សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី Eurasia Business News បានរាយការណ៍ថា បារាំង និងវៀតណាម ទើបតែចុះហត្ថលេខាលើកិច្ចព្រមព្រៀងដែលមានតម្លៃ ១០ ពាន់លានដុល្លារនាពេលថ្មីៗនេះ។
ក្នុងអំឡុងពេលដំណើរទស្សនកិច្ចរបស់ប្រធានាធិបតីបារាំង លោក Emmanuel Macron ទៅកាន់ទីក្រុងហាណូយ បារាំង និងវៀតណាម បានចុះកិច្ចព្រមព្រៀងដែលមានតម្លៃ ១០ ពាន់លានដុល្លារដែលរួមមានវិស័យអាកាសចរណ៍ ការពារជាតិ ថាមពល និងហេដ្ឋារចនាសម្ព័ន្ធ។ កិច្ចព្រមព្រៀងនេះមានគោលបំណងពង្រឹងកិច្ចសហប្រតិបត្តិការលើវិស័យអាកាសចរណ៍ ថាមពលនុយក្លេអ៊ែរ ការដឹកជញ្ជូនផ្លូវដែក ថាមពលកកើតឡើងវិញ ការស្រាវជ្រាវ បច្ចេកវិទ្យាផ្កាយរណប និងវិស័យការពារជាតិ។ លើសពីនេះ កិច្ចព្រមព្រៀងរួមបញ្ចូលការទិញយន្តហោះ Airbus A330neo ចំនួន ២០ គ្រឿងសម្រាប់ក្រុមហ៊ុនអាកាសចរណ៍ VietJet ។ បន្ថែមពីនេះ ក្រុមហ៊ុនផលិតយន្តហោះអឺរ៉ុប Airbus និងវៀតណាមក៏បានចុះហត្ថលេខាលើកិច្ចព្រមព្រៀងមួយទាក់ទងនឹងកិច្ចសហប្រតិបត្តិការផ្កាយរណបផងដែរ។ CMA CGM ដែលជាក្រុមហ៊ុនដឹកជញ្ជូនរបស់បារាំងបានចុះហត្ថលេខាលើកិច្ចព្រមព្រៀងមានតម្លៃ ៦០០ លានដុល្លារជាមួយ Saigon Newport ដើម្បីសាងសង់កំពង់ផែទឹកជ្រៅនៅភាគខាងជើងប្រទេសវៀតណាមត្រឹមឆ្នាំ២០២៨ ។
នេះគឺជាដំណើរទស្សនកិច្ចជាលើកដំបូងរបស់ប្រធានាធិបតីបារាំងក្នុងរយៈពេលជិត១០ឆ្នាំមកនេះក្នុងគោលបំណងពង្រឹងជំហររបស់បារាំងក្នុងតំបន់ ចំពេលមានភាពតានតឹងពាណិជ្ជកម្មពិភពលោករួមមាន សម្ពាធពន្ធរបស់អាម៉េរិកលើទំនិញរបស់សហភាពអឺរ៉ុប និងការដាក់សម្ពាធលើវៀតណាមឱ្យបង្កើនការនាំចូលពីអាម៉េរិក។ ក្នុងភាពជាដៃគូយុទ្ធសាស្ត្រ វៀតណាមបានលើកបារាំងឡើងដល់កម្រិតការទូតខ្ពស់បំផុតរបស់ខ្លួន ហើយភាពជាដៃគូការពារជាតិនឹងត្រូវបានពង្រីករួមមាន សន្តិសុខតាមអ៊ីនធឺណិត ការចែករំលែកព័ត៌មានជាយុទ្ធសាស្ត្រ និងកិច្ចសហការប្រឆាំងនឹងអំពើភេរវកម្ម។
យ៉ាងណាក៏ដោយ ទោះបីជាមានបញ្ហាប្រឈមសំខាន់ៗដែលបង្កឡើងដោយគោលនយោបាយពន្ធរបស់អាម៉េរិកក៏ដោយ ប៉ុន្តែវៀតណាមបានបង្ហាញពីគោលដៅកំណើនសេដ្ឋកិច្ចប្រកបដោយមហិច្ឆិតា ៨% ឬខ្ពស់ជាងនេះសម្រាប់ឆ្នាំ២០២៥ ។ នាយករដ្ឋមន្ត្រី Pham Minh Chinh បានសង្កត់ធ្ងន់លើការប្តេជ្ញាចិត្តរបស់រដ្ឋាភិបាលចំពោះគោលដៅនេះ ចំពេលមានផលប៉ះពាល់ពីពន្ធអាម៉េរិកមកលើវៀតណាម ដែលគំរាមកំហែងដល់សេដ្ឋកិច្ចប្រទេសដែលពឹងផ្អែកលើការនាំចេញ និងខ្សែសង្វាក់ផ្គត់ផ្គង់ពិភពលោក៕
Account
Security
Favourite Content