យោងតាមសេចក្តីប្រកាសព័ត៌មានរបស់ក្រសួងការបរទេសកាណាបានឱ្យដឹងថា លោកស្រី Sara Wilshaw ស្នងការពាណិជ្ជកម្មកាណាដា និងឧបការីអនុរដ្ឋមន្រ្តីទទួលបន្ទុកកិច្ចការអភិវឌ្ឍន៍ធុរកិច្ចអន្តរជាតិ នៃក្រសួងកាបរទេសកាណា នឹងដឹកនាំគណៈប្រតិភូពាណិជ្ជកម្មកាណាដាចំនួន ៩០នាក់មកពីជាង ៥០ស្ថាប័ន ធ្វើទស្សនកិច្ចនៅប្រទេសថៃ និងកម្ពុជា ចាប់ពីថ្ងៃទី ២៨ ដល់ថ្ងៃទី ៣០ ខែឧសភា ឆ្នាំ២០២៥នេះ។

​នៅ​ក្នុង​ដំណើរ​ទស្សនកិច្ច​របស់​លោកស្រី Sara Wilshaw នឹង​មាន​កម្ម​វិធី​សំខាន់​ៗ​ជា​ច្រើន​ដូច​ជាជំនួប​ប្រជុំ​រវាង​លោកស្រី Wilshaw ជាមួយ​​​ឯកឧត្តម ស៊ុន ចាន់ថុល ឧបនាយករដ្ឋមន្ត្រី និង​ជា​អនុប្រធាន​ទី​១ នៃ​ក្រុមប្រឹក្សា​អភិវឌ្ឍន៍​កម្ពុជា(CDC), ឯកឧត្តម សុក ស៊ីផាន់ណា ទេសរដ្ឋមន្ត្រី, លោកជំទាវ ចម និម្មល ​រដ្ឋមន្ត្រី​ក្រសួង​ពាណិជ្ជកម្ម, ឯកឧត្តម ឌិត ទីណា រដ្ឋមន្ត្រីក្រសួង​កសិកម្ម រុក្ខាប្រមាញ់ និង​នេសាទ និង​​នៅ​មានជំនួប​ផ្គូរផ្គង​ផ្នែក​ឯកជន B2B រវាង​អ្នក​វិនិយោគ​នៃ​ប្រទេស​ទាំង ២ ផងដែរ​។​

ខ្លឹមសារនៃសេចក្តី​ប្រកាស​ព័ត៌មានដដែលបាន​បន្ត​ថា ក្នុងនាមជាគំនិតផ្តួចផ្តើមដ៏សំខាន់ក្រោមយុទ្ធសាស្ត្រ ឥណ្ឌូ-ប៉ាស៊ីហ្វិក និង​យុទ្ធសាស្ត្រពិពិធកម្មពាណិជ្ជកម្ម TCTM ជួយដល់ក្រុមហ៊ុននាំចេញ និងក្រុមហ៊ុនកែច្នៃកាណាដា ​ឱ្យពង្រីកខ្លួនទៅកាន់ទីផ្សារយុទ្ធសាស្ត្រនៅកម្រិតសកល គឺ​កាណាដា​នឹង​ពង្រឹងខ្សែសង្វាក់ផ្គត់ផ្គង់ និងកសាងភាពជាដៃគូ​រយៈពេលវែងប្រកបដោយបរិយាបន្ន តាមរយៈការចូលរួមដោយផ្ទាល់ជាមួយអ្នកធ្វើសេចក្តីសម្រេច​ចិត្ត​សំខាន់ៗ និងភាគីពាក់ព័ន្ធក្នុងស្រុក។

អ្នកឧកញ៉ា លឹម ហេង​ អនុប្រធានសភាពាណិជ្ជកម្មកម្ពុជា បានហៅដំណើរទស្សកិច្ចរបស់ស្នងការពាណិជ្ជកម្ម និងប្រតិភូវិនិយោគកាណាដាថា ពិតមានសារៈសំខាន់ខ្លាំងណាស់សម្រាប់សេដ្ឋកិច្ចកម្ពុជា ខណៈដែលអាម៉េរិកបានដំឡើងពន្ធបដិការជាសាកលទៅហើយ ហើយកាណាដាក៏ជាទីផ្សារល្អដែលកម្ពុជានៅមានប្រព័ន្ធអនុគ្រោះពន្ធ(GSP) នៅឡើយ ដែលវាជាច្រកទំនិញមួយសម្រាប់នាំចូលទៅប្រទេសកាណាដា និងធ្លាយបន្តទៅកាន់ទីផ្សារអាម៉េរិកផងដែរ។

