បរទេស ៖ ​កាលពីថ្ងៃអង្គារ ខែមេសា កន្លងទៅនេះ ក្រុមហ៊ុន Alibaba បាននិយាយថា ខ្លួនគ្រោងនឹងបែងចែកអង្គភាពជា ៦ គឺ Cloud Intelligence Group, Taobao Tmall Commerce Group, Local Services Group, Cainiao Smart Logistics Group, Global Digital Commerce Group, និង Digital Media and Entertainment Group  ដើម្បីស្វែងរកមូលនិធិ ឬការចុះបញ្ជី ដើម្បីរៀបចំរចនាសម្ព័ន្ធឡើងវិញ និងត្រូវបានចាត់ទុកថាជាព្រឹត្តិការណ៍មិនធ្លាប់មានដ៏ធំបំផុតនៅក្នុងពិភពក្រុមហ៊ុនបច្ចេកវិទ្យាក្នុងប្រវត្តិសាស្រ្តជាង ២៤ ឆ្នាំមកនេះ។

តើក្រោយការប្រកាសនេះវាបានធ្វើឲ្យទីផ្សារមានការប្រែប្រួលយ៉ាងណាខ្លះ?

ភាគហ៊ុនដែលបានចុះបញ្ជីនៅហុងកុងបានកើនឡើងដល់ទៅ ១៦,៣ ភាគរយ ហើយភាគហ៊ុនដែលបានចុះបញ្ជីនៅសហរដ្ឋអាមេរិកបានកើនឡើង ១៤,៣ ភាគរយក្នុងពេលមួយយប់ ដែលនាំឱ្យសន្ទស្សន៍ហ៊ុន Hang Seng និង ទីផ្សារហ៊ុនកាន់តែមានភាពទូលំទូលាយ។

ស្របពេលនេះដែរ ក្រុមហ៊ុន SoftBank Group Corp នៅជប៉ុនដែលមានភាគហ៊ុន ១៣,៧ ភាគរយនៅក្នុង Alibaba បានកើនឡើងបន្ថែម ៦,២ ភាគរយ។ លើសពី ភាគហ៊ុននៅក្នុង JD.com Inc ដែលជាគូប្រជែងពាណិជ្ជកម្មអេឡិចត្រូនិកដ៏យូរអង្វែងរបស់ Alibaba បានកើនឡើងដល់ទៅ ៧,៨ ភាគរយ ហើយភាគហ៊ុនក្រុមហ៊ុន Tencent Holdings Ltd ដែលជាក្រុមហ៊ុនហ្គេមដ៏ធំបំផុតរបស់បានកើនឡើងរហូតដល់ ៥,១ ភាគរយ។ ការផ្លាស់ប្តូរនេះអាចក្លាយទៅជាពន្លឺថ្មីគួរឲ្យរីករាយមួយសម្រាប់អ្នកវិនិយោគជាច្រើនដែលកំពុងតែបន្តក្តីព្រួយបារម្ភលើបទប្បញ្ញត្តិដែលមានសម្ពាធលើវិស័យឯកជនរបស់ប្រទេសចិន។

លើសពីនេះផងដែរ ក្រុមហ៊ុន Alibaba បាននិយាយថា ខ្លួននឹងធ្វើសន្និសីទមួយនៅថ្ងៃព្រហស្បតិ៍សប្ដាហ៍នេះ ដើម្បីពិភាក្សាអំពីផែនការបំបែកខ្លួនលើកនេះ ហើយនាយកប្រតិបត្តិ លោក Daniel Zhang ក៏នឹងអាចនឹងចូលរួមផងដែរ។ ការបង្រ្កាប និងរឹតត្បិតរបស់របស់រដ្ឋាភិបាលចិនក្នុងរយៈពេលពីរបីឆ្នាំចុងក្រោយនេះលើក្រុមហ៊ុនក្នុងស្រុករបស់ខ្លួនដែលភាគច្រើនជាអ្នករកស៊ីលើវិស័យអនឡាញ វិស័យអប់រំឯកជន និងវិស័យអចលនទ្រព្យបានធ្វើឲ្យខាតបង់តម្លៃទីផ្សាររាប់ពាន់លានមកហើយ និងក៏បានបង្កជាសម្ពាធដ៏តានតឹងសម្រាប់ក្រុមអ្នកវិនិយោគិនដែរ។

