សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងជាប្រធានក្រុមការងារចំពោះកិច្ចដោះស្រាយបញ្ហាតម្លៃប្រើប្រាស់ផ្លូវតភ្ជាប់ពីផ្លូវជាតិលេខ៦ ចូលទៅកាន់អាកាសយានដ្ឋានអន្តរជាតិសៀមរាប-អង្គរ និងតម្លៃចំណតនៅក្នុងអាកាសយានដ្ឋានអន្តរជាតិសៀមរាប-អង្គរ នាព្រឹកថ្ងៃពុធ ទី១០ ខែមករា ឆ្នាំ២០២៤ បានចុះបេសសកកម្មពិនិត្យទីតាំងអាកាសយានដ្ឋានអន្តរជាតិសៀមរាប-អង្គរ ដើម្បីប្រមូលធាតុចូលក្នុងការពិភាក្សាអំពីតម្លៃប្រើប្រាស់ផ្លូវហាយវេចូល-ចេញអាកាសយានដ្ឋាន និងតម្លៃចំណត។
បេសកកម្មនេះ មានការចូលរួមពីឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានក្រុមការងារចំពោះកិច្ច,ឯកឧត្តម ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល, ឯកឧត្តមអភិបាលរង នៃគណៈអភិបាលខេត្តសៀមរាប តំណាងក្រុមហ៊ុន AIAI និងបណ្ដាថ្នាក់ដឹកនាំក្រសួង-ស្ថាប័ន ដែលជាសមាជិកក្រុមការងារចំពោះកិច្ច ជាច្រើនរូបផ្សេងទៀត។
ការចុះពិនិត្យទីតាំងនៅអាកាសយានដ្ឋានអន្តរជាតិសៀមរាប-អង្គរ គឺធ្វើឡើងបន្ទាប់ពីកិច្ចប្រជុំក្រុមការងារចំពោះកិច្ចកាលពីថ្ងៃទី០៤ ខែមករា ឆ្នាំ២០២៤ កន្លងទៅ ដើម្បីប្រមូលព័ត៌មានឱ្យបានគ្រប់ជ្រុងជ្រោយសម្រាប់បានជាធាតុចូលក្នុងការពិភាក្សារកដំណោះស្រាយសមស្របជូនដល់បងប្អូនប្រជាពលរដ្ឋជុំវិញករណីតម្លៃប្រើប្រាស់ផ្លូវហាយវេ តភ្ជាប់ពីផ្លូវជាតិលេខ៦ ចូលទៅកាន់អាកាសយានដ្ឋាន និងតម្លៃចំណតនៅក្នុងអាកាសយានដ្ឋាន។
ក្រុមការងារចំពោះកិច្ចគ្រោងនឹងជួបជជែកពិភាក្សាជាមួយក្រុមហ៊ុន Angkor International Airport Investment (Cambodia) Co., Ltd. (AIAI) សំដៅរួមគ្នាស្វែងរកដំណោះស្រាយសមស្របជូនដល់បងប្អូនប្រជាពលរដ្ឋ។
គួររម្លឹកថា ជុំវិញរឿងរ៉ាវព្រលានយន្តហោះអន្តរជាតិសៀមរាបអង្គរយកថ្លៃចំណតផង និងយកថ្លៃផ្លូវហាយវេផងនេះ អ្នករត់តាក់ស៊ីជាច្រើននៅខេត្តសៀមរាប បាននាំគ្នាតវ៉ាទៅមុខសាលាខេត្តសៀមរាប ដើម្បីឱ្យរដ្ឋបាលខេត្តជួយរកដំណោះស្រាយ ។
