ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា នៅក្នុងរយៈពេល ៤៥ថ្ងៃ ពោលគឺចាប់ពីថ្ងៃទី១៥ ខែវិច្ឆិកា ដល់៣០ ខែធ្នូ ឆ្នាំ២០២៣ មានយុវជនយុវនារី ដែលមកពី​គ្រួសារក្រីក្រ និងងាយរងហានិភ័យ បានចុះឈ្មោះចូលរួមបណ្តុះបណ្តាលជំនាញវិជ្ជាជីវៈ និងបច្ចេកទេស ប្រមាណជិត២ម៉ឺននាក់ ខណៈក្រសួងការងារនឹងបើកវេសនកាលទូទាំងប្រទេសនៅថ្ងៃទី១៥ ខែមករា ឆ្នាំ២០២៤ ខាងមុខនេះ។

លោក កត្តា អ៊ន អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានប្រាប់ឱ្យដឹងនៅថ្ងៃទី៣១ ខែធ្នូ ឆ្នាំ២០២៣ថា នៅក្នុងរយៈពេល៤៥ថ្ងៃ ក្រោយប្រកាសដាក់ឱ្យអនុវត្តគោលនយោបាយ មានយុវជនប្រមាណជិត២ម៉ឺននាក់ បានចុះឈ្មោះចូលរួមបណ្តុះបណ្តាលជំនាញវិជ្ជាជីវៈ និងបច្ចេកទេស នៅតាមសាលាវិជ្ជាជីវៈផ្សេងៗ ដែលនេះគឺមោទកភាព និងជា​ជោគជ័យរបស់រាជរដ្ឋាភិបាល និងក្រសួងការងារ។

លោកបានបញ្ជាក់ថា ៖

«វាជាជោគជ័យរបស់ក្រសួងការងារ ដែលបានប្រឹងប្រែងផ្សព្វផ្សាយពីព័ត៌មានដល់យុវជន គ្រប់ស្រ​ទា​ប់ គ្រប់ទីកន្លែងទាំងអស់ តាមរយៈការចុះឈ្មោះនៅតាមគ្រឹះស្ថានដោយផ្ទាល់ ដែលមានចំនួន៣៧គ្រឹះស្ថានទូទាំងប្រទេ​ស និងតាមរយៈការទំនាក់ទំនងមកមន្ទីរការងារទាំង២៥រាជធានីខេត្ត ក៏ដូចជាអាជ្ញាធរដែនដីឃុំសង្កាត់ដែលនៅជាប់លំ​នៅ​​ឋានរបស់គាត់»។

លោក កត្តា អ៊ន បានបន្ថែមថា ក្រសួងបានសហការជាមួយគ្រប់ភាគីពាក់ព័ន្ធទាំងអស់ ដើម្បីធ្វើយ៉ាងណាជំរុញការផ្ស​ព្វផ្សា​យឱ្យបានកាន់តែទូលំទូលាយ ជាពិសេសក្រុមការងាររបស់ក្រសួងបានចុះទៅតាមខ្នងផ្ទះរបស់ប្រជាពលរដ្ឋផ្ទាល់តែម្តង ដែ​ល​នេះគឺជាសកម្មភាពមួយបានធ្វើឱ្យមហាជន និងយុវជនមានការចាប់អារម្មណ៍ចំពោះការចុះឈ្មោះចូលរួមបណ្តុះបណ្តាលវិជ្ជាជីវៈនេះ។

«វិទ្យាស្ថានបណ្តុះបណ្តាលបច្ចេកទេស និងវិជ្ជាជីវៈទាំងអស់ដែលស្ថិតនៅក្រោមការគ្រប់គ្រងរបស់ក្រសួងការងារ នឹងបើកបវេសនកាលព្រមគ្នានៅថ្ងៃទី១៥ ខែមករា ឆ្នាំ២០២៤ខាងមុខនេះ ដើម្បីផ្តើមការបណ្តុះបណ្តាលវគ្គទី១។ កម្មវិធីបើកប​វេ​ស​នកាលធំ គឺធ្វើឡើងនៅវិទ្យាស្ថានជាតិពហុបច្ចេកទេសកម្ពុជា(NPIC)​ ដែលជានិមិត្តរូបនៃការបើកវគ្គបណ្តុះបណ្តាលនូវទូទាំងប្រទេសនៃកម្មវិធីថ្នាក់ជាតិរបស់រាជរដ្ឋាភិបាលកម្ពុជាដែលបានប្រកាសដាក់ចេញឱ្យអនុវត្តកាលពីថ្ងៃទី១៤ ខែវិច្ឆិកា ឆ្នាំ២០២៣ដោយសម្តចមហាបវរធិបតី ហ៊ុន ម៉ាណែត»។  នេះបើតាម លោក កត្តា អ៊ន​ បានបញ្ជាក់ប្រាប់បន្ថែម។

