សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅឆ្នាំ២០២៦ ខាងមុខនេះ គឺជាលើកទី២០នៃការរៀបចំកិច្ចប្រជុំកំពូលហ្វ្រង់កូហ្វូនី ក្នុងនោះ កម្ពុជា គឺជាប្រទេសមួយដែលបានដាក់បេក្ខភាពក្នុងការរៀបចំកិច្ចប្រជុំកំពូលដ៏មានសារៈសំខាន់មួយនេះ។ ប្រសិនបើសម្រេចបំណងក្នុងការធ្វើជាម្ចាស់ផ្ទះរៀបចំកិច្ចប្រជុំកំពូលនេះពិតមែន កម្ពុជានឹងជ្រើសរើសយកទឹកដីប្រវត្តិសាស្ត្រ គឺខេត្តសៀមរាប ជាកន្លែងប្រារព្ធកិច្ចប្រជុំ។ យ៉ាងណាក៏ដោយ កម្ពុជាត្រូវរង់ចាំស្ដាប់ការសម្រេចចុងក្រោយនូវបេក្ខភាពរបស់ខ្លួន ដែលនឹងត្រូវធ្វើឡើងនៅខែតុលា ឆ្នាំនេះ។
ថ្លែងក្នុងវេទិកាធុរកិច្ចបារាំង-កម្ពុជា កាលពីថ្ងៃទី៨ ខែកក្កដាកន្លងទៅថ្មីៗនេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឱ្យដឹងថា ព្រឹត្តិការណ៍នេះនឹងបង្ហាញពីបេតិកភណ្ឌវប្បធម៌ និងការប្ដេជ្ញាចិត្តរបស់កម្ពុជាចំពោះគុណតម្លៃនៃហ្រ្វង់កូហ្វូនី។ មិនត្រឹមតែប៉ុណ្ណោះ កិច្ចប្រជុំកំពូលនេះគឺជាឱកាសក្នុងការបង្ហាញពីសមិទ្ធផលរបស់កម្ពុជា សំដៅ លើកកម្ពស់ភាពសម្បូរបែបនៃវប្បធម៌ ភាសា និងពង្រឹងទំនាក់ទំនងជាមួយបណ្ដាប្រទេសហ្វ្រង់កូហ្វូនី។
ទាក់ទិននឹងកិច្ចប្រជុំនេះ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានរៀបរាប់ពីសារបានរបស់អង្គការហ្វ្រង់កូហ្វូនីថា សមាជិកនៃអង្គការនេះគឺមានរហូតទៅដល់ ៨៨ប្រទេស ក្នុងនោះប្រទេសដែលនិយាយភាសាបារាំងមានជាង ៣០ប្រទេស។
អ្នកឧកញ៉ាបន្តឱ្យដឹងទៀតថា៖
«វាជាសហប្រតិបត្តិការមួយរវាងប្រទេសនិយាយភាសាបារាំង ដែលកម្ពុជាបានចូលរួមជាមួយក្នុងនាមជាសមាជិក ដើម្បីជំរុញនូវកិច្ចសហប្រតិបត្តិការផ្នែកភាសាបារាំងផង និងសេដ្ឋកិច្ចផង និយាយឱ្យចំគឺទំនាក់ទំនងសេដ្ឋកិច្ចនេះឯង។»
អ្នកឧកញ៉ាក៏បានសង្កត់ធ្ងន់ផងដែរថា៖
«ដូច្នេះ ឆ្នាំ២០២៦នេះ បើយើងជាម្ចាស់ផ្ទះ នោះភ្ញៀវដែល មកចូលរួមគឺមានទាំងអ្នកវិនិយោគ ទាំងអ្នកនយោបាយ ដែលវានឹងចំណេញទៅដល់ការផ្សព្វ ផ្សាយពីសក្កានុពលសេដ្ឋកិច្ចនៃប្រទេសយើង ទៅកាន់អ្នកវិនិយោគ។»
គួររំលឹកផងដែរថា កាលពីឆ្នាំ២០២៣ កន្លងទៅ កម្ពុជាក៏ធ្លាប់បានទទួលភ្លើងខៀវពីប្រទេសបារាំងក្នុងការធ្វើជាម្ចាស់ផ្ទះរៀបចំកិច្ចប្រជុំផងដែរ។
កិច្ចប្រជុំកំពូលហ្វ្រង់កូហ្វូនី ធ្វើឡើងក្នុងគោលបំណងលើកកម្ពស់ភាសាបារាំងឱ្យកាន់តែទូលំទូលាយ ព្រមទាំងពង្រឹងទំនាក់ទំនងរវាងប្រទេសជាសមាជិកទាំងអស់។ កិច្ចប្រជុំនេះធ្វើឡើងរៀងរាល់ពីរឆ្នាំម្តង ដោយប្រមូលផ្តុំនូវប្រមុខរដ្ឋ និងរដ្ឋាភិបាលនៃប្រទេសសមាជិកទាំងអស់នៃអង្គការហ្វ្រង់កូហ្វូនីអន្តរជាតិ ជុំវិញប្រធានបទសំខាន់ៗមួយចំនួន៕
Account
Security
Favourite Content