អ្នកឧកញ៉ាបានបញ្ជាក់ថា ទស្សនកិច្ចនេះក៏បានបង្ហាញឱ្យឃើញថា ការទុកចិត្តលើការដឹកនាំរបស់រដ្ឋាភិបាលលើស្ថិរភាពនយោបាយ និងកំណើនសេដ្ឋកិច្ចល្អ ទទួលបានអ្នកវិនិយោគកាន់តែច្រើន ហើយទន្ទឹមនោះ សភាពាណិជ្ជកម្មកម្ពុជា ក៏បានបង្កើតការិយាល័យពាណិជ្ជកម្មនៅប្រទេសកាណាដាបានចំនួន២រួចទៅហើយ មួយមាននៅទីក្រុងតូរ៉ុងតូ និងមួយទៀតនៅទីក្រុងម៉ុងរ៉េអាល់ ដែលធ្វើឱ្យអ្នកវិនិយោគកាណាដាមើលឃើញកាន់តែច្បាស់អំពីលទ្ធភាព​នៃការទាក់ទាញអ្នកវិនិយោគតាមច្បាប់វិនិយោគថ្មីរបស់កម្ពុជា ពិសេសការយកចិត្តទុកដាក់ពីប្រមុខដឹកនាំកម្ពុជា ដែលមានសម្តេចធិបតី ហ៊ុន ម៉ាណែត ជានាយករដ្ឋមន្ត្រី ដែលតែងតែជួបប្រជុំជាមួយវិស័យឯកជន ដើម្បីកែទម្រង់សេដ្ឋកិច្ចផ្ទៃក្នុងឱ្យកាន់តែល្អប្រសើរ ដើម្បីទាក់ទាញអ្នកវិនិយោគពីបណ្តាប្រទេសផ្សេងៗមកកម្ពុជា។

អ្នកឧកញ៉ា លឹម ហេង បានបញ្ជាក់ថា ៖

«ដំណើរទស្សនកិច្ចនេះជាផ្លែផ្កាដ៏ល្អ សម្រាប់ប្រទេសកម្ពុជាយើង ហើយការនាំចេញទៅទីផ្សារកាណាដា នឹងមានភាពកាន់តែល្អប្រសើរ ។ ខ្ញុំតែងតែនិយាយថា អ្នកដែលមកប្រសើរជាងអ្នកមិនមក ហើយអ្នកដែលមកគឺតែងតែមានបំណង ដូច្នេះ វាត្រូវតែផ្តល់ផលប្រយោជន៍ឱ្យគ្នាទៅវិញទៅមក ហើយនឹងបង្ហាញរូបភាពទៅកាន់វិនិយោគដទៃទៀតប្រាប់ថា កម្ពុជាអាចវិនិយោគបាន»។

របាយការណ៍​អាជ្ញាធរប្រទេស​​កាណាដា បានបង្ហាញថា ​ការ​ធ្វើ​ពាណិជ្ជកម្ម​ទំនិញ​ទ្វេភាគី ​រវាង​កាណាដា និង​កម្ពុជា ក្នុង​ឆ្នាំ​២០២៤ បាន​កើន​​​ដល់ ២,៤​ពាន់លាន​ដុល្លារ ដោយ​ប្រទេស​កាណាដាឈរ​នៅ​លំដាប់​ទី​៤ នៃ​ទីផ្សារ​នាំ​ចេញ​សម្លៀក​បំពាក់ និង​ផលិត​ផល​វាយនភណ្ឌ​របស់​កម្ពុជា​​ ចំណែក​​កាណាដា​នាំទំនិញ​មក​កម្ពុជាមាន​តម្លៃសរុប ៣៣,៥ លាន​ដុល្លារ៕ វិន ឈុនហ៊ាត