តាមផែនការដែលបានប្រកាស Alibaba ខ្លួនឯងនឹងរៀបចំឡើងវិញក្នុងរចនាសម្ព័ន្ធក្រុមហ៊ុនកាន់កាប់ដោយលោក Zhang ដែលនៅតែរក្សាតំណែងជានាយកប្រតិបត្តិក្រុម ហើយផ្នែករងទាំង ៦ ដោយក្រុមហ៊ុននីមួយៗមាននាយកប្រតិបត្តិ និងក្រុមប្រឹក្សាផ្ទាល់ខ្លួន។ លោក Zhang ក៏នឹងដឹកនាំអង្គភាពផ្តោតលើ Cloud ផងដែរ។ ទោះជាយ៉ាងណាក្តី វាមិនមែនជាលើកទីមួយទេដែលក្រុមហ៊ុន Alibaba ដកខ្លួនចេញពីអង្គភាពអាជីវកម្មរបស់ខ្លួន ដោយសារកាលពីឆ្នាំ ២០១១ ក្រុមហ៊ុននេះបានដកខ្លួនចេញពីក្រុមហ៊ុន Alipay ដែលជាក្រុមហ៊ុនទូទាត់ដ៏លឿនរបស់ខ្លួន ដែលក្រោយមកបានវិវត្តទៅជា Ant Group ដែលជាក្រុមហ៊ុន Fintech ដ៏ធំទៅវិញ។

អ្នកវិភាគមួយចំនួនយល់ឃើញថា ការរៀបចំរចនាសម្ព័ន្ធឡើងវិញរបស់ Alibaba គឺជាការពិសោធន៍ដ៏សំខាន់ថ្មីមួយ ដែលនឹងសាកល្បងថា តើក្រុមហ៊ុនដ៏ធំបំផុតរបស់ប្រទេសចិនអាចបំពេញតម្រូវការរបស់ទីក្រុងប៉េកាំងក្នុងការរួមចំណែកដល់សង្គមបាន ឬអត់ ខណៈដែល Alibaba គឺជាគោលដៅធំមួយក្នុងអំឡុងពេលនៃការបង្ក្រាបនាពេលកន្លងមក។ កំឡុងពេលនោះ ក្រុមហ៊ុននេះបានប្រឈមមុខដោយត្រូវបានត្រួតពិនិត្យទៅលើពាណិជ្ជកម្មអេឡិចត្រូនិក E-commerce ការអនុវត្តសុវត្ថិភាពទិន្នន័យនៅក្នុងអាជីវកម្មជាមួយនឹងសេវាកម្ម Cloud និងការអនុវត្តការងារសម្រាប់អង្គភាពចែកចាយផ្សេងទៀត។

នៅចុងឆ្នាំ ២០២១ លោក Jack Ma ដែលជាស្ថាបនិកក្រុមហ៊ុនបានចាកចេញពីប្រទេសចិន ហើយបានធ្វើដំណើរទៅកាន់ប្រទេសផ្សេងៗគ្នា។ ដូច្នោះហើយ ការត្រឡប់មកវិញរបស់លោក Ma និងការរៀបចំរចនាសម្ព័ន្ធឡើងវិញ ភាពជាអ្នកដឹកនាំថ្មី និងរដ្ឋាភិបាលក្នុងតំបន់បានផ្តល់ក្តីសង្ឃឹមថ្មីសម្រាប់វិស័យឯកជនរបស់ចិន ដោយផ្តល់ទំនុកចិត្តដល់វិនិយោគិន។ ស្របពេលនេះផងដែរ អ្នកវិភាគក៏យល់ឃើញថា ការបំបែកជាក្រុមហ៊ុនផ្សេងៗគ្នារបស់ Alibaba អាចនឹងត្រួសត្រាយផ្លូវសម្រាប់ក្រុមហ៊ុនបច្ចេកវិទ្យាយក្សរបស់ចិនផ្សេងទៀតអោយកាន់តែមានភាពទូលំទូលាយ។ ក្រៅពីមានហ្គេមជាស្នូល និងអាជីវកម្មប្រព័ន្ធផ្សព្វផ្សាយសង្គម Tencent ក៏មានបច្ចេកវិទ្យា cloud និង fintech ផងដែរ ហើយ JD.com បានបង្កើតបច្ចេកវិទ្យាមួយចំនួនរួមទាំង JD Logistics Cloud និង AI ជាដើម៕