សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី BBC បានរាយការណ៍ថា កាណាដា ម៉ិកស៊ិក និងចិន បានឆ្លើយតបទៅនឹងការដាក់ពន្ធថ្មីរបស់អាម៉េរិក ក្រោយពី Donald Trump ប្រកាសពីការដាក់ពន្ធថ្មីលើប្រទេសទាំង៣ ដែលសុទ្ធតែជាដៃគូពាណិជ្ជកម្មធំៗរបស់ប្រទេស។
កាលពីថ្ងៃចន្ទ លោក Donald Trump បានប្រកាសពីផែនការដាក់ពន្ធ ២៥ ភាគរយលើទំនិញដែលនាំចូលពីម៉ិកស៊ិក និងកាណាដា ហើយ ១០ ភាគរយបន្ថែមលើទំនិញដែលនាំចូលពីប្រទេសចិន ដោយលើកឡើងហេតុផលថា ដើម្បីដេញបង្ក្រាបគ្រឿងញៀន និងអន្តោប្រវេសន៍ខុសច្បាប់។
លោក Justin Trudeau នាយករដ្ឋមន្ត្រីកាណាដា បានលើកឡើងថា លោកបានពិភាក្សាជាមួយនឹង Trump បន្ទាប់ពីមានការប្រកាសនេះ ហើយគ្រោងនឹងជួបប្រជុំជាមួយថ្នាក់ដឹកនាំខេត្តរបស់ប្រទេសកាណាដានៅថ្ងៃពុធសប្ដាហ៍នេះ ដើម្បីពិភាក្សាអំពីការឆ្លើយតបទៅខាងអាម៉េរិកវិញ។ នៅក្នុងការសន្ទនាតាមទូរស័ព្ទជាមួយ Trump លោក Trudeau បាននិយាយថា ពួកគេទាំង២ បានពិភាក្សាអំពីពាណិជ្ជកម្ម និងសន្តិសុខតាមព្រំដែន ដោយបានចង្អុលថា ចំនួនជនចំណាកស្រុកឆ្លងកាត់ព្រំដែនកាណាដាមានចំនួនតិចជាងបើធៀបនឹងព្រំដែនអាមេរិក-ម៉ិកស៊ិក។ យ៉ាងណាមិញ ក្រុមការងាររបស់ Trump បានបដិសេធ និងមិនបញ្ជាក់ពីការហៅទូរស័ព្ទនោះទេ។
ថ្លែងនៅក្នុងសភានាទីក្រុង Ottawa លោក Trudeau បានប្រាប់សមាជិកសភាថា គ្មាននរណាម្នាក់មានគំនិតចង់ធ្វើសង្រ្គាមជាមួយសហរដ្ឋអាមេរិកនោះទេ ដោយបានអំពាវនាវឲ្យធ្វើការជាមួយគ្នា យកចិត្តទុកដាក់តាមយុទ្ធសាស្រ្ត។ យ៉ាងណាមិញ មេដឹកនាំតាមបណ្តាខេត្តរបស់កាណាដាបានស្នើលើការដាក់ពន្ធរបស់សហរដ្ឋអាមេរិកវិញ ខណៈដែលកាណាដាលក់អ្វីដែលសហរដ្ឋអាមេរិកត្រូវការដូចជា សារធាតុរ៉ែ និងលោហធាតុសំខាន់ៗជាដើម។
យោងតាមទិន្នន័យរបស់សហរដ្ឋអាមេរិកបានឱ្យដឹងថា កាណាដា គឺជាទីផ្សារដ៏ធំបំផុតសម្រាប់ការនាំចេញរបស់សហរដ្ឋអាមេរិក។ លើសពីនេះ កាណាដានាំចេញទៅកាន់សហរដ្ឋអាម៉េរិកប្រហែល ៧៥ ភាគរយនៃការនាំចេញសរុបរបស់ខ្លួន និងមានចំណែកប្រហែល ៤៣៧ ពាន់លានដុល្លារនៃការនាំចូលរបស់សហរដ្ឋអាមេរិកនៅក្នុងឆ្នាំ២០២២។