លោកបានលើកឡើងដែរ​ថា យុវជនមកពីគ្រួសារក្រីក្រ ជាង ១៩ ០០០ នាក់ ដែលបានមកចុះឈ្មោះចូលរៀននេះ ក្នុងនោះ​មាននៅរាជធានីភ្នំពេញ ច្រើនជាងគេ ខណៈដែលវិស័យដែលទទួលបានការចាប់អារម្មណ៍ច្រើនជាងគេគឺ វិស័យសំណង់, អគ្គិសនី និងថាមពល, អេឡិចត្រូនិក, កម្មន្តសាល, មេកានិចទូទៅ/មេកានិចរថយន្ត, ធុរកិច្ច និងព័ត៌មានវិទ្យា និ​ងបរិក្ខារត្រជាក់ និងកម្តៅជាដើម។ ​

អ្នកនាំពាក្យក្រសួងការងារ ក៏​បានរំលឹក​ដែរ​ថា ដើម្បីទទួលបានសិស្សចុះឈ្មោះចូលរៀន មន្ត្រីក្រសួងគ្រប់ជាន់ថ្នាក់ និងវិទ្យាស្ថានទូទាំងប្រទេស បានចេញយុទ្ធនាការគោះទ្វាគ្រប់ខ្នងផ្ទះនៅគ្រប់ច្រកល្ហក និងទីប្រជុំជនដើម្បីប្រកាស និងពន្យល់ពីកម្មវិធីថ្នាក់ជាតិធ្វើយ៉ាងណាឱ្យក្រុមយុវជនគោលដៅចុះឈ្មោះចូលរៀន។

លោក តាន់ មុនីវណ្ណ អនុប្រធានសភាពាណិជ្ជកម្មកម្ពុជា និងជាប្រធានសហព័ន្ធឧស្សាហកម្មយានយន្តកម្ពុជា បានលើកឡើងដែរថា ការបណ្តុះបណ្តាលជំនាញវិជ្ជាជីវៈ និងបច្ចេកទេសទៅដល់យុវជនមកពីគ្រួសារក្រីក្រ និង​ងាយរងហានិភ័យចំនួន ១,៥ លាននាក់ ដែលប្រមុខរដ្ឋាភិបាលបានប្រកាសដាក់ឱ្យអនុវត្ត​នេះ គឺជាកម្មវិធីបណ្តុះបណ្តាលដ៏ត្រឹមត្រូវ និងចំគោ​លដៅ ក៏ដូចជាតម្រូវការ ដើម្បីឱ្យយុវជនមកពីគ្រួសារក្រីក្រ និងងាយរងគ្រោះអាចឆាប់មានជំនាញវិជ្ជាជីវៈ និងឆាប់មា​នការងារធ្វើសមរម្យដើម្បីលើកកម្ពស់ជីវភាពគ្រួសារ។

លោកបាននិយាយថា កន្លងទៅ វិនិយោគិនបរទេស អាចនឹងមានការស្ទាក់ស្ទើ ក្នុងការវិនិយោគលើវិស័យឧស្សាហកម្មធុនមធ្យម ឬធុនធ្ងន់ ដោយសារតែបង្ហាញកង្វះខាតកំលាំងពលកម្មជំនាញ។ ដូច្នេះដាក់នូវគោលនយោបាយនេះ វិស័យឯកជ​ន រីករាយ និងគាំទ្រយ៉ាងខ្លាំង។

លោកបានបញ្ជាក់ថា ៖

«ជាការពិតណាស់ នៅកម្ពុជាយើង មានកំលាំងយុវជនច្រើន ប៉ុន្តែយើងនៅខ្វះការបណ្តុះបណ្តាលលើជំនាញបច្ចេកទេស ដែលជាតម្រូវការទីផ្សារការងារ។ ខ្ញុំសង្ឃឹមថា ចាប់ពីឆ្នាំ២០២៤តទៅ យើងនឹងលែងខ្វះខាតកម្លាំងពលកម្មទៀត តាមរយៈកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសនេះ ដែលនឹងផ្តល់នូវធនធានមនុស្ស ដែលប្រ​កបដោយចំណេះជំនាញពិតប្រាកដ ដែលអាចបម្រើការដល់វិស័យអាទិភាពរបស់កម្ពុជាយើង»។

បើតាមក្រសួងការងារ ការបណ្តុះបណ្តាលនេះ នឹងផ្តោតលើវិស័យចំនួន១០ មាន៣៨ មុខជំនាញដែល​ វិស័យទាំង១០នោះ រួមមាន៖ វិស័យសំណង់, អគ្គិសនី, អេឡិចត្រូនិច, បរិក្ខាក្តៅនិងត្រជាក់, មេកានិចទូទៅ និងមេកានិចរថយន្ត,ទេសចរណ៍, សេវាកម្ម, កសិកម្មនិងកសិឧស្សាហកម្ម, ធុរកិច្ច និងបច្ចេកវិទ្យាព័ត៌មាន៕ អត្ថបទ (CPA) ៖ វណ្ណ សុជាតា​