ក្នុងគោលបំណងបំពេញក្តីស្រម៉ៃ និងបំណងប្រាថ្នាស្វែងរករបៀបរស់នៅប្រកបដោយនិរន្តរភាព បុរសម្នាក់បានសម្រេចចិត្តចាកចេញពីជិវិតដ៏ធុញថប់ក្នុងទីក្រុងដ៏អ៊ូអរបាងកក ប្រទេសថៃ ហើយចាប់ផ្តើមជីវិតថ្មីតាមរយៈការបង្កើតសហគមន៍រស់នៅបែបជនបទដែលមានឈ្មោះថា Pun Pun នៅភាគខាងជើងប្រទេសថៃ។

លោក Jon Jandai បានបង្កើតសហគមន៍មួយដែលផ្តោតលើការអនុវត្តការរស់នៅដោយពឹងផ្អែកស្ទើរតែទាំងស្រុងទៅលើកសិកម្មសរីរាង្គ ដែលមិនមានពូជដំណាំកូនកាត់ ឬការប្រើប្រាស់ជីគិមីឡើយ។ នៅក្នុងគម្រោងរបស់លោក Jandai មានទាំងផ្តល់សិក្ខាសាលាដើម្បីអប់រំមនុស្សអំពីវិធីសាស្រ្តធ្វើកសិកម្មសរីរាង្គ និងលក់ផលិតផលសរីរាង្គជាច្រើន។ គំនិតផ្តួចផ្តើមនេះក៏បានចែកចាយគ្រាប់ពូជដល់អ្នកដែលចង់ចាប់ផ្តើមដំណើរជីវិតប្រកបដោយនិរន្តរភាពផ្ទាល់ខ្លួនរបស់ពួកគេផងដែរ។

បេសកកម្មរបស់ Jandai បានពង្រីកលើសពីការផ្តល់ផលិតផលសរីរាង្គដោយសារតែលោកគឺជាអ្នកប្រឆាំងដាច់ខាតជាមួយនឹងការធ្វើកសិកម្មដោយប្រើប្រាស់គ្រាប់ពូជកូនកាត់ និងជីគីមី ដែលលោកតែងតែលើកហេតុផលថាវាអាចប៉ះពាល់ដល់បរិស្ថាន និងរួមចំណែកអវិជ្ជមានដល់ប្រព័ន្ធអាហារដែលមិនសូវមានសុខភាពល្អ។ ចក្ខុវិស័យរបស់សហគមន៍ Pun Pun លើការអនុវត្តសរីរាង្គត្រូវបានគេមើលឃើញ និងទទួលស្គាល់ថា ពិតជាស្របតាមទំនោររបស់ពិភពលោកដែលកំពុងដើរឆ្ពោះទៅរកការផលិតអាហារប្រកបដោយនិរន្តរភាព។

ចាប់តាំងតែពីបានបង្កើតឡើងកាលពីឆ្នាំ២០០៣រហូតមកទល់ពេលនេះបច្ចុប្បន្ន សហគមន៍ Pun Pun បានស្វាគមន៍ក្រុមអ្នកធ្វើការងារស្ម័គ្រចិត្តជាច្រើនមកពីជុំវិញពិភពលោកដើម្បីចូលរួមសកម្មភាព និងសាកល្បងនៃការរស់នៅតាមបែបនិរន្តភាព ហើយក្នុងនោះផងដែរ Pun Pun ក៏បានបើកដំណើរការភោជនីយដ្ឋាននៅក្នុងខេត្តឈៀងម៉ៃចំនួន២កន្លែងផងដែរដោយផ្តល់ជូនប្រភេទអាហារសុទ្ធតែមានប្រយោជន៍ចំពោះសុខភាព និងមានតម្លៃធូរថ្លៃ។

គិតមកទល់បច្ចុប្បន្ន គម្រោងរបស់ Pun Pun បានជួយបណ្តុះបណ្តាលកសិករក្រីក្រ និងផ្តល់គុណប្រយោជន៍ជាច្រើនដល់ជីវភាពរស់នៅរបស់កសិករ ហើយក៏កំពុងបានផ្តល់ប្រយោជន៍ដោយផ្ទាល់ដល់មនុស្សប្រមាណជាង២០នាក់ដែលកំពុងរស់នៅជាអចិន្ត្រៃយ៍នៅក្នុងសហគមន៍ Pun Punផងដែរ។

បន្ថែមលើសពីនេះ Pun Pun ក៏បានបង្កើតជាទីផ្សារលក់ផលិតផលសរីរាង្គលើអនឡាញ(eshop)ផងដែរ ដែលភាគច្រើនជាផលិផលដែលផលិតពីធម្មជាតិ និងធ្វើឡើងដោយដៃប្រជាសហគមន៍ និងអ្នករស់នៅក្នុងតំបន់ រួមមានដូចជា សាប៊ូដុំ សាប៊ូទឹក​ ប៊័រ គ្រាប់ស្វាយចន្ទី ព្រមទាំងផលិតផលផ្លែឈើស្រស់ៗជាច្រើនផ្សេងទៀត។ ជាមួយនឹងសកម្មភាពនៃការបង្កើតជាសហគមន៍កសិកម្មធម្មជាតិ និងការជួយដល់ប្រជាសហគមន៍ និងសង្គម Pun Pun ត្រូវបានគេចាត់ចូលទៅក្នុងប្រភេទអាជីវកម្មគំរូ ឬធុរកិច្ចបរិយាបន្ននៅក្នុងប្រទេសថៃ។

គួរឲ្យដឹងដែរថា ធុរកិច្ចបរិយាប័ន្ន គឺជាអាជីវកម្មឈរលើគោលការណ៍ធុរកិច្ច សំដៅទៅលើអង្គភាពទាំងឡាយណាដែលបង្កើតដំណោះស្រាយជាប្រព័ន្ធ មានភាពច្នៃប្រតិដ្ឋ និងមានទ្រង់ទ្រាយធំ ដែលឆ្លើយតបទៅនឹងបញ្ហាប្រឈមពាក់ព័ន្ធរបស់ប្រជាជនក្រីក្រ និងប្រជាជនមានចំណូលទាប (BoP និង B40)។ បន្ទាត់អាជីវកម្មបរិយាប័ន្ន ត្រូវបានបង្កើតឡើងក្នុងគោលបំណងផ្តល់ប្រាក់ចំណូលខ្ពស់គួរសម និងបង្កើននូវស្តង់ដារជីវភាពរស់នៅប្រសើរជាងមុនដល់ក្រុមមនុស្សដែលមានចំណូលទាបនៅបាតពីរ៉ាមីត ៤០% និងក្រុមមនុស្សដែលងាយរងគ្រោះ៕