សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអះអាងថា យោងតាមទិន្នន័យអង្កេតសេដ្ឋកិច្ចកម្ពុជាឆ្នាំ២០២២បានលើកឡើងថា ស្ទើរតែប្រមាណ ៦២ % នៃអង្គភាពសេដ្ឋកិច្ចរបស់កម្ពុជា ត្រូវបានគ្រប់គ្រងដោយស្ត្រី ឬមានស្ត្រីជាម្ចាស់ ប៉ុន្តែអង្គភាពសេដ្ឋកិច្ចដែលដឹកនាំដោយស្ត្រីទាំងនោះ ភាគច្រើនជាប្រតិបត្តិការក្នុងសេដ្ឋកិច្ចក្រៅប្រព័ន្ធ ដែលមានឱកាសតិចតួចក្នុងការទទួលបានសេវាហិរញ្ញវត្ថុផ្លូវការ ក៏ដូចជាជំនួយអភិវឌ្ឍអាជីវកម្ម និងការលើកទឹកចិត្តនានាពីរាជរដ្ឋាភិបាល។
អង្គភាពសេដ្ឋកិច្ចដែលមានទីតាំងជាក់លាក់ និងអចិន្ត្រៃយ៍ទាំងអស់នៅកម្ពុជា មានសរុបប្រមាណ ៧៥៣ ៦៧០អង្គភាព ដោយចំនួនអ្នកចូលរួមការងារនៅក្នុងអង្គភាពសេដ្ឋកិច្ចមានចំនួន ២ ៩៨០ ៥៦៩នាក់ ក្នុងនោះ បុរសមាន ១ ១៣៩ ២០៧ នាក់ ស្មើនឹង ៣៨,២% និងស្ត្រីមាន ១ ៨៤១ ៣៦២នាក់ ស្មើនឹង ៦១,៨% ។ ប្រសិនបើករណីមិនរាប់បញ្ចូលអង្គភាពសេដ្ឋកិច្ចតាមចិញ្ចើមផ្លូវទេនោះ ចំនួនអង្គភាពសេដ្ឋកិច្ចទាំងអស់មានចំនួន ៦៧៦ ៥៩៧ សហគ្រាស និងមានអ្នកចូលរួមការងារសរុបនៅក្នុងអង្គភាពសេដ្ឋកិច្ចចំនួន ២ ៨៦៤ ២៥៦ នាក់។
ថ្លែងនៅក្នុងពិធីបិទទិវាសហគ្រិនស្ត្រីកម្ពុជាឆ្នាំ២០២៥ ដែលរៀបចំឡើងក្រោមប្រធានបទ “ពីទស្សនៈវិស័យទៅជាបេសកកម្ម៖ សហគ្រិនស្រ្តីជំរុញឆ្ពោះទៅកាន់សេដ្ឋកិច្ចបៃតង” ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានរំលេចពីតួនាទីដ៏សំខាន់របស់សហគ្រិនស្ត្រីក្នុងការជំរុញកំណើនសេដ្ឋកិច្ចប្រកបដោយចីរភាព និងបរិយាបន្ន។
ទិវាប្រចាំឆ្នាំនេះបានប្រមូលផ្តុំស្ត្រីជាអ្នកដឹកនាំធុរកិច្ច អ្នករៀបចំគោលនយោបាយ និងស្ត្រីជានវានុវត្តន៍ករ ប្រមាណ ៣០០នាក់ មកចែករំលែកបទពិសោធន៍ បង្ហាញសមិទ្ធផល និងស្វែងរកដំណោះស្រាយសម្រាប់ការអនុវត្តគោលការណ៍ និរន្តរភាពនៅក្នុងអាជីវកម្ម។
ឯកឧត្តមរដ្ឋមន្ត្រីក្រសួងឧស្សាហកម្ម បានលើកឡើងថា៖
“ការវិវត្តឆ្ពោះទៅផលិតកម្មកាន់តែបៃតង ខ្សែច្រវាក់ផ្គត់ផ្គង់កាន់តែមានតម្លាភាព និងក្រមសីលធម៌អាជីវកម្ម មិនមែនគ្រាន់តែជានិន្នាការប៉ុណ្ណោះទេ ប៉ុន្តែកំពុងក្លាយជាស្តង់ដារថ្មីសម្រាប់ពាណិជ្ជកម្មសកល។ ការផ្លាស់ប្តូរទៅរកផលិតកម្មបៃតងក៏នៅមានបញ្ហាប្រឈមមួយចំនួនផងដែរ។វត្ថុធាតុដើមដែលមានមេត្រីភាពបរិស្ថាន ថាមពលស្អាត បច្ចេកវិទ្យាបៃតង ឬវិញ្ញាបនបត្របៃតង អាចធ្វើឱ្យថ្លៃដើមផលិតកម្មកើនឡើងចំពោះមុខ ជាពិសេសសម្រាប់សហគ្រាសធុនតូច និងមធ្យមដែលមានដើមទុនតិច។”
ជាមួយគ្នានេះ ឯកឧត្តមក៏បានលើកទឹកចិត្តសហគ្រិនស្ត្រីឱ្យចាប់ផ្តើមពីការផ្លាស់ប្តូរតូចៗ ដូចជា ពិនិត្យតាមដានការប្រើប្រាស់ថាមពលរបស់រោងចក្រ-សហគ្រាស កាត់បន្ថយសំណល់ និងប្រើប្រាស់វត្ថុធាតុដើមដែលមាននិរន្តរភាព ពិសេសពីប្រភព និងធនធានកសិផលក្នុងស្រុក។
ទិវាសហគ្រិនស្ត្រីកម្ពុជាឆ្នាំ២០២៥ ក៏បានផ្តល់ពានរង្វាន់ដល់ម្ចាស់ជ័យលាភីជាសហគ្រិនស្ត្រីចំនួន ៩ រូប ដែលបានរួមចំណែកបង្កើតឱកាសការងារ បង្កើនប្រាក់ចំណូល និងអភិវឌ្ឍផលិតផលនិងសេវាកម្មប្រកបដោយភាពច្នៃប្រឌិត ដែលបង្ហាញពីការប្តេជ្ញាចិត្ត ភាពធន់ និងការដឹកនាំរបស់សហគ្រិនស្ត្រីកម្ពុជា ក្នុងការកសាងសេដ្ឋកិច្ចបៃតង និងបរិយាបន្ន៕
Account
Security
Favourite Content