សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពីនីគីអាស៊ី បានរាយការណ៍ថា រដ្ឋាភិបាលជប៉ុនកំពុងរៀបចំថវិកាចំនួន ១៦០ ពាន់លានយ៉េន (១ ០០០លានដុល្លារ) សម្រាប់គាំទ្រឧស្សាហកម្មរចនាបន្ទះឈីបរបស់ខ្លួន ក្នុងកិច្ចខិតខំប្រឹងប្រែងដើម្បីតាមឱ្យទាន់សហរដ្ឋអាម៉េរិក និងចិន។
ក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន នឹងផ្តល់មូលនិធិទៅលើគម្រោងរបស់ក្រុមហ៊ុនបច្ចេកវិទ្យា អាជីវកម្មទើបចាប់ផ្តើម ឬ start-up និងសាកលវិទ្យាល័យក្នុងរយៈពេលរហូតដល់ ៥ឆ្នាំ ក្នុងគោលបំណងសម្លឹងឆ្ពោះទៅរកបន្ទះឈីបកម្រិតខ្ពស់សម្រាប់ដាក់បញ្ចូលក្នុងបញ្ញាសិប្បនិម្មិត មជ្ឈមណ្ឌលទិន្នន័យ អង់តែន យានជំនិះដែលបើកបរដោយខ្លួនឯង មនុស្សយន្ត និងការរចនាលើការសន្សំសំចៃថាមពល។
ផ្អែកទៅលើការបែងចែកថវិកាបន្ថែមសារពើពន្ធឆ្នាំ២០២៤ និងថវិកាសារពើពន្ធឆ្នាំ២០២៥ រដ្ឋាភិបាលជប៉ុនត្រូវបានរំពឹងថានឹងបញ្ចេញថវិកាចំនួន ១៦០ ពាន់លានយ៉េន (១ ០០០លានដុល្លារ) ដែលអាចគ្របដណ្តប់ក្នុងរយៈពេល ៣ ឆ្នាំដំបូង។ ផែនការមូលនិធិនេះគឺសម្រាប់អ្នកទទួលជំនួយដើម្បីរ៉ាប់រងការចំណាយថ្លៃៗ ដូចជា ឧបករណ៍ស្វ័យប្រវត្តិកម្មសម្រាប់ការរចនាអេឡិចត្រូនិក ការចំណាយលើបុគ្គលិកសម្រាប់អ្នកស្រាវជ្រាវ និងការបង្កើតគំរូជាដើម។
កាលពីឆ្នាំ២០២៣ ក្រសួងបានអនុម័តជំនួយថវិកាប្រហែល ៥០ ពាន់លានយ៉េនសម្រាប់ការរចនា និងការអភិវឌ្ឍន៍បន្ទះឈីប។ ចាប់តាំងពីពេលនោះមក ជប៉ុនបានបង្កើនការគាំទ្រ ដោយសារជំហានផ្សេងៗនៃដំណើរការអភិវឌ្ឍន៍ និងដំណើរការផលិតមានសន្ទុះកាន់តែខ្លាំងឡើងក្នុងចំណោមក្រុមហ៊ុនផ្សេងៗគ្នា ខណៈដែលភាគហ៊ុនដ៏ធំនៃការវិនិយោគគ្រឿងផ្គុំឈីប semiconductor ឆ្ពោះទៅរកការរចនាបណ្តាញសៀគ្វីនៃបន្ទះឈីប។
គួរកត់សម្គាល់ថា ស្របពេលដែលសហរដ្ឋអាម៉េរិកមានក្រុមហ៊ុនបច្ចេកវិទ្យាធំៗនៅលើពិភពលោក ប៉ុន្តែសម្រាប់ជប៉ុនគឺមានវត្តមានក្រុមហ៊ុនជំនាញបច្ចេកវិទ្យាតិចតួចប៉ុណ្ណោះ។ ជាក់ស្តែង ប្រព័ន្ធដំណើរការក្រាហ្វិកដែលរចនាដោយ Nvidia បានធ្វើឱ្យវាក្លាយជាក្រុមហ៊ុនដ៏មានតម្លៃបំផុតរបស់ពិភពលោក ខណៈពេលដែលបន្ទះឈីបដែលរចនាដោយ Apple បានធ្វើឲ្យដំណើរការ iPhone កាន់តែប្រសើរឡើង។ យោងទៅតាមការស្ទង់មតិមួយនៅឆ្នាំ២០២៤ បានឲ្យដឹងថា អាជីវកម្មបចេ្ចកវិទ្យាអាម៉េរិកមានចំណែក ៥១ ភាគរយនៃទីផ្សារសរុបរបស់ពិភពលោក ខណៈដែលជប៉ុនមានត្រឹមតែ ៩ ភាគរយប៉ុណ្ណោះ។
ក្រោមផែនការដែលបានប្រកាសកាលពីខែវិច្ឆិកា ជប៉ុន មានបំណងផ្តល់ជំនួយសាធារណៈជាង ១០ ទ្រីលានយ៉េន (៦៣,៣៨ ឡានដុល្លារអាម៉េរិក) សម្រាប់ឧស្សាហកម្មគ្រឿងផ្គុំឈីប semiconductor និង AI តាមរយៈសារពើពន្ធឆ្នាំ២០៣០។
អ្នកវិភាគផលិតផលអេឡិចត្រូនិកជប៉ុនម្នាក់បានលើកឡើងថា ទាំងការផលិត និងការរចនាគឺជាចំណុចសំខាន់ចាំបាច់ក្នុងការជំរុញឧស្សាហកម្មគ្រឿងផ្គុំឈីបរបស់ជប៉ុន ជាពិសេស ការរចនាបន្ទះឈីបឯកទេសសម្រាប់កម្មវិធីធំៗ ដូចជា ការបើកបរដោយស្វ័យប្រវត្តិ ដែលអាចលើកឧស្សាហកម្មក្នុងស្រុកទាំងមូល។
បន្ថែមពីលើការផ្តល់ជំនួយផ្នែកហិរញ្ញវត្ថុ រដ្ឋាភិបាលជប៉ុននឹងជួយបណ្ដុះបណ្ដាលទេពកោសល្យ ដោយបង្កើតចាប់តាំងពីថ្នាក់ដំបូងរហូតដល់វគ្គកម្រិតខ្ពស់សម្រាប់និស្សិត និងអ្នកស្រាវជ្រាវនៅក្នុងសាជីវកម្មជប៉ុន។ នៅក្នុងថ្នាក់កម្រិតខ្ពស់ សិស្សនឹងអាចរៀនអំពីបច្ចេកវិទ្យារចនាដោយផ្ទាល់ពីក្រុមហ៊ុន Tenstorrent ដែលជាក្រុមហ៊ុនចាប់ផ្តើមដំបូងរបស់សហរដ្ឋអាមេរិក ប៉ុន្តែគឺជាក្រុមហ៊ុនទំនើបមួយនៅក្នុងវិស័យនេះ។ លើសពីនេះ ជប៉ុននឹងផ្តល់ជំនួយបន្ថែមទៀតសម្រាប់ផ្នែកផលិត ដោយសារការរចនាបន្ទះឈីបក្នុងស្រុកគឺមានសារៈសំខាន់សម្រាប់ទស្សនៈសន្តិសុខសេដ្ឋកិច្ចផងដែរ ហើយថែមទាំងអាចកាត់បន្ថយហានិភ័យដែលបណ្តាលមកពីការរំខាននៃខ្សែសង្វាក់ផ្គត់ផ្គង់នៅក្រៅប្រទេសផងដែរ៕
Account
Security
Favourite Content