តំណាងក្រុមអ្នករត់តាក់ស៊ីនៅខេត្តសៀមរាបបានលើកឡើងនូវសំណើ និងសំណូមពរមួយចំនួនដោយផ្តោតទៅលើកម្រៃសេវាផ្លូវ និងចំណតនៅព្រលានតម្លៃខ្ពស់, សុំឲ្យធ្វើចំណតរថយន្តនៅក្រៅព្រលានសម្រាប់រង់ចាំដឹកភ្ញៀវចេញពីព្រលាន និងពេលចេញពីចំណតរង់ចាំចូលទៅដឹកភ្ញៀវកុំឲ្យគិតថ្លៃម្តងទៀត, សំណូមពរសុំបញ្ឈប់ការជួលម៉ូតូ កង់ឲ្យភ្ញៀវបរទេសជិះ ដែលធ្វើឲ្យបាត់ចំណូលរបស់បងប្អូន រ៉ឺម៉កកង់បី និងករណីទីចំណតនៅទីប្រជុំជនក្នុងក្រុងមិនទាន់បានរៀបរយ ។ អ្នករត់តាក់ស៊ីក៏បានស្នើឱ្យក្រុមហ៊ុនអភិវឌ្ឍន៍ និងគ្រប់គ្រងអាកាសយានដ្ឋានអន្តរជាតិសៀមរាបពិចារណាកុំគិតថ្លៃចំណតសម្រាប់រថយន្តដែលទៅយកភ្ញៀវនៅព្រលានយន្តហោះក្រោម១៥នាទី ។
គួរបញ្ជាក់ថា នៅក្នុងឆ្នាំ២០២៤នេះ ជាពេលវេលាដែលក្រុមហ៊ុនវិនិយោគលើព្រលានយន្តហោះសៀមរាបអង្គរចាប់ផ្ដើមគិតថ្លៃសេវាសម្រាប់រថយន្តឆ្លងកាត់ផ្លូវហាយវេទៅកាន់ព្រលានយន្តហោះ ធ្វើឱ្យអ្នករត់តាក់ស៊ីត្រូវបង់ថវិកាមួយផ្នែក ដែលធ្វើឱ្យពួកគាត់បាត់បង់ថវិកាមួយចំនួននៅពេលចូលទៅយកភ្ញៀវ ។ ប៉ុន្តែសម្រាប់ពលរដ្ឋដែលធ្វើដំណើរតាមផ្លូវហាយវេតែមិនចូលព្រលានយន្តហោះគឺមិនតម្រូវឱ្យបង់ប្រាក់នោះទេ។
សូមជម្រាបថា អាកាសយានដ្ឋានអន្តរជាតិសៀមរាប-អង្គរ បានចាប់ផ្តើមសាងសង់កាលពីខែមីនា ឆ្នាំ២០២០ ដោយក្រុមហ៊ុន AIAI ក្រោមទុនវិនិយោគប្រមាណ ១ ១០០ លានដុល្លារអាមេរិក ដែលជាការវិនិយោគ BOT (សាងសង់ ដំណើរការ និងផ្ទេរមកវិញ) ក្នុងរយៈពេល ៥៥ឆ្នាំ។ ព្រលានយន្តនេះ ត្រូវកសាងឲ្យទៅជាលំដាប់ថ្នាក់ 4E សម្រាប់យន្តហោះធំៗគ្រប់ប្រភេទ ដែលអាចហោះឡើង និងចុះចតបាន។
អាកាសយានដ្ឋានថ្មីនេះបានប្រកាសបើកសម្ពោធជាផ្លូវការកាលពីចុងឆ្នាំ២០២៣ មានទីតាំងស្ថិតនៅភូមិក្រៀលពង ឃុំពពេល និងភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប ត្រូវបានរាជរដ្ឋាភិបាលកម្ពុជាសម្រេចដាក់ឈ្មោះជាផ្លូវការថា «អាកាសយានដ្ឋានអន្តរជាតិសៀមរាបអង្គរ (Siem Reap Angkor International Airport)» ដែលមានចម្ងាយពីប្រាសាទអង្គរវត្ត ៤០គីទ្បូម៉ែត្រនិង ៥១គីទ្បូម៉ែត្រពីក្រុងសៀមរាប៕
Account
Security
Favourite Content