បរទេស៖ ក្រុមហ៊ុនផលិតរថយន្តរបស់ចិនអាចនឹងដណ្តើមយកតំណែងកំពូលលេខ ១ ក្នុងការលក់ទៅកាន់ទីផ្សារសកលជាលើកដំបូងសម្រាប់ឆ្នាំ២០២៥ នេះ ដោយអាចផ្តួលគូប្រជែងរបស់ខ្លួន គឺជប៉ុន ដែលកាន់តំណែងនេះអស់រយៈពេលជាង ២០ឆ្នាំកន្លងមកហើយ។ នេះបើយោងតាមសេចក្ដីររាយការណ៍ពី Nikkei Asia ។

Nikkei បានចងក្រងតួលេខនៃការលក់ពេញមួយឆ្នាំដោយផ្អែកលើទិន្នន័យពីក្រុមហ៊ុនផលិតរថយន្ត និងទិន្នន័យរបស់ S&P Global Mobility ដែលក្នុងនោះរួមបញ្ចូលទាំង​ការ​លក់​ក្នុង​ស្រុក និង​ការ​នាំ​ចេញ គិតចាប់ពីខែមករា ដល់ខែវិច្ឆិកា។

ជាមួយនឹងទិន្នន័យខាងលើនេះ គេបានព្យាករណ៍ថា ការ​លក់​រថយន្តសរុប​របស់​ចិន​ទៅកាន់ទីផ្សារ​សកល​អាចនឹង​កើន​ឡើង ១៧% ​ឬ ​ប្រហែល ២៧ លាន​គ្រឿងនៅ​ឆ្នាំ​នេះ ខណៈដែលជប៉ុន​អាចលក់បានជិត ២៥ លាន​គ្រឿង​ប៉ុណ្ណោះ។ កាលពីឆ្នាំ២០១៨ ការលក់របស់ជប៉ុនបានឈានដល់កម្រិតខ្ពស់បំផុតជិត ៣០ លានគ្រឿង។ ក្នុងឆ្នាំ២០២២ ការលក់របស់ជប៉ុននាំមុខលើចិនប្រហែល ៨ លានគ្រឿង ប៉ុន្តែចិនអាចតាមទាន់ក្នុងរយៈពេលត្រឹមតែ ៣ ឆ្នាំប៉ុណ្ណោះ។ កាលពីឆ្នាំ​២០២៣ ចិនបានក្លាយជាអ្នកនាំចេញរថយន្តឈានមុខគេរបស់ពិភពលោក ហើយឥឡូវនេះកំពុងត្រៀមខ្លួនក្លាយជាអ្នកលក់រថយន្តកំពូលនៅឆ្នាំ ២០២៥។ ប្រទេសចិនមានចំណែកប្រហែល ៧០% នៃការលក់សរុបរបស់ក្រុមហ៊ុនរថយន្តចិន ដែលជំរុញដោយការកើនឡើងនៃរថយន្តអគ្គិសនី និងរថយន្តកូនកាត់ Hybrid។

