ភ្នំពេញ ៖ កម្ពុជានឹងធ្វើជាម្ចាស់ផ្ទះរៀបចំពិព័រណ៍ B2B លើវិស័យផ្គត់ផ្គង់ម្ហូបអាហារ សណ្ឋាគារ និងបដិសណ្ឋារកិច្ច (CamFood & Hotel 2024) ព្រមទាំងការប្រកួតធ្វើម្ហូបដើម្បីលើកស្ទួយផលិតផល កសិផលខ្មែរ ដែលនឹងប្រព្រឹត្តនាចាប់ពីថ្ងៃទី៦ ដល់ថ្ងៃទី៨ ខែវិច្ឆិកា ឆ្នាំ២០២៤ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ។

ព្រឹត្តិការណ៍ពិព័រណ៍ដ៏សំខាន់នេះនឹងក្លាយជាមជ្ឈមណ្ឌលដ៏រស់រវើកដើម្បីបង្ហាញអំពីឧត្តមភាពនៃសង្វាក់ផ្គត់ផ្គង់ក្នុងឧស្សាហកម្មម្ហូបអាហារកម្ពុជា ជាមួយនិន្នាការនៃការវិត្តវិស័យបដិសណ្ឋារកិច្ចទំនើបទាន់សម័យនាពេលបច្ចុប្បន្ន និងអនាគត ជាពិសេសផ្តល់នូវឱកាសជួបជាមួយអ្នកផ្គត់ផ្គង់ទាំងក្នុងស្រុក និងក្រៅស្រុក និងជាវេទិកាសំខាន់មួយសម្រាប់បង្ហាញការច្នៃប្រឌិតថ្មីបំផុត ជាមួយម៉ាកយីហោផលិតផល សេវាកម្ម បច្ចេកវិទ្យាល្បីៗ ដើម្បីជំរុញ និងពង្រីកអាជីវកម្មក្នុងវិស័យបដិសណ្ឋារកិច្ចដែលកំពុងរីកចម្រើនរបស់កម្ពុជា។

ក្នុងសន្និសីទសារព័ត៌មាននៅវិទ្យាស្ថានម្ហូបអាហារកម្ពុជាកាលពីរសៀលថ្ងៃទី ៧ខែសីហា លោកស្រី Alice Lem នាយកគ្រប់គ្រង និងអភិវឌ្ឍន៍អាជីវកម្មប្រចាំប្រទេសម៉ាឡេស៊ី – កម្ពុជានៃក្រុមហ៊ុន Informa បានប្រកាសថា ៖ CAMFOOD & CAMHO​TEL 2024 នឹងមានក្រុមហ៊ុនដាក់តាំងជាង ១៥០ ហើយរំពឹងនឹងមានអ្នកទស្សនាជាង១២០០០ នាក់ ហើយតាមរយៈព្រឹត្តិការណ៍ដ៏សំខាន់នេះក៏នឹងឆ្លុះបញ្ចាំងពីកំណើនដ៏រឹងមាំ និងសក្ដានុពលដ៏ធំធេងនៃឧស្សាហកម្មបដិសណ្ឋារកិច្ចរបស់ប្រទេសកម្ពុជា។

លោកស្រី Alice Lem បានបន្ថែមថា៖

«ការតាំងពិព័រណ៍នេះផ្តល់នូវវេទិកាដ៏ទូលំទូលាយមួយសម្រាប់អ្នកជំនាញក្នុងឧស្សាហកម្មដើម្បីបង្ហាញផលិតផល ប្រភពអ្នកផ្គត់ផ្គង់ថ្មី និន្នាការ និងបង្កើតទំនាក់ទំនងអាជីវកម្មសំខាន់ៗសម្រាប់អាជីវកម្មគ្រប់ទំហំ បង្កើតឱកាស និងបណ្តាញទំនាក់ទំនងរវាងអ្នករោងចក្រ អ្នកចែកចាយ និងដៃគូដែលមានសក្តានុពល »។

លោក ឌិន សុមេធារិទ្ធ ប្រធានសហព័ន្ធទេសចរណ៍កម្ពុជា បានមានប្រសាសន៍ថា៖

«វិស័យបដិសណ្ឋារកិច្ច និងម្ហូបអាហារបស់កម្ពុជានឹងមានកំណើនដែលមិនធ្លាប់មានពីមុនមក ដែលជំរុញដោយកំណើនទេសចរ និងការពង្រីកទីផ្សារក្នុងស្រុក។ ការតាំងពិព័រណ៍នេះជាយុទ្ធសាស្ត្រដើម្បីទាញយកទុនលើការបង្កើនការវិនិយោគលើហេដ្ឋារចនាសម្ព័ន្ធទេសចរណ៍ និងការបង្កើនការផ្សព្វផ្សាយ មុខម្ហូបខ្មែរលើឆាកអន្តរជាតិ»។

