វៀតណាម ៖ ក្នុង​រយៈ​ពេល​ប៉ុន្មា​ន​​ឆ្នាំចុងក្រោយនេះ ទំហំពាណិជ្ជកម្ម​រវាងប្រទេស​កម្ពុជា និ​ងវៀតណាម បានកើនឡើង​ជា​បន្ត​បន្ទាប់​។ ដោយឡែក នៅក្នុងសន្នសីទតភ្ជាប់​រវាង​ធុរកិច្ច​វៀតណាម-កម្ពុជា​ឆ្នាំ២០២៥ ភាគីទាំងពីរបានកំណត់គោលដៅរួមបង្កើន​ទំហំពាណិជ្ជកម្ម​ឱ្យបានដល់ ​២០​ពាន់លានដុល្លារអាម៉េរិកនៅឆ្នាំ​បន្ទាប់ខាង​មុខនេះ​។​

ថ្លែងនៅក្នុង​សន្និសីទតភ្ជាប់​រវាង​ធុរកិច្ច​វៀតណាម-កម្ពុជា​ ឆ្នាំ២០២៥ នាទីក្រុង​ហូជីមីញ​ ប្រទេស​វៀណាម​ កាលពីថ្ងៃទី​១៥ ខែកក្កដា ឆ្នាំ២០២៥ អ្នកឧកញ៉ា​គិត ម៉េង ប្រធាន​សភាពាណិជ្ជកម្មកម្ពុជា​ បាន​លើកឡើងថា កម្ពុជា និង​វៀតណាម បានកំណត់​គោលដៅ​ប្រកប​ដោយ​មហិច្ឆតា​ និងជំរុញ​លើកទឹកចិត្តក្នុងការឈាន​ទៅ​សម្រេច​ឱ្យបានពាណិជ្ជកម្ម​ទ្វេភាគី​សរុប​ ២០​ពាន់លានដុល្លារអាម៉េរិកនៅឆ្នាំ​ខាង​មុខ ។

អ្នកឧកញ៉ា​បន្តថា ៖

«ក្រៅពី​ដៃគូពាណិជ្ជកម្ម​ វៀតណា​ម ក៏ជា​ប្រទេសដែល​មានវិនិយោគិន​បណ្ដាក់ទុនវិនិយោគ​នៅកម្ពុជា​ច្រើនក្នុង​ចំណោម​វិនិយោគិនបរទេសចំនួន៥ ដោយមានគម្រោងលើសពី​២០០គម្រោង មានទុនវិនិយោគសរុប​ប្រមាណ ​៣ពាន់​លានដុល្លារអាម៉េរិក ក្នុងនោះមានវិស័យ​កសិកម្ម ទូរគមនាគមន៍ ធនាគារ ហិរញ្ញវត្ថុ ការ​កែច្នៃម្ហូបអាហារ​ រ៉ែ​ អាកាសចរណ៍ និងទេសចរណ៍» ។​

អ្នកឧកញ៉ា ​គិត ម៉េង ក៏បានលើកទឹកចិត្ត​ឱ្យ​ក្រុមហ៊ុន​វៀតណាម​ មកបណ្ដាក់ទុនវិនិយោគ​នៅក្នុង​ប្រទេស​កម្ពុជា និងផ្សារភ្ជាប់ទំនាក់ទំនង​ដ៏រឹង​មាំ ​និងការផ្ដួច​ផ្ដើម​អាជីវកម្ម​យ៉ាងពិត​ប្រាកដ ​ដែលអាចកើតឡើងពីការពិភាក្សា​នៅក្នុងសន្និសីទនេះ​។

ឧកញ៉ា ឡេង ឬទ្ធី ប្រធានសមាគធុរកិច្ច​វៀតណាម-កម្ពុជា ​បានថ្លែងថា ដោយ​មានការ​យកចិត្តទុកដាក់​ និងការ​សម្រប​សម្រួល​យ៉ាងជិត​ស្និទ្ធពីរដ្ឋាភិបាលនៃប្រទេស​ទាំងពីរ ក្រសួង​ឧស្សាហកម្ម​ និងពាណិជ្ជកម្ម​វៀតណាម និងក្រសួងពាណិជ្ជកម្ម​កម្ពុជាដោយផ្ទាល់ សហគ្រាស​វៀតណាម​នៅ​ប្រទេស​កម្ពុជា នឹង​បន្ត​អភិវឌ្ឍ​យ៉ាង​ខ្លាំង​ក្លា​ រួម​ចំណែកជាវិជ្ជមានដល់​ការអភិវឌ្ឍ​ន៍​សេដ្ឋកិច្ច​​ សង្គម​នៃប្រទេសទាំងពីរ ព្រមទាំងពង្រឹង​ទំនាក់ទំនង​មិត្តភាព​ជា​ប្រពៃណី​រវាងប្រទេស​វៀតណាម និង​ប្រទេស​កម្ពុជា ។​

