សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ របាយការណ៍លទ្ធផលការងារឆ្នាំ២០២៤ និងទិសដៅការងារឆ្នាំ២០២៥ របស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានឱ្យដឹងថា គិតត្រឹមចុងឆ្នាំ២០២៤ នៅកម្ពុជាមានតំបន់សេដ្ឋកិច្ចពិសេសសរុបចំនួន ៣០ ដែលមានរោងចក្រកំពុងដំណើរការ។ ចំនួននេះគឺកើនឡើងចំនួន ៤ ឬស្មើនឹង ១៥,៣៨ភាគរយបើធៀបនឹងឆ្នាំ២០២៣។
ប្រភពដដែលនេះបានឱ្យដឹងថា តំបន់សេដ្ឋកិច្ចពិសេសទាំង ៣០ គឺមានទីតាំងនៅ ១២ រាជធានី-ខេត្ត ដោយ ៩ ស្ថិតក្នុងខេត្តស្វាយរៀង, ៥ ក្នុងខេត្តព្រះសីហនុ, ៣ ក្នុងខេត្តបន្ទាយមានជ័យ កោះកុង និង កណ្តាល, និងចំនួន ១ នៅក្នុងរាជធានីភ្នំពេញ ខេត្តពោធិ៍សាត់ ក្រចេះ កំពត កំពង់ស្ពឺ កំពង់ឆ្នាំង និង ខេត្តកំពង់ចាម។
ចំនួនតំបន់សេដ្ឋកិច្ចពិសេសដែលមានប្រតិបត្តិការ គឺកើនឡើង ខណៈដែលក្នុងឆ្នាំ២០២០ មានត្រឹមតែចំនួន២១ , ឆ្នាំ២០២១ មានចំនួន ២៣, ឆ្នាំ២០២២ មាន២៥ , ឆ្នាំ២០២៣ មានចំនួន២៦ និង២០២៤ មានចំនួន ៣០។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា(CDC)បានថ្លែងថា ៖តំបន់សេដ្ឋកិច្ចពិសេសមិនត្រឹមតែចូលរួមចំណែកក្នុងការទាក់ទាញវិនិយោគិនជាតិ និងអន្តរជាតិឱ្យបើករោងចក្រ/សហគ្រាសនៅក្នុងប្រទេសកម្ពុជា និងជួយលើកកម្ពស់សមត្ថភាពនាំចេញទំនិញទៅទីផ្សារអន្តរជាតិប៉ុណ្ណោះទេ ប៉ុន្តែក៏ជួយបំពេញតម្រូវការប្រើប្រាស់ក្នុងស្រុកផងដែរ។
ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ធ្លាប់បានលើកឡើងក្នុងពេលថ្មីៗនេះថា៖ ក្នុងការរួមចំណែកឆ្លើយតបនឹងកំណើនចំនួនរោងចក្រថ្មី (៣២៦ ក្នុងឆ្នាំ ២០២៤) ក្រសួងបានតម្រង់ធនធានដើម្បីពន្លឿនការត្រួតពិនិត្យ និងវាយតម្លៃប្លង់បច្ចេកទេសឧស្សាហកម្មរបស់រោងចក្រ សិប្បកម្ម ចំនួន ៤៩១ មូលដ្ឋាន កើនឡើង ៤២,៣១% បើធៀបនឹងឆ្នាំ២០២៣ ដើម្បីគ្រប់គ្រង វាយតម្លៃហានិភ័យក្នុងទីតាំងមូលដ្ឋាន ផលិតកម្ម ឱ្យកាន់តែមានសុវត្ថិភាព។ ដើម្បីការពារ និងគ្រប់គ្រងហានិភ័យ, ក្រសួងបានជំរុញការបណ្តុះបណ្តាលជំនាញបច្ចេកទេសនិងសុវត្ថិភាពឧស្សាហកម្ម ដល់សិក្ខាកាមពីវិស័យឯកជនសរុបចំនួន ៣.៩១១ នាក់ មកពី ៨០០ មូលដ្ឋាន (កើន ៣៨% ធៀបនឹងឆ្នាំ២០២៣) ព្រមទាំងជំរុញការអភិវឌ្ឍន៍ឧស្សាហកម្មបៃតង និងឧស្សាហកម្មជំនាន់ថ្មី, ការងារត្រួតពិនិត្យការបំពុល និងគ្រប់គ្រងសំណល់ឧស្សាហកម្ម។
អ្នកឧកញ៉ា សំ សុខនឿន ប្រធានក្រុមប្រឹក្សាភិបាលនៃសម្ព័ន្ធក្រុមហ៊ុន SAM SN GROUP ធ្លាប់បានលើកឡើងថា៖ តំបន់សេដ្ឋកិច្ចពិសេស (SEZ) កំពុងដើរតួនាទីយ៉ាងសំខាន់ក្នុងការជួយទាក់ទាញ និងលើកទឹកចិត្តឱ្យអ្នកវិនិយោគចម្រុះជាតិសាសន៍ចូលមកបណ្តាក់ទុននៅកម្ពុជាកាន់តែច្រើន។ តំបន់សេដ្ឋកិច្ចពិសេស បានផ្តល់ការងារដល់ប្រជាជន និងរួមចំណែកយ៉ាងសំខាន់ដល់ចំណូលសេដ្ឋកិច្ច ។ លើសពីនេះ តំបន់សេដ្ឋកិច្ចពិសេសដើរតួយ៉ាងសំខាន់ក្នុងខ្សែច្រវាក់ផ្គត់ផ្គង់ក្នុងតំបន់ និងសកលលោក៕
Account
Security
Favourite Content