សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ឆ្លើយតបទៅនឹងប្រសាសន៍សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សាលារាជធានីភ្នំពេញបានត្រៀមរថយន្តក្រុងចំនួន៤០០គ្រឿង សម្រាប់ដឹកជញ្ជូនប្រជាពលរដ្ឋដោយមិនគិតថ្លៃនៅក្នុងឱកាសពីធីបុណ្យចូលឆ្នាំថ្មីប្រពៃណីជាតិខ្មែរក្នុងពេលខាងមុខនេះ។
ឯកឧត្តម ឃួង ស្រេង អភិបាលរាជធានីភ្នំពេញបានបញ្ជាក់ថា សាលារាជធានីភ្នំពេញបានត្រៀមរួចរាល់នូវរថយន្តក្រុងចំនួន៤០០គ្រឿង សម្រាប់ដឹកជញ្ជូនប្រជាពលរដ្ឋដោយមិនគិតថ្លៃនៅក្នុងឱកាសពីធីបុណ្យចូលឆ្នាំថ្មីប្រពៃណីជាតិខ្មែរខាងមុខនេះ។
ឯកឧត្តម ឃួង ស្រេង បានមានប្រសាសន៍ថា ៖
“យើងទើបតែបានជំនួយពីក្រុមហ៊ុន ប៊ូយ៉ុង គ្រុប របស់សាធារណរដ្ឋកូរ៉េ ចំនួន២០០ឡានទៀត។ ដូចនេះនឹងបន្ថែមជើងទៀតនៅឆ្នាំនេះ ជាពិសេសខ្សែរត់ទៅកាន់ខេត្តសៀមរាប និងបន្ទាយមានជ័យ នៅតាមផ្លូវជាតិលេខ៥ និងលេខ៦ ដើម្បីជួយសម្រាលការលំបាករបស់ពលរដ្ឋ”
អភិបាលនៃរដ្ឋាករស្វយ័តដឹកជញ្ជូនសាធារណៈ ឯកឧត្តម កែវ ចាន់ណារិទ្ធ បានប្រាប់ឱ្យដឹងបន្ថែមថា យោងតាមប្រសាសន៍ណែនាំរបស់ប្រមុខរាជរដ្ឋាភិបាលខាងរដ្ឋាករស្វយ័តដឹកជញ្ជូនកំពុងរៀបចំផែនការបញ្ចេញរថយន្ត និងកម្លាំងក្នុងការអនុវត្តផែនការឱ្យបានត្រឹមត្រូវ ដើម្បីត្រៀមដឹកជញ្ជូនប្រជាពលរដ្ឋពីរាជធានីភ្នំពេញទៅកាន់បណ្តាខេត្តមួយចំនួន ។
ឯកឧត្តមបានបញ្ជាក់ថា ៖
“ដោយទទួលបានអនុសាសន៍ពីសម្តេចតេជោ ក្រុមការងាររបស់យើងកំពុងតែរៀបចំផែនការបច្ចេកទេសឱ្យបានច្បាស់លាស់ ដើម្បីរៀបចំឡានក្រុងសម្រាប់ដឹកបងប្អូនប្រជាពលរដ្ឋទៅតាមបណ្តាខេត្តមួយចំនួនដូចឆ្នាំមុនៗដែរ។ ដោយឆ្នាំនេះ អាចនឹងមានបន្ថែមចំនួនជើង និងខ្សែរត់ យើងនឹងជូនដំណឹងដល់សាធារណជនក្នុងពេលឆាប់ៗ”
លោក បណ្ឌិត ហុង វណ្ណៈ ប្រធាននាយកដ្ឋានសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជាបានគាំទ្ររាជរដ្ឋាភិបាលក្នុងការរៀបចំឡានក្រុងសម្រាប់ដឹកបងប្អូនប្រជាពលរដ្ឋធ្វើដំណើរទៅស្រុកកំណើត ដោយបានប្រាប់ AMS ថា នេះជាការគិតគូរសុខទុក្ខរបស់ជាពលរដ្ឋនៅទូទាំងប្រទេស និងជាកាតព្វកិច្ចរបស់ប្រមុខដឹកនាំនូវការចាត់វិធានការចំពោះមុខ ទោះបីជាការរំលែកសុខទុក្ខបានប៉ុនណា គឺជាលទ្ធភាពជាក់ស្ដែងរបស់រាជរដ្ឋាភិបាល។
បណ្ឌិត ហុង វណ្ណៈ បានមានប្រសាសន៍ថា ៖
“តាមទស្សនៈរបស់ខ្ញុំ គាំទ្រនូវវិធានការរបស់សម្តេចជោ ហ៊ុន សែន ដែលសម្តេចបានរួមចំណែកក្នុងទិដ្ឋភាពផ្សេងៗ និងជាការរួមសុខរួមទុក្ខជាមួយប្រជាពលរដ្ឋ រួមមានសេវាសន្តិសុខសង្គម សេវាសុខាបាល សេវាគាំពារសង្គម ជាដើម”
លោកបណ្ឌិតបានបន្ថែមថា វាជាការរួមចំណែកកាត់បន្ថយចំណាយរបស់បងប្អូនប្រជាពលរដ្ឋក្នុងការធ្វើដំណើរទៅកាន់ស្រុកកំណើត ដោយប្រើប្រាស់មធ្យោបាយរបស់រដ្ឋទៅកាន់ខេត្តឆ្ងាយៗ ដែលត្រូវចំណាយច្រើន។ ដូច្នេះការប្រើប្រាស់រថយន្តក្រុងដែលរៀបចំដោយសាលារាជធានីឃើញថាមានគុណសម្បត្តិច្រើន ជាពិសេសគឺការកាត់បន្ថយនូវការចំណាយរបស់ប្រជាពលរដ្ឋដែលខ្វះខាតសេដ្ឋកិច្ច មិនបានចំណាយថ្លៃទិញសំបុត្រ ថែមទាំងមានផាសុកភាព។ សេវានេះ ក៏មានការគាំទ្រ និងសាទរពីប្រជាពលរដ្ឋផងដែរ ព្រោះថាវាមានទាំងសណ្តាប់ធ្នាប់សាធារណៈ របៀបរៀបរយល្អ ហើយប្រជាជនដែលប្រើប្រាស់សេវាឯកជនក៏នៅតែប្រើប្រាស់ជាប្រក្រតី។
លោកបណ្ឌិត ហុង វណ្ណៈ បានគូសបញ្ជាក់ថា ជាការគិតទៅដល់សេដ្ឋកិច្ច ពលរដ្ឋប្រើរថយន្តក្រុងរដ្ឋដោយមិនគិតថ្លៃ ជាការរួមចំណែកសាធារណៈដោយបំបែរទិសដៅសេដ្ឋកិច្ច កាត់បន្ថយពីការចំណាយលើក្រុមហ៊ុនដឹកជញ្ជូនទៅជាចំណាយលើការទិញរបស់របរ បរិក្ខា សម្ភារៈ សម្រាប់បុណ្យចូលឆ្នាំនៅភូមិស្រុករបស់ខ្លួន ដែលអាចនិយាយបានថាជាការបង្វែរចរន្តថវិកានៃការជំរុញសកម្មភាពសេដ្ឋកិច្ចឱ្យមានកំណើនសម្រាប់បុណ្យចូលឆ្នាំដែលជាបុណ្យដ៏ធំនៅកម្ពុជា៕
Account
Security
Favourite Content