សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សម្រាប់បងប្អូនដែលរស់នៅតាមបណ្ដោយដងទន្លេ នៅរដូវប្រាំងដែលទឹកទន្លេស្រកអស់បន្សល់នូវដីមាត់ច្រាំងទន្លេជាប្រភេទដីល្បាប់មានជីជាតិល្អសម្រាប់ដាំដំណាំ និងទទួលបានទិន្នផលខ្ពស់។ នៅក្នុងនោះ តាមរយៈបទពិសោធរបស់ប្រជាកសិករដោយផ្ទាល់ មានការដាំដំណាំមួយចំនួនដែលមានភាពងាយស្រួលក្នុងការដាំដុះ ហើយអាចទទួលបានទិន្នផលខ្ពស់ក្នុងរយៈពេលខ្លី។
អ្នកស្រី ឆីវ ស៊ាង ជាអ្នកដាំដំណាំម្នាក់រស់នៅស្រុកក្រូចឆ្មារ ខេត្តត្បូងឃ្មុំ បានប្រាប់ AMS ឱ្យដឹងថា សម្រាប់ដីដែលនៅជាប់ច្រាំងទន្លេគឺអាចដាំដំណាំបានច្រើនប្រភេទ ហើយទទួលបានផលល្អ ដោយសារតែនៅពេលរដូវប្រាំងពេលទឹកស្រកអស់បានបន្សល់នូវដីមានជីជាតិដែលអាចដាំដំណាំផ្សេងៗបាន ដោយភាគច្រើនជាប្រភេទដំណាំរយៈពេលខ្លី និងមិនចាំបាច់ថែទាំច្រើន។
អ្នកស្រីបញ្ជាក់ថា ៖
“សម្រាប់ដីច្រាំងទន្លេមុខផ្ទះរបស់ខ្ញុំ ភាគច្រើនចាប់ផ្ដើមដាំនៅរដូវទឹកស្រក ប្រហែលជាពាក់កណ្ដាលខែតុលា ដែលយើងអាចដាំដំណាំបានច្រើនប្រភេទ ដូចជា ប៉េងប៉ោះ ត្រប់ ពោត ប៉ិគួៈ សណ្ដែងដី ដំឡូង ស្ពៃ ត្រកួន ត្រឡាច ជាដើម ដែលយើងអាចដាំ និងទទួលផលបានក្នុងរយៈពេលខ្លី”
អ្នកស្រីបន្តថា ៖
“ចំពោះការដាំ ភាគច្រើនយើងធ្វើតាមដំណាក់កាល តួយ៉ាងបន្ទាប់ពីទឹកស្រកភ្លាមយើងចាប់ផ្ដើមសម្អាតដីដើម្បីដាំប៉េងប៉ោះ ពោតជាដើម។ លុះទឹកស្រកជាបន្តទៀត យើងក៏កាប់ដីដាំដំណាំបន្ទាប់បន្សំទៀត ពោលគឺយើងអាចដាំបានច្រើនមុខឱ្យតែយើងមានកម្លាំង និងពេលវេលាគ្រប់គ្រាន់ក្នុងការដាំដុះ និងថែទាំ”
អ្នកស្រី ឆីវ ស៊ាង បានបញ្ជាក់បន្តថា ៖
“ការដាំដំណាំនៅតាមច្រាំងទន្លេនេះ ពុំចាំបាច់ថែទាំអ្វីច្រើននោះទេ ដោយសារដីនៅច្រាំងទន្លេរជាដីល្បាប់មានជីជាតិស្រាប់ យើងគ្រាន់តែស្រោចទឹកចំពោះដំណាំខ្លះដែលត្រូវការទឹកជាចំបាច់ប៉ុណ្ណោះ។ សម្រាប់រយៈពេលដាំវិញ ជាធម្មតាគេដាំនិងអាចប្រមូលផលត្រឹមរយៈ ២ខែកន្លះទៅ ៣ខែបន្ទាប់ លុះប្រមូលផលអស់ ឈានដល់ខែវស្សាដែលមានធ្លាក់ភ្លៀង គេក៏អាចដាំដំណាំបានម្ដងទៀតដែលភាគច្រើនគេដាំល្ងរ ឬដាំពោត និងអាចទទួលបានផលជាបន្តបន្ទាប់រហូតដល់ទឹកទន្លេឡើងលិចច្រាំងតែម្ដង”
តាមរយៈការដាំដំណាំចម្រុះនេះ អ្នកស្រី ឆីវ ស៊ាង អាចទទួលបានចំណូលតិចតួចប្រចាំថ្ងៃតាមរយៈការលក់កសិផលចម្រុះទាំងនេះដែលជាផ្នែកមួយជួយដល់សេដ្ឋកិច្ចក្នុងគ្រួសារ ជាពិសេសវាក៏ជាប្រភពផ្ដល់បន្លែធម្មជាតិសម្រាប់ចម្អិនក្នុងគ្រួសារផង និងចែកដល់សាច់ញាតិផង ចៀសវាងការទិញបន្លែដែលមានជាតិគីមីប៉ះពាល់ដល់សុខភាព។
ជាចុងក្រោយ អ្នកស្រី ឆីវ ស៊ាង ក៏បានផ្ដាំផ្ញើដល់អ្នកដែលមានដីជាប់ច្រាំងទន្លេគប្បីកែច្នៃបង្កើនការដាំដុះដំណាំផ្សេងៗដើម្បីទទួលបានផលប្រយោជន៍ច្រើន តាមរយៈការទទួលបានចំណូលពីការប្រមូលផលលក់ទៅកាន់ទីផ្សារ ក៏ដូចជាការផ្គត់ផ្គង់ផ្នែកម្ហូបអាហារប្រចាំថ្ងៃដែលគ្មានសារធាតុគីមីប៉ះពាល់ដល់សុខភាព៕
Account
Security
Favourite Content