ប្រធាន​សមាគម​ធុរកិច្ចវៀតណាម -កម្ពុជា​រូបនេះ បានថ្លែង​គោរព​ស្នើ​ដល់​ប្រធានសភាពាណិជ្ជកម្មកម្ពុជា អ្នកឧកញ៉ា ​គិត​ ម៉េង បន្តភ្ជាប់​ទំនាក់ទំនង​ឱ្យ​កាន់តែរឹង​មាំបន្ថែមទៀត ដើម្បីឱ្យ​សហគ្រាស​វៀតណាម អាច​បណ្ដាក់ទុន​នៅក្នុង​ប្រទេសកម្ពុជា ហើយ​សហគ្រាស​កម្ពុជា អាច​បណ្ដាក់ទុនវិនិយោគ​នៅក្នុង​ប្រទេស​វៀតណាម ដើ​ម្បីទាញយក​ផល​ប្រយោជន៍  និងផលចំណេញ​ពីភាពខ្លាំងនៃ​ប្រទេសទាំងពីរ ដើម្បីអភិវឌ្ឍ​ន៍​ និងបំពេញឱ្យគ្នា​ទៅវិញទៅមក ។

គួររម្លឹក​ថា​ កាលពីឆ្នាំ២០២៤​កន្លងទៅនេះ ទំហំពាណិជ្ជកម្ម​រវាង​ប្រទេស​វៀតណាម និង​កម្ពុជា​ សម្រេច​បានក្នុងទឹកប្រាក់​ប្រមាណ ១០ពាន់​លានដុល្លារអាម៉េរិក ហើយក្នុ​ងរយៈពេល៦ខែ​ដើមឆ្នាំ២០២៥នេះ ទំហំពា​ណិជ្ជកម្ម​នៃប្រទេស​ទាំងពីរ​សម្រេច​បានប្រមាណ ៤,៣៤ពាន់លានដុល្លារអាម៉េរិក ក្នុងនោះ​កម្ពុជា​នាំចេញទៅប្រទេស​វៀតណាម​ក្នុងទឹកប្រាក់ ​២ ១៩៣ លានដុល្លារអាម៉េរិក​ ខណៈនាំចូលពីវៀតណាម​ត្រលប់មកវិញ​ក្នុងទំហំទឹកប្រាក់ ២ ១៤៧​ លានដុល្លារអាម៉េរិក ។

សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា ធ្លាប់បានកោតសរសើរលទ្ធផលនៃកិច្ចប្រជុំរបស់ក្រសួងពាណិជ្ជកម្មទាំងពីរ កម្ពុជា វៀតណាម ដែលបានចុះហត្ថលេខាលើកិច្ចសម្របសម្រួលជំរុញពាណិជ្ជកម្មទ្វេភាគីសម្រាប់អនុវត្តឆ្នាំ២០២៥-២០២៦ ដោយឯកភាពបង្កើតគណៈកម្មាធិការពាណិជ្ជកម្មចម្រុះ ដើម្បីបង្កើនទំហំពាណិជ្ជកម្មដល់គោលដៅ២០ពាន់លានដុល្លាអាម៉េរិក និងដោះស្រាយបញ្ហាពាណិជ្ជកម្មនៅតាមបណ្តោយព្រំដែន។

សម្តេចតេជោ ហ៊ុន សេន បានបញ្ជាក់ថា៖« គោលដៅទំហំពាណិជ្ជកម្ម ២០ ពាន់លានដុល្លារអាម៉េរិកនេះ ជាគោលដៅអាចធ្វើបាន មិនមែនជាគោលដៅដែលធំជ្រុលធ្វើមិនបាននោះឡើយ។ ម៉យាងទៀត ថ្វីបើវៀតណាម ជាប្រទេសធំមានប្រជាជនដល់ ១០៦ លាន់នាក់ ជាទីផ្សារធំ ប៉ុន្តែ កម្ពុជាមានប្រជាជនត្រឹមតែ ១៧ លាននាក់ពិតមែន តែមានតម្រូវការខ្ពស់៕