សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ Signature Asia ជាឈ្មោះក្រុមហ៊ុនក្នុងស្រុកមួយ ដែលបានជាប់ជាអាជីវកម្មបរិយាបន្ន១ ក្នុងចំណោមអាជីវកម្មបរិយាបន្នទាំង ១៨។ ក្រុមហ៊ុននេះ ផ្ដោតសំខាន់ទៅលើការពង្រីកវិសាលភាពនៃវិស័យកសិកម្មរបស់កម្ពុជាឱ្យឈានទៅរកភាពរីកចម្រើនថែមមួយកម្រិតទៀត។
ជាប្រទេសដែលពឹងផ្អែកលើវិស័យកសិកម្មស្រាប់ កម្ពុជាចាំបាច់ក្នុងការយកចិត្តទុកដាក់លើការដាំដុះប្រកបទៅដោយនិរន្តរភាព ពោល គឺពង្រឹងបន្ថែមទៅលើភាពខ្លាំងរបស់ខ្លួនតែម្ដង។ នេះបើតាមការបញ្ជាក់របស់លោកឧកញ៉ា ចាន់ សុឃាំង ដែលជាអគ្គនាយកក្រុមហ៊ុន Signature Asia។
ក្នុងន័យនេះ ដើម្បីឈានទៅសម្រេចបាននូវការធ្វើកសិកម្មប្រកបទៅដោយនិរន្តរភាព ក្រុមហ៊ុនខាងលើបានរួមចំណែកក្នុងការបង្កើតជាគម្រោង ដោយធ្វើការផ្ទាល់ជាមួយកសិករ។ ដោយក្រុមហ៊ុនបានចុះកុងត្រាកសិកម្មជាបន្តបន្ទាប់ជាមួយកសិកររាប់ពាន់គ្រួសារ ដែលសំដៅជួយគាំទ្រសេដ្ឋកិច្ចគ្រួសាររបស់ពួកគេផងដែរ។
តាមរយៈកុងត្រានោះផងដែរ ក្រុមហ៊ុន Signature Asia បានបណ្ដុះបណ្ដាលកសិករឱ្យដាំដុះទៅតាមស្តង់ដារដែលរួមមានទាំងបច្ចេកទេសក្នុងការដាំដុះ និងថែទាំ ការប្រើប្រាស់ជីកសិកម្ម ការគិតគូរពីបរិស្ថាន គ្មានការកាប់បំផ្លាញព្រៃឈើដើម្បីដាំដុះ គ្មានការដាំដុះលើផ្ទៃដីខុសច្បាប់ជាដើម។
បើតាមលោកឧកញ៉ា ចាន់ សុឃាំង បានឱ្យដឹងថា កន្លងមកក្រុមហ៊ុនមួយនេះបានចុះកុងត្រាជាមួយកសិករលើប្រភេទដំណាំជាច្រើនប្រភេទ ដូចជា ស្រូវ ម្រេច ល្ងរ និងត្នោតជាដើម ដែលធ្វើយ៉ាងណាអាចធានាថា ទិន្នផលដែលផលិតបាន ជាទិន្នផលដែលមានគុណភាពខ្ពស់ និងស្របទៅតាមស្តង់ដារនាំចេញតែម្ដង ខណៈដែលកន្លងមក ក្រុមហ៊ុនបាននាំចេញនូវទិន្នផលកសិកម្មដែលមានគុណភាពទៅកាន់ទីផ្សារក្រៅស្រុក និងបានចូលរួមតាំងផលិតផលអង្ករកម្ពុជានៅតាមព្រឹត្តិការណ៍ពិព័រណ៍នានាផងដែរ។
លោកឧកញ៉ា ចាន់ សុឃាំង បានបន្តឱ្យដឹងថា៖
«អ្វីដែលខ្ញុំកំពុងធ្វើនេះ អាចផ្ដល់ជាឱកាសការងារ ដល់ប្រជាពលរដ្ឋយើង ហើយខ្ញុំចង់ពង្រីកសក្កានុពលវិស័យកសិកម្មនៅកម្ពុជាឱ្យកាន់ តែទូលំទូលាយ ហើយខ្ញុំនៅតែមានមហិច្ឆិតាក្នុងការចូលរួមជំរុញវិស័យកសិកម្ម។ ជាចក្ខុវិស័យនៃការធ្វើអាជីវកម្មដែលមិនត្រឹមតែគិតគូពីភាពរីកចម្រើនផ្នែកហិរញ្ញវត្ថុនៃអាជីវកម្ម ប៉ុន្តែគិតពីផលជះទៅលើសង្គម និងជាពិសេសទៅដល់កសិករកម្ពុជានេះហើយ ដែលនាំឱ្យក្រុមហ៊ុននេះត្រូវបានជ្រើសរើសជាប្រភេទអាជីវកម្មបរិយាបន្ន»។
គួរបញ្ជាក់ថា អាជីវកម្មបរិយាបន្ន អាជីវកម្មបរិយាប័ន្ន (Inclusive Business – IB) គឺជាអាជីវកម្មឈរលើគោលការណ៍ធុរកិច្ច ដែលបង្កើតដំណោះស្រាយជាប្រព័ន្ធ មានភាពច្នៃប្រតិដ្ឋ និងមានទ្រង់ទ្រាយធំ ដែលឆ្លើយតបទៅនឹងបញ្ហាប្រឈមពាក់ព័ន្ធ របស់ប្រជាជនក្រីក្រ និងប្រជាជនមានចំណូលទាប (BoP និង B40)។
អាជីវកម្មបរិយាបន្ន នឹងផ្ដល់ដំណោះស្រាយឈ្នះ-ឈ្នះ-ឈ្នះ ដល់ភាគីរាជរដ្ឋាភិបាល ភាគីជាម្ចាស់អាជីវកម្មផ្ទាល់ និងភាគីប្រជាពលរដ្ឋដែលទទួលផល៕
Account
Security
Favourite Content