គួរជម្រាបថា៖ ពិព័រណ៌នេះនឹងបង្ហាញនូវទម្រង់សំខាន់ៗចំនួន៣ ៖ ទី១ -បរិក្ខារផ្គត់ផ្គង់៖ បង្ហាញការច្នៃប្រឌិតចុងក្រោយបង្អស់ក្នុងបច្ចេកវិទ្យាផ្ទះបាយ ឧបករណ៍រៀបចំអាហារ និងសម្ភារៈ ផ្គត់ផ្គង់ភោជនីយដ្ឋាន។ ទី២- អាហារ និងភេសជ្ជៈ៖ គ្រឿងផ្សំ ភេសជ្ជៈ វិស័យកាហ្វេ និងផលិតផលសម្រេចពីក្នុងស្រុក ជុំវិញពិភពលោក និងទី៣-បដិសណ្ឋារកិច្ច និងការលក់រាយ៖ បង្ហាញសេវាកម្មបដិសណ្ឋារកិច្ចទំនើប ដំណោះស្រាយបច្ចេកវិទ្យា និងការច្នៃប្រឌិតផ្នែកលក់រាយ – លក់ដុំ។

ជាមួយការរំលេចឡើងនៃព្រឹត្តិការណ៍នៃការប្រកួតប្រជែងចម្អិនម្ហូប និងបដិសណ្ឋារកិច្ចថ្នាក់ជាតិឆ្នាំ២០២៤ ពិព័រណ៍ប្រចាំឆ្នាំនេះនឹងបង្ហាញអំពីរការប្រកួតជំនាញធ្វើម្ហូប និងភាពច្នៃប្រឌិត រួមមានការឆ្លាក់ផ្លែឈើ និងបន្លែ ,a turkey challenge, black box competitions, ម្ហូបបួស ការរចនានំអាពាហ៍ពិពាហ៍ និងជំនាញបដិសណ្ឋារកិច្ចដូចជាការរៀបចំគ្រែ ការរៀបចំផ្កា ការប្រកួតរៀបចំតុ និង sommelier, Waiterthon ជាដើម។ ការប្រកួតប្រជែងនេះអាចធ្វើទៅបានតាមរយៈការសហការជាមួយដៃគូឧស្សាហកម្មសំខាន់ៗរួមមាន LSH, KSLM, USA Poultry, CAPFISH CAPTURE-UNIDO, និង HITEC Water។

លោក សុង តេង ប្រធានសមាគមចុងភៅកម្ពុជា មានប្រសាសន៍ថា៖

“ការប្រកួតធ្វើម្ហូបថ្នាក់ជាតិឆ្នាំនេះ នឹងជំរុញឧត្តមភាពផ្នែកធ្វើម្ហូបឱ្យកាន់តែប្រសើរ។ យើងបានសិក្សាបញ្ហាប្រឈមនានា ដើម្បីកែតម្រូវនិងពង្រឹង ជំនាញបច្ចេកទេសដោយរួមបញ្ចូលជាមួយគ្រឿងផ្សំជាតិនិងអន្តរជាតិដើម្បីធ្វើអោយប្រសើរឡើងនៃម្ហូបដ៏សម្បូរបែបរបស់កម្ពុជា»។

លោកឧកញ៉ា ហ៊ី សុធា ប្រធានសមាគមសណ្ឋាគារកម្ពុជា បានលើកឡើងថា៖ CAMFOOD & CAMHOTEL 2024 នឹងដើរតួនាទីយ៉ាងសំខាន់ក្នុងការជួយឧស្សាហកម្មសណ្ឋាគារសម្របខ្លួនទៅនឹងនិន្នាការក្រោយជំងឺរាតត្បាត ក្រោមការណែនាំ និងការអនុវត្តប្រកបដោយនិរន្តរភាព ជាមួយនឹងដំណោះស្រាយតាមរយៈបច្ចេកវិទ្យាចុងក្រោយប្រកបដោយផាសុកភាព។

គួរជម្រាបផងដែរថា៖ សន្និសីទសារព័ត៌មានបានបញ្ចប់ដោយការចុះអនុស្សារណៈយោគយល់គ្នា (MOU) រវាងសហព័ន្ធទេសចរណ៍កម្ពុជា និងក្រុមហ៊ុនរៀបចំពិព័រណ៍ INFORMA MARKETS។ MOU នេះជា គំនិតផ្តួចផ្តើមរួមគ្នាដែលផ្តោតលើការចែករំលែកចំណេះដឹង និងបទពិសោធន៍ដល់ឧស្សាហកម្ម និងកិច្ចខិតខំប្រឹងប្រែងទីផ្សាររួមគ្នាដើម្បីលើកកម្ពស់វិស័យបដិសណ្ឋារកិច្ចលំប្រទេសកម្ពុជា។

ពិព័រណ៍នេះរៀបចំដោយ Informa Markets Cambodia ដែលត្រូវបានចុះបញ្ជីទទួលស្គាល់ដោយក្រសួងពាណិជ្ជកម្មស្ថិតក្រោមឈ្មោះ AMB Tarsus Exhibitions (Cambodia) Pte Ltd) និងមានការមានគាំទ្រពីវិទ្យាស្ថានម្ហូបអាហារកម្ពុជា សមាគមសណ្ឋាគារកម្ពុជា សមាគមចុងភៅកម្ពុជា សហព័ន្ធទេសចរណ៍កម្ពុជា សមាគមវិទ្យាស្ថានដើម្បីឧត្តមភាពអប់រំបច្ចេកទេស និងសមាគមស្ប៉ា និងសុខភាពកម្ពុជា៕