចាប់ផ្ដើមនៅត្រីមាសទី ៣ ឆ្នាំ ២០២៦ និងគ្រោងបញ្ចប់ការសាងសង់នៅឆ្នាំ ២០២៧។
កាសែតដដែលបញ្ជាក់ថា ច្រករបៀងថ្មីនេះដើម្បីពង្រីកវិសាលភាពនៃវិស័យសំខាន់ៗ របស់ប្រទេសទាំងពីរ ដែលសម្រួលដល់អ្នកធ្វើដំណើរ និងការដឹកជញ្ជនទំនិញ។ ហើយច្រករបៀងនេះគឺជាការតភ្ជាប់រវាងក្រុងភ្នំពេញ និងទីក្រុង ហូជីមិញ ដែលជាជំហានដ៏សំខាន់សម្រាប់លំហូរទេសចរណ៍ឆ្លងកាត់ព្រំដែនដ៏សកម្មបំផុតមួយរបស់អាស៊ីអាគ្នេយ៍។
សម្រាប់ច្រករបៀងថ្មីនេះ ភាគីវៀតណាម កំពុងវិនិយោគ ១,៥៥ ពាន់លានដុល្លារ ក្នុងគម្រោងផ្លូវចំនួន៣ រួមទាំងការពង្រីកមហាវិថី Vo Van Kiet ដើម្បីកែលម្អផ្លូវចូលទៅកាន់ព្រំដែន Moc Bai ។ ចំណែក ភាគីកម្ពុជា កំពុងសាងសង់ផ្លូវល្បឿនលឿនភ្នំពេញ-បាវិតតម្លៃ ១,៦ ពាន់លានដុល្លារ ដើម្បីកាត់បន្ថយពេលវេលាធ្វើដំណើរ និងការកកស្ទះ។
ឯកឧត្តម ផន រឹម អ្នកនាំពាក្យក្រសួងសាធារណៈការ និងដឹកជញ្ជូន បានបញ្ជាក់ប្រាប់ថា គម្រោងសាងសងផ្លូវល្បឿនលឿនភ្នំពេញ- បាវិត បានបើកការដ្ឋានសាងសង់កាលពីខែមិថុនា ឆ្នាំ ២០២៣ នឹងគ្រោងបញ្ចប់នៅឆ្នាំ ២០២៧ ដែលបច្ចុប្បន្ន កម្ពុជា កំពុងចរចាជាមួយភាគីវៀតណាម ពីការតភ្ជាប់នៅចំណុចភូមិសាស្រ្តព្រំដែនកម្ពុជា-វៀតណាម។
លោក ជា ចាន់ដារ៉ា ប្រធានសមាគមដឹកជញ្ជូនកម្ពុជា ចាត់ទុកការបើកច្រករបៀងថ្មីរវាងកម្ពុជា និងវៀតណាម គឺជាការបើកច្រកសេដ្ឋកិច្ចថ្មី។ ប្រធានសមាគមដឹកជញ្ជូនកម្ពុជា លើកឡើងថា វិស័យដឹកជញ្ជូនកម្ពុជានឹងកាន់តែខិតជិតមួយកម្រិតបន្ថែមទៀត ដែលជួយកាត់បន្ថយពេលវេលា និងការចំណាយលើថ្លៃដឹកជញ្ជូនរបស់កម្ពុជា។
លោក ជា ចាន់ដារ៉ា បានឱ្យដឹងដូច្នេះ៖
“នេះជាសមិទ្ធិផលដ៏ល្អថ្មីមួយរបស់កម្ពុជា។ ការបើកច្រកស្មើនឹងការបើកសេដ្ឋកិច្ច។”
កម្ពុជា បានចាប់យកប្រទេសវៀតណាម ជំនួសឱ្យប្រទេសថៃ ដើម្បីពង្រីកទីផ្សារបន្ថែម បន្ទាប់ពីកម្ពុជា មានជម្លោះព្រំដែនជាមួយថៃ តាំងពីចុងខែឧសភា ឆ្នាំ ២០២៥ មក ដែលធ្វើឲ្យប្រទេសវៀតណាម ក្លាយជាដៃគូពាណិជ្ជកម្មធំលំដាប់ទី៣ និងជាទីផ្សារនាំចេញធំទី ២ របស់កម្ពុជាផងដែរ បន្ទាប់ពីទីផ្សារសហរដ្ឋអាមេរិក។
យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា នៅរយៈពេល ២ ខែ ដើមឆ្នាំ ២០២៦ នេះ ពាណិជ្ជកម្មទ្វេភាគីរវាងកម្ពុជា និងវៀតណាម សម្រេចបានទំហំទឹកប្រាក់ជាង ១,២ ពាន់លានដុល្លារ។ ក្នុងនោះ កម្ពុជា បាននាំចេញទំនិញទៅកាន់ទីផ្សារវៀតណាម ក្នុងទំហំទឹកប្រាក់ជាង ៥២៥ លានដុល្លារ៕
អត្ថបទ៖ ខន ណារី
Account
Security
Favourite Content