បរទេស៖ យោងតាមប្រភពព័ត៌មានពីរ៉យទ័រ បានរាយការណ៍ថា ធនាគារកណ្តាលអឺរ៉ុប (ECB) បានជំរុញឱ្យបណ្តាអ្នកផ្តល់ប្រាក់កម្ចីពន្លឿនការដកខ្លួនរបស់ពួកគេចេញពីប្រទេសរុស្ស៊ី ដោយសារតែការកើនឡើងហានិភ័យក្នុងការធ្វើអាជីវកម្មនៅក្នុងប្រទេសជាប់ទណ្ឌកម្ម។

ឥឡូវនេះ ធនាគារកណ្តាលអឺរ៉ុបកំពុងបន្តដាក់សម្ពាធលើធនាគាររបស់ប្រទេសជាសមាជិកសហភាពអឺរ៉ុបដែលកំពុងប្រតិបត្តិការនៅក្នុងប្រទេសរុស្ស៊ីឲ្យប្រញាប់ប្រញាល់ចាកចេញពីរុស្ស៊ី។ ក្នុងរយៈពេល ២ ឆ្នាំចុងក្រោយនេះ ធនាគារបរទេសមួយចំនួនបានចាកចេញពីរុស្ស៊ី ដោយសារតែលោកខាងលិចបានដាក់ទណ្ឌកម្មរុស្ស៊ីទាក់ទងនឹងជម្លោះជាមួយអ៊ុយក្រែន។

ទោះជាយ៉ាងណាក្តី អ្នកផ្តល់ប្រាក់កម្ចីមួយចំនួនមកពីតំបន់អឺរ៉ូបន្តប្រតិបត្តិការនៅក្នុងប្រទេសនេះ រួមមានធនាគារ Raiffeisenbank ដែលជាសាខារបស់ធនាគារ Raiffeisen Bank International (RBI) របស់ប្រទេសអូទ្រីស និង ធនាគារ UniCredit របស់ប្រទេសអ៊ីតាលី។ ធនាគារទាំងពីរដើរតួនាទីយ៉ាងសំខាន់ក្នុងសេដ្ឋកិច្ចរុស្ស៊ី ដោយអនុញ្ញាតឱ្យមានការទូទាត់ប្រាក់អឺរ៉ូទាំងទៅ និងទាំងមកនៅក្នុងរុស្ស៊ី ហើយពួកគេគឺជាស្ថាប័នបរទេសតែមួយគត់ក្នុងចំណោមស្ថាប័នឥណទានសំខាន់ៗចំនួន ១៣ ដែលចុះបញ្ជីដោយធនាគារកណ្តាលរុស្ស៊ី។ លើសពីនេះ អ្នកផ្តល់ប្រាក់កម្ចីហូឡង់ ING, Commerzbank និង Deutsche Bank របស់អាល្លឺម៉ង់, ធនាគារ OTP របស់ហុងគ្រី, Intesa SanPaolo របស់អ៊ីតាលី និង SEB របស់ស៊ុយអែតក៏រក្សាវត្តមាននៅលើទីផ្សាររុស្ស៊ីផងដែរ។

ប្រធានផ្នែកត្រួតពិនិត្យរបស់ធនាគារកណ្តាលអឺរ៉ុប Buch លើកឡើងថា ចាប់តាំងពីការចាប់ផ្តើមនៃវិបត្តិនៅអ៊ុយក្រែន ធនាគាររបស់សហភាពអឺរ៉ុបបានកាត់បន្ថយប្រតិបត្តិការរបស់ពួកគេពាក់កណ្តាល ហើយធនាគារដែលនៅសេសសល់ត្រូវបានផ្តល់ការណែនាំច្បាស់លាស់អំពីការកាត់បន្ថយសកម្មភាព និងជម្រើសនៃការចាកចេញ។ លោកស្រីបានអះអាងថា សកម្មភាពដកខ្លួនចេញពីរុស្ស៊ីនឹងមានការប្រុងប្រយ័ត្ន ដោយសារវាមនាហានិភ័យដល់កេរ្តិ៍ឈ្មោះធនាគារដែលកំពុងធ្វើសកម្មភាពនៅក្នុងប្រទេសដែលស្ថិតនៅក្រោមទណ្ឌកម្មអន្តរជាតិ។ វាក៏មានបញ្ហាទាក់ទងនឹងសមត្ថភាពក្នុងការគ្រប់គ្រង និងគ្រប់គ្រងហានិភ័យនៅក្នុងស្ថានភាពដ៏លំបាកបែបនេះផងដែរ។

RBI Group ដែលជាម្ចាស់ក្រុមហ៊ុនផ្តល់ប្រាក់កម្ចី Raiffeisen កំពុងរងសម្ពាធពីសហរដ្ឋអាមេរិក និងសហភាពអឺរ៉ុប ដើម្បីពន្លឿនការចាកចេញពីប្រទេសរុស្ស៊ី។ កាលពីឆ្នាំមុន អ្នកផ្តល់ប្រាក់កម្ចីអូទ្រីសមួយនេះបានប្រកាសផែនការបំបែកប្រតិបត្តិការរបស់ខ្លួនចេញពីរុស្ស៊ីនៅខែកញ្ញា ឆ្នាំ ២០២៣ បន្ទាប់ពីមានសម្ពាធកាន់តែខ្លាំងឡើងពីរដ្ឋាភិបាលលោកខាងលិច។ យ៉ាងណាមិញ RBI បានពន្យារពេលដំណើរការរហូតដល់ចុងឆ្នាំ ២០២៣ ។

កាលពីដើមខែនេះ ទីក្រុងវ៉ាស៊ីនតោនបានព្រមានធនាគារ RBI របស់ប្រទេសអូទ្រីសថា វាមានហានិភ័យដែលអាចនឹងត្រូវបានកាត់ចេញពីប្រព័ន្ធហិរញ្ញវត្ថុរបស់សហរដ្ឋអាមេរិក ប្រសិនបើត្រូវបានរកឃើញថាបានជួយផ្តល់មូលនិធិដល់យោធារបស់ប្រទេសរុស្ស៊ី៕