ទន្ទឹមនឹងនេះ ការកើនឡើងសមត្ថភាពនៅក្នុងប្រទេសចិនធ្វើឱ្យមានការប្រកួតប្រជែងតម្លៃកាន់តែខ្លាំងឡើង ដោយក្រុមហ៊ុនផលិតរថយន្ត EV ឈានមុខគេ ដូចជា BYD និងក្រុមហ៊ុនផ្សេងទៀតងាកទៅរកការកាត់បន្ថយតម្លៃ។ នៅក្នុងចន្លោះខែមករាដល់ខែវិច្ឆិកា តម្លៃពេញនិយមបំផុតសម្រាប់រថយន្តដឹកអ្នកដំណើរមានតម្លៃ ១៤ ០០០ ដុល្លារទៅ ២​១ ០០០ ដុល្លារ និងមានចំណែកប្រហែល ២៣% នៃការលក់សរុប។ ស្របពេលដែលបរិយាកាសប្រកួតប្រជែងនៅក្នុងប្រទេសចិនកាន់តែយ៉ាប់យ៉ឺន ដោយសារក្រុមហ៊ុនផលិតរថយន្តទាំងនោះពឹងផ្អែកលើការនាំចេញដោយបង្វែររថយន្ត EV ពីទីផ្សារក្នុងស្រុកទៅកន្លែងផ្សេង។ ក្រុមហ៊ុនផលិតរថយន្តជប៉ុនធ្លាប់តែមានឥទ្ធិពលនៅក្នុងបណ្តាប្រទេសអាស៊ានជាប្រវត្តិសាស្ត្រ ប៉ុន្តែការលក់រថយន្តរបស់ចិនបាននាំមុខដោយអាចនឹងកើនឡើងជិត ៥០% ឬ ប្រហែល ៥ សែនគ្រឿងនៅឆ្នាំនេះ។ នៅក្នុងប្រទេសថៃ រថយន្តជប៉ុនមានចំណែក ៦៩% នៃការលក់រថយន្តថ្មីសរុបគិតត្រឹមខែវិច្ឆិកា ដែលធ្លាក់ចុះយ៉ាងខ្លាំងពីអត្រាប្រហែល ៩០% កាលពីប្រាំឆ្នាំមុន។ ដោយឡែក នៅខាងប៉ែកអឺរ៉ុបវិញ ការលក់រថយន្តរបស់ចិនត្រូវបានព្យាករណ៍ថានឹងកើនឡើង ៧% ឬ ប្រហែល ២,៣ លានគ្រឿងនៅឆ្នាំនេះ។

មិនត្រឹមតែប៉ុណ្ណោះ ការលក់របស់ចិនក៏កំពុងកើនឡើងជាលំដាប់នៅក្នុងទីផ្សារដែលកំពុងរីកចម្រើនជាមួយនឹងការព្យាករណ៍កើនឡើង ៣២% ឬ ២៣០ ០០០ គ្រឿងនៅក្នុងទ្វីបអាហ្រ្វិក និង ៣៣% ឬ ៥៤០ ០០ គ្រឿងនៅអាម៉េរិកឡាទីន។ ស្របពេលជាមួយគ្នានេះ គេមើលឃើញថា ការលក់របស់ក្រុមហ៊ុនផលិតរថយន្តជប៉ុនធ្លាក់ចុះនៅអាស៊ីអាគ្នេយ៍ និងអឺរ៉ុបនៅឆ្នាំនេះ។ ទន្ទឹមនឹងនេះ ក្រុមហ៊ុនផលិតរថយន្តជប៉ុនមួយចំនួនកំពុងផ្លាស់ប្តូរទៅរកវិធីសាស្រ្តផលិតរបស់ចិន។ Nissan Motor កំពុងចាប់ផ្តើមការនាំចេញរថយន្ត EV ដែលមានតម្លៃទាបក្រោមការណែនាំរបស់ចិន ខណៈដែលក្រុមហ៊ុន Toyota កំពុងបង្កើនការទិញពីក្រុមហ៊ុនផលិតគ្រឿងបន្លាស់ចិនដែលនៅក្នុងអាស៊ីអាគ្នេយ៍។

គួរកត់សម្គាល់ដែរថា ស្របពេលដែលចិនក្លាយជាប្រទេសដែលមានថាមពលស្វ័យប្រវត្តិកាន់តែរឹងមាំ ការព្រួយបារម្ភជាសកលក៏កើនឡើងខ្លាំងឡើងដែរ ដោយប្រទេសនានាកំពុងអនុវត្តវិធានការដូចជា ពន្ធគយ និងការណែនាំស្តង់ដារថ្មីដើម្បីការពារឧស្សាហកម្មក្នុងស្រុករបស់ពួកគេ។ ជាក់ស្តែង អាម៉េរិក និងកាណាដាដាក់ពន្ធលើសពីអត្រា​ ១០០% លើរថយន្ត EV ដែលផលិតដោយប្រទេសចិន ខណៈដែលសហភាពអឺរ៉ុបបានដំឡើងពន្ធដល់ ៤៥,៣% ៕