សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ របាយការណ៍នៃការស៊ើបអង្កេតមួយរបស់បណ្តាញព័ត៌មាន CNA បានលាតត្រដាងថា នៅលើបណ្តាញ YouTube មានក្រុមបោកប្រាស់បានប្រើបច្ចេកវិទ្យាបញ្ញាសិប្បនិម្មិត(AI) បង្កើតវីដេអូមិនពិត (Deepfake) យ៉ាងស្ទាត់ជំនាញដោយប្រើរូបភាព និងសំឡេងរបស់លោក Jack Ma ដែលជាស្ថាបនិកក្រុមហ៊ុន Alibaba ដើម្បីឱ្យសាធារជនយល់ច្រឡំចំពោះសិង្ហបុរី។
តាមរយៈការសិក្សាលម្អិតគេជឿជាក់ថា វីដេអូបោកប្រាស់ខាងលើនេះផលិតឡើងក្នុងគោលបំណងផ្សព្វផ្សាយព័ត៌មានមិនពិត និងទ្រឹស្តីពាក្យចចាមអារ៉ាមអំពីប្រទេសសិង្ហបុរីទៅកាន់អ្នកទស្សនាជាងមួយលាននាក់រួចមកហើយ។ ក្រុមអ្នកស្រាវជ្រាវបានរកឃើញឆានែល (Channel) ចំនួន ៣២ ដែលបានផ្សព្វផ្សាយវីដេអូសិប្បនិម្មិតរាប់រយរឿងនៅចន្លោះចុងឆ្នាំ ២០២៥ ដល់ពាក់កណ្តាលឆ្នាំ ២០២៦ ដោយវីដេអូភាគច្រើនបានប្រើពាក្យសំដីមិនពិតក្នុងចេតនាធ្វើឱ្យមានការភាន់ច្រឡំជាច្រើនករណី។
នៅក្នុងដំណើរការវីដេអូទាំងនោះបានប្រើប្រាស់សំឡេងក្លែងក្លាយ និងរូបតំណាងផ្លាស់ប្តូរចលនាដែលអាចអានតាមអត្ថបទបកប្រែ និងរៀបចំទុកជាមុន។ ជាមួយគ្នានេះ ដើម្បីទទួលបានទំនុកចិត្តពីអ្នកទស្សនា យុទ្ធនាការនេះច្រើនតែបង្កប់ព័ត៌មានមិនពិតនៅក្នុងសាច់រឿងដែលសរសើរពីសេដ្ឋកិច្ចសិង្ហបុរី ខណៈពេលដែលលួចបញ្ចូលការអះអាងបំផ្លើសពីការពិត ដូចជា ពាក្យចចាមអារ៉ាមអំពីមហាអំណាចបរទេសកំពុងដាក់សម្ពាធសិង្ហបុរី និងការប្រឌិតគម្រោងហេដ្ឋារចនាសម្ព័ន្ធពិតប្រាកដឱ្យទៅជាការរៀបចំសង្គ្រាមសម្ងាត់ជាដើម។
ក្រុមអ្នកជំនាញបានព្រមានថា ប្រតិបត្តិការនេះបង្ហាញយ៉ាងច្បាស់ពីសញ្ញានៃការបង្កើតមាតិកាដោយស្វ័យប្រវត្តិ ដែលឆ្លុះបញ្ចាំងតាមរយៈពេលវេលាបង្ហោះវីដេអូស្របគ្នានៅលើគណនីជាច្រើនដែលត្រូវបានបង្កើតឡើងក្នុងរយៈពេលតែប៉ុន្មានថ្ងៃប៉ុណ្ណោះ។
ជាមួយគ្នានេះ ក្រុមអ្នកប្រតិបត្តិការទាំងនេះតែងតែទាញយកផលប្រយោជន៍ពីទំនោរជឿជាក់លើបុគ្គលមានឥទ្ធិពល ដោយយកអ្នកជំនួញល្បីឈ្មោះមកធ្វើជាមុខមាត់លើប្រធានបទហិរញ្ញវត្ថុដើម្បីបង្កើតភាពជឿជាក់។ គួរឱ្យដឹងដែរថា មាតិកាទាំងនេះក៏បានរីករាលដាលនៅលើ TikTok និងបង្ហាញខ្លួននៅលើបញ្ជីកំពូលនៃលទ្ធផលស្វែងរកតាម Search Engine ផងដែរ ដែលនេះបង្ហាញពីរបៀបដែលឧបករណ៍ AI តម្លៃទាបកំពុងត្រូវបានគេយកទៅប្រើប្រាស់ជាអាវុធដើម្បីធ្វើឱ្យសាធារណជនមានការយល់ច្រឡំក្នុងទ្រង់ទ្រាយកាន់តែធំ៕
Account
Security
Favourite Content