ជាការឆ្លើយតប ប្រធានាធិបតីម៉ិកស៊ិក លោកស្រី Claudia Sheinbaum បានលើកឡើងថា ការដាក់ពន្ធគយនឹងធ្វើឲ្យភាគីម្ខាងទៀតដែលរងប៉ះពាល់អាចឆ្លើយតបដោយការដាក់ពន្ធគយទៅវិញ ប៉ុន្តែជាលទ្ធផល ក្រុមហ៊ុន ឬ អាជីវកម្មប្រឈមនឹងហានិភ័យ។ លោកស្រីបានបន្ថែមថា ទាំងបញ្ហាចំណាកស្រុក និងការប្រើប្រាស់គ្រឿងញៀននៅសហរដ្ឋអាមេរិកនឹងមិនត្រូវបានដោះស្រាយតាមរយៈការគំរាមគំហែង ឬការដំឡើងពន្ធនោះទេ ហើយបញ្ហាគ្រឿងញៀនគឺជាបញ្ហាសុខភាពសាធារណៈ និងការប្រើប្រាស់ក្នុងសង្គមអាម៉េរិក។ លោកស្រីកត់សម្គាល់ថា ក្រុមហ៊ុនផលិតរថយន្តអាមេរិកផលិតគ្រឿងបន្លាស់មួយចំនួនរបស់ពួកគេនៅក្នុងប្រទេសម៉ិកស៊ិក និងកាណាដា។ លោកស្រីក៏បានព្រមានវិញថា ម៉ិកស៊ិកនឹងសងសឹកដោយការដាក់ពន្ធផ្ទាល់ខ្លួនលើការនាំចូលរបស់សហរដ្ឋអាមេរិកដែលនឹងធ្វើឱ្យអាជីវកម្ម ឬ សហគ្រាសប្រឈមនឹងហានិភ័យ។ លើសពីនេះ ម៉ិកស៊ិកបានចាត់វិធានការដើម្បីដោះស្រាយការធ្វើចំណាកស្រុកខុសច្បាប់ចូលទៅក្នុងសហរដ្ឋអាមេរិក។
ទន្ទឹមនឹងនេះ អ្នកនាំពាក្យស្ថានទូតចិនប្រចាំទីក្រុងវ៉ាស៊ីនតោន Liu Pengyu លើកឡើងថា គ្មាននរណាម្នាក់ឈ្នះនៅក្នុងសង្គ្រាមពាណិជ្ជកម្ម ឬសង្គ្រាមដាក់ពន្ធគយឡើយ។ លោកបានបដិសេធអំពីបញ្ហាដែលចិនអនុញ្ញាតឲ្យមានសារធាតុគីមីដែលប្រើក្នុងការផលិតថ្នាំខុសច្បាប់ រួមទាំងថ្នាំ fentanyl ត្រូវបានរត់ពន្ធទៅអាមេរិក។ ចិនបានឆ្លើយតបទៅនឹងសំណើរបស់សហរដ្ឋអាមេរិកសម្រាប់ការត្រួតពិនិត្យលើករណីមួយចំនួន និងការចាត់វិធានការផងដែរ។ គួរឲ្យបញ្ជាក់ដែរថា ពន្ធដែលដាក់លើប្រទេសចិនដោយ Trump កាលពីអាណត្តិមុនត្រូវបានបន្សល់ទុកដល់ប្រធានាធិបតី Joe Biden ហើយឥឡូវនេះ Trump មានបំណងដាក់ពន្ធបន្ថែមទៀត។ បច្ចុប្បន្ននេះ ការនាំចូលពីចិនទៅកាន់សហរដ្ឋអាម៉េរិកជាប់ពន្ធ ៦៦,៤ ភាគរយ ខណៈដែលការនាំចូលពីសហរដ្ឋអាមេរិកមកកាន់ចិនជាប់ពន្ធ ៥៨,៣ ភាគរយប៉ុណ្ណោះ៕
Account
Security
Favourite Content