សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កីឡាអាស៊ានប៉ារ៉ាហ្គេម គឺជាកីឡាដែលត្រូវបានដាក់បញ្ចូលគ្នាជាមួយនឹងព្រឹត្តិការណ៍កីឡាស៊ីហ្គេម។ កីឡានេះ ត្រូវបានបង្កើតឡើងក្នុងឆ្នាំ២០០១ នៅទីក្រុងកូឡាឡាំពួ ប្រទេសម៉ាឡេស៊ី ហើយវាត្រូវបានធ្វើឡើងនៅរាល់២ឆ្នាំម្ដង ដូចកីឡាស៊ីហ្គេមដែរ។ កីឡាអាស៊ានប៉ារ៉ាហ្គេម គឺសំដៅលើការប្រកួតកីឡាជនពិការអាស៊ាន ដែលមានបញ្ចូលនូវវិញ្ញាសារខុសៗគ្នា និងមានការរៀបចំជាពិសេសសម្រាប់ជនពិការតែម្ដង។ សម្រាប់ឆ្នាំ២០២៣នេះ កម្ពុជានឹងក្លាយជាម្ចាស់ផ្ទះក្នុងការរៀបចំទាំងកីឡាស៊ីហ្គេម និងអាស៊ានប៉ារ៉ាហ្គេម។
កីឡាអាស៊ានប៉ារ៉ាហ្គេមលើកទី១២ នឹងធ្វើឡើងក្រោយកីឡាស៊ីហ្គេមចំនួន២សប្ដាហ៍ ដោយគិតចាប់ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ ២០២៣។ គិតត្រឹមថ្ងៃទី ២៨កុម្ភៈនេះ នៅសល់រយៈពេល ៦៥ថ្ងៃទៀត នឹងដល់ព្រឹត្តិការណ៍កីឡាស៊ីហ្គេមជាស្ថាពរហើយ ។ ហើយបើគេរាប់ទៅដល់ព្រឹត្តិការណ៍កីឡាអាស៊ានប៉ារ៉ាហ្គេម គឺនៅសល់រយៈពេល ៩៤ថ្ងៃទៀត។
បើតាមឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ បានឱ្យដឹងថា កីឡាអាស៊ានប៉ារ៉ាហ្គេមនៅកម្ពុជានាពេលខាងមុខនឹងមាន១៣ប្រភេទកីឡា ក្នុងនោះមាន១ប្រភេទជាកីឡាដែលមិនមានមេដាយ (Demonstration sport)។ នៅក្នុងការប្រកួត នឹងមានការចូលរួមពីជនពិការផ្លូវកាយ និងជនពិការផ្លូវបញ្ញាក្នុងកម្រិតតិចតួច បើពិការជ្រៅពេកនឹងចូលទៅក្នុងប្រភេទអ្នកដែលលមានពិការភាពសតិបញ្ញាធ្ងន់ធ្ងរ គឺធ្ងន់ជាងអ្នកនៅក្នុងប៉ារ៉ាហ្គេម។
ក្នុងនោះផងដែរ ឯកឧត្តម វ៉ាត់ ចំរើន បានលើកជាឧទាហរណ៍យ៉ាងដូច្នេះថា ៖
“ជាក់ស្ដែងក្នុងកីឡានេះ មានអ្នកងងិតភ្នែក អីចឹងបើទាត់បាល់ គឺបាល់នោះមានកណ្ដឹង ហើយគាត់ត្រូវប្រើត្រចៀកស្ដាប់ ដើម្បីទាត់”
គួរបញ្ជាក់ថា អត្តពលិកដែលចូលរួមប្រកួតក្នុងកីឡាអាស៊ានប៉ារ៉ាហ្គេម មានពិការភាពច្រើនប្រភេទ រាប់ចាប់ពីស្ពឹក ពិការខួរក្បាល ពិការភាពចល័ត ពិការភ្នែក រហូតដល់ពិការបញ្ញា។ ព្រឹត្តិការណ៍ ASEAN Para Games ស្ថិតនៅក្រោមបទប្បញ្ញត្តិរបស់សហព័ន្ធកីឡាអាស៊ានប៉ារ៉ា (APSF) ដោយមានការត្រួតពិនិត្យដោយគណៈកម្មាធិការប៉ារ៉ាឡាំពិកអន្តរជាតិ (IPC) និងគណៈកម្មាធិការប៉ារ៉ាឡាំពិកអាស៊ី៕
Account
Security